Chʼol 26
Lix tenamit laj Ammon
Eb’ li ralal laj Mosiah ke’xk’ut li evangelio chiruheb’ laj Lamanita. K’iila mil reheb’ laj Lamanita ke’xjal xk’a’uxl ut ke’xjunaji rib’ rik’in li Iglees.
Eb’ li Lamanita li ke’xjunaji rib’ rik’in li Iglees ke’xk’ul choq’ xk’ab’a’eb’ laj Anti-Nefi-Lehi, malaj lix tenamit laj Ammon. Chaab’ileb’ ut kaw neke’k’anjelak.
Eb’ laj Lamanita li ink’a’ ke’xjal xk’a’uxl, ke’josq’o’ rik’in lix tenamit laj Ammon ut ke’xkawresi rib’ re te’pleetiq rik’ineb’.
Lix tenamit laj Ammon ke’xnaw naq eb’ laj Lamanita aj maakeb’ te’chalq chixkamsinkileb’, a’b’an ke’xk’e xch’ool naq ink’a’ te’pleetiq rik’ineb’. Ak ke’xjal xk’a’uxl chirix li kamsink.
Ke’xmuqeb’ lix k’anjeleb’aal re pleet sa’ xchamal li ch’och’ ut ke’xye re li Dios naq maajun wa chik te’kamsinq.
Naq eb’ laj Lamanita aj maakeb’ ke’wulak ut ke’ok chixkamsinkileb’, eb’ li tenamit ke’xhupub’ rib’ chi ch’och’ ut ke’ok chi tijok.
Naq ke’ril naq ink’a’ neke’pleetik lix tenamit laj Ammon, naab’aleb’ laj Lamanita aj maakeb’ ke’xkanab’ xkamsinkileb’.
Eb’ laj Lamanita ke’raho’ xch’ool xb’aan li kamsink ke’xb’aanu chaq. Ke’xtz’eq lix k’anjeleb’aal re pleet sa’ li ch’och’ ut ke’xjunaji rib’ rik’in lix tenamit laj Ammon. Ink’a’ chik ke’raj pleetik.
Naab’aleb’ chik laj Lamanita ke’wulak re xsachb’aleb’ lix tenamit laj Ammon. Toj ink’a’ ke’raj pleetik ut naab’aleb’ ke’kamsiik.
Laj Ammon ink’a’ kiraj naq taasachq li tenamit li naxra, ut kitijok re xpatz’b’al xtenq’ankil. Li Qaawa’ kixye re naq tixk’am lix tenamit ut taa’elq chaq sa’ li ch’och’ a’an.
Eb’ laj Nefita sa’ Tzarahemla ke’xk’e li ch’och’ Jerxon re laj Ammon ut lix tenamit, ut ke’xkoleb’ rix. Ke’ok choq’ ramiiweb’ rib’.