Chʼol 45
Li Jesukristo nak’utuk chirix li loq’laj wa’ak ut li tijok
Naq ke’sutq’i chaq li tzolom, li Kolonel kixjachi li kaxlan wa ut kirosob’tesi. Kixk’e reheb’ lix tzolom ut kixtaqla naq te’xk’e reheb’ li tenamit.
Li Jesus kixye naq eb’li neke’k’uluk re li loq’laj wa’ak neke’xye naq junelik te’xjultika a’an ut li mayej kixb’aanu. Toja’ naq te’xk’ul lix Musiq’.
Li Jesukristo kirosob’tesi li viin ut kixk’e reheb’ lix tzolom. Eb’ li tzolom ke’xk’e li viin re li tenamit.
Li Jesus kixye naq eb’ li ani neke’k’uluk re li loq’laj wa’ak neke’xye naq te’xpaab’eb’ lix taqlahom.
Li Jesus kixye wi’chik reheb’ lix tzolom naq chixjunileb’ li te’k’uluq re li loq’laj wa’ak ut junelik te’xjultika a’an, taawanq lix Musiq’ rik’ineb’.
A’an kixye reheb’ lix tzolom naq te’osob’tesiiq wi te’xpaab’eb’ lix taqlahom.
A’an kixye reheb’ naq junelik te’tijoq, ut naq te’tijoq jo’ chanru ke’ril chi tijok a’an.
Li Kolonel kixye reheb’ chixjunil laj Nefita naq te’tijoq chiru lix Choxahil Yuwa’ sa’ xk’ab’a’ a’an. Jo’kan ajwi’ kixtaqla naq te’tijoq rik’in lix junkab’aleb’.
A’an kixye reheb’ li tenamit naq te’xch’utub’ rib’ chi kok’ aj xsa’. Tento te’xk’ul rik’in sahilal li ani te’wulaq sa’ lix ch’utam, tento te’tijoq chirixeb’, ut tento te’wanq jo’ chaab’il eetalil chiruheb’.
Li Kolonel kixk’e reheb’ lix tzolom li wankilal re xk’eeb’al li Santil Musiq’ej. Chirix a’an, jun li choql kixmoyeb’ ru li tenamit, jo’kan naq xjuneseb’ li tzolom ke’ril li Jesukristo chi taqe’k sa’ choxa.