Chʼol 6
Lix matk’ laj Lehi
Laj Lehi kixye re lix junkab’al resil jun li aajel ruhil k’utb’esinb’il matk’ kixk’ul. Lix matk’ laj Lehi kixk’e chi saho’k sa’ xch’ool xb’aan laj Nefi ut laj Sam, a’b’anan chi raho’k xch’ool xb’aan laj Laman ut laj Lemuel.
Sa’ lix k’utb’esinb’il matk’, laj Lehi kiril jun li winq tiqto sa’ jun saqi b’aatal li kixye re naq tixtaaqe. Laj Lehi kixtaaqe sa’ jun yamyookil ch’och’ q’ojyin ru ut ra xch’ool.
Chirix naq kib’eek chiru xnumik k’iila hoonal sa’ q’ojyin, laj Lehi kitijok re xpatz’b’al lix tenq’.
Toja’ naq kiril jun toon li che’, saq ru li ruuchinihom. Li ki’il ruuchinihom a’in kixsahob’resi xch’ool li aniheb’ ke’yalok re.
Laj Lehi kixyal li ru li che’, ut kixnujob’resi li raam rik’in sahil ch’oolejil. Kiraj naq lix junkab’al te’xyal li ru li che ’ xb’aan naq kixnaw naq a’aneb’ ajwi’ te’saho’q xch’ool.
Laj Lehi kiril naq jun nima’ yoo chi nume’k, ut nach’ wan rik’in li che’. Sa’ lix yo’leb’aal li nima’ kiril li xSariah, laj Sam, ut laj Nefi.
Laj Lehi kixb’oq li rixaqil ut eb’ li ralal re naq te’xyal li ru li che’. Li xSariah, laj Sam, ut laj Nefi ke’chal ut ke’xyal li ru li che’, a’b’an laj Laman ut laj Lemuel ink’a’ ke’raj xb’aanunkil.
Laj Lehi kiril ajwi’ jun li b’arb’ookil ch’iich’ ut jun li laatz’ ut ka’ch’in ruhil b’e li nawulak sa’ xtoonal li che’.
Kiril k’iila ch’uut chi tenamit yookeb chi b’eek sa’ li b’e a’an. Xb’aan jun li q’ojyinal choql, wankeb’ junjunq ke’xjalb’ehi rib’ ut ke’sach.
Wankeb’ chik ke’xchap chi kaw li b’arb’ookil ch’iich’ ut ke’ruhan chi wulak toj sa’ xtoonal li che’ chiru li q’ojyinal choql. Ke’xyal li ru li che’.
Chixjunpak’alil lix ha’il li nima’ wan jun nimla kab’l b’ar wi’ wankeb’ li ani yookeb’ chireetz’unkileb’ li ani ke’xyal li ru li che’. Junjunq reheb’ li ke’xyal li ru li che’ ke’xutaanak ut ke’xnajtob’resi rib’ rik’in li che’.
Laj Lehi kiril naab’aleb’ li kristiaan sa’ lix matk’. Junjunq reheb’ ke’xchap rib’ chi kaw chiru li b’arb’ookil ch’iich’ ut ke’b’eek chiru li q’ojyin toj ke’wulak sa’ lix toonal li che’. Ke’xyal li ru li che’. Jalaneb’ chik ke’wulak sa’ li nimla kab’l malaj ke’ok chi ha’ sa’ li nima’ malaj ke’xsach xb’e. Laj Laman ut laj Lemuel ink’a’ ke’xyal li ru li che’. Laj Lehi kixk’oxlaheb’ ut kixyal xtenq’ankileb’ chixpaab’ankil lix taqlahom li Dios.