Chʼol 18
Laj Alma li alalb’ej naxjal xk’a’uxl
Li rey aj Mosiah kixxaqab’ laj Alma jo’ aj k’amol b’e re li Iglees aran Tzarahemla. Toja’ naq laj Alma kixsik’eb’ chik li winq re naq te’xtenq’a chixtzolb’aleb’ laj Nefita.
Laj Alma ut li rey aj Mosiah ke’chal xk’a’uxl xb’aan naq li ani ink’a’ neke’paab’an yookeb’ chixrahob’tesinkileb’ li komon re li Iglees xb’aan li xpaab’aaleb’.
Laj Alma wan jun li ralal, a’an aj Alma xk’ab’a’. Laj Alma li alalb’ej ink’a’ naxpaab’ li k’a’ru kixk’ut chaq lix yuwa’ ut ki’ok choq’ jun winq q’axal aj maak.
Laj Alma li alalb’ej ut eb’ li kaahib’ ralal li rey aj Mosiah ke’xsik’ xsachb’al li Iglees. Ke’xq’unb’esiheb’ xch’ool naab’aleb’ li tenamit chixkanab’ankil li Iglees ut chi ok choq’ aj maak.
Laj Alma kitijok chirix li ralal re naq tixtzol li yaal ut tixjal xk’a’uxl.
Laj Alma li alalb’ej ut eb’ li kaahib’ ralal laj Mosiah toj yookeb’ chixsik’b’al xsachb’al li Iglees.
Sa’ jun li kutan, jun li anjel kixk’ut rib’ chiruheb’. Li anjel ki’aatinak rik’in jun kawil xyaab’ kuxej li kixchiq’ li ch’och’.
Eb’ li oob’ chi saaj winq k’a’jo’ naq ke’xuwak, jo’kan naq ke’t’ane’ chi ch’och’. Sa’ xtiklajik ink’a’ ke’xtaw ru li aatin yoo chixyeeb’al li anjel.
Li anjel kik’ulun re xsumenkil lix tijeb’ li komon re li Iglees. Li anjel kixpatz’ re laj Alma li alalb’ej k’a’ut naq yoo chixsik’b’al xsachb’al li Iglees.
Kichiiq’an li ch’och’ naq li anjel kixye re laj Alma li alalb’ej naq tixkanab’ xsik’b’al xsachb’al li Iglees.
Laj Alma li alalb’ej ut eb’ li kaahib’ ralal laj Mosiah ke’t’ane’ wi’chik chi ch’och’. Ke’ril chaq jun li anjel, ut ke’xnaw naq lix wankil li Dios kixchiq’ chaq li ch’och’.
Q’axal nim xsachik xch’ool laj Alma li alalb’ej, jo’kan naq ink’a’ kiru chi aatinak. Kiq’uno’ xmetz’ew toj reetal naq ink’a’ kiru chireek’ansinkil li ruq’.
Eb’ li ralal laj Mosiah ke’xk’am laj Alma li alalb’ej rik’in lix yuwa’ ut ke’xnumsi resil chixjunil li k’a’ru ke’xk’ul chaq.
Laj Alma kisaho’ sa’ xch’ool. Kixnaw naq li Dios kixsume chaq lix tij.
Laj Alma kixch’utub’eb’ li k’iila tenamit re te’xk’e reetal k’a’ru kixb’aanu chaq li Qaawa’ choq’ re li ralal ut reheb’ li ralal laj Mosiah.
Laj Alma, rochb’eeneb’ xkomon aj k’amol b’e re li Iglees, ke’xkuy xsa’ ut ke’tijok ut ke’xpatz’ re li Dios naq tixtenq’a laj Alma li alalb’ej re tixk’ul wi’chik lix metz’ew.
Chirix xnumik wiib’ kutan ut wiib’ q’ojyin, laj Alma li alalb’ej kiru wi’chik chi aatinak ut chireek’asinkil rib’.
A’an kixye reheb’ li tenamit naq kixjal xk’a’uxl chirixeb’ lix maak ut naq li Dios kixkuy xmaak.
A’an kixk’ut chiruheb’ naq chixjunileb’ tento naq te’wanq chi tiikeb’ xch’ool re te’ok sa’ lix awa’b’ejihom li Dios. Jo’kan ajwi’ ki’aatinak chirix li nimla rahilal kixnumsi chaq xb’aan li maak kixb’aanu chaq.
Kisaho’ xch’ool laj Alma li alalb’ej xb’aan naq kixjal xk’a’uxl ut xb’aan naq li Dios kixkuy xmaak. A’an kixnaw naq li Dios naxra.
Laj Alma li alalb’ej ut eb’ li ralal laj Mosiah ke’ok chixk’utb’al li yaal chiru chixjunil li ch’och’, ut chixpuktesinkil re chixjunil resil li k’a’ru rilomeb’ ut rab’ihomeb’ chaq.
Ke’xyal xq’e chixtuqub’ankil li ra ke’xb’aanu chaq. Ke’xch’olob’eb’ li loq’laj hu chiru li tenamit ut ke’xtzoleb’ chirix li Jesukristo.
Li Dios kirosob’tesi laj Alma li alalb’ej ut eb’ li ralal laj Mosiah naq yookeb’ chixpuktesinkil resil li evangelio. Naab’aleb’ li ke’ab’ink reheb’ ut ke’paab’ank.