Chʼol 34
Laj Helaman ut li wiib’ mil chi saaj aj pleet
Lix tenamit laj Ammon ak ke’xyeechi’i re li Dios naq maajo’q’e chik te’pleetiq. Li ch’och’ wankeb’ wi’ nach’ wan rik’ineb’ laj Nefita, ut neke’kole’ rix xb’aaneb’ laj Nefita.
Naq eb’ li xik’ neke’ilok re lix tenamit laj Ammon ke’ok chixpleetinkileb’ laj Nefita, lix tenamit laj Ammon ke’raj xq’etb’al li aatin ke’ok wi’ re naq te’ruuq chixtenq’ankileb’ laj Nefita sa’ li pleet.
Laj Helaman ut eb’ li xkomoneb’ chik aj jolominel aj Nefita ink’a’ ke’raj naq lix tenamit laj Ammon te’xq’et li aatin li okenaqeb’ wi’ rik’in li Dios.
Eb’ li saaj alalb’ej re lix tenamit laj Ammon moko okenaqeb’ ta sa’ li sumwank a’an. Eb’ a’an ke’raj xtenq’ankileb’ li teep aj pleet reheb’ laj Nefita chi pleetik choq’ re li ach’ab’aak.
Wiib’ mil reheb’ li saaj winq a’an ke’xsik’ ru xkolb’al rix lix tenamiteb’. Ke’xpatz’ re laj Helaman naq a’an taawanq choq’ aj jolominel reheb’.
Eb’ li saaj winq a’in kaweb’ xch’ool, maak’a’eb’ xxiw, ut kaweb’ xmetz’ew. Neke’xye li yaal ut tiikeb’ chixb’aanunkil li taqlanb’ileb’ wi’, ut neke’xpaab’ lix taqlahom li Dios.
Laj Helaman kib’eek sa’ xjolomileb’ lix wiib’ mil chi saaj aj pleet. Ralaleb’ kixye reheb’, ut eb’ a’an yuwa’b’ej ke’xye re.
Us ta eb’ li ralal laj Helaman maajun wa ke’pleetik chaq, ink’a’ ke’xuwak. Ke’tzole’ xb’aaneb’ lix na’ re’ te’xpaab’ li Dios ut te’xnaw naq a’an tixtenq’aheb’.
Laj Helaman ut eb’ lix teep aj pleet ke’wan sa’ junjunq li pleet rik’ineb’ laj Lamanita. Eb’ li saaj winq a’in ke’ab’ink chiru chixjunil li taqlanb’ileb’ wi’ xb’aan laj Helaman.
Ke’pleetik chi kaw xch’ooleb’ ut ke’tenq’an chiralinasinkil li xik’ neke’ilok reheb’. Naq kiraqe’ li pleet, laj Helaman kixtaw naq chixjunileb’ li ralal ke’xk’ul xtoch’olaleb’, a’b’an maajun kikam.
A’an jun sachb’a-ch’oolej. K’a’jo’ xsahil xch’ool laj Helaman. Kixnaw naq eb’ li saaj winq ke’kole’ xb’aan xnimal xpaab’aaleb’ chirix li Dios.