Chʼol 22
Lix mision laj Alma sa’ Ammoniah
Laj Alma kiwan xk’a’uxl xb’aan lix maa’usilaleb’ laj Nefita, jo’kan naq kixk’e xch’ool chixnumsinkil chixjunil lix hoonal sa’ xjultikankil li evangelio. Kixsik’ ru laj Nefihah re naq taakanaaq sa’ xna’aj jo’ xb’eenil aj raqol aatin.
Laj Alma kixk’ut li evangelio sa’ chixjunil li ch’och’. Naq kixyal xjultikankil li raatin li Dios sa’ Ammonihah, eb’ li tenamit ink’a’ ke’rab’i. Ke’risi chaq sa’ xtenamiteb’.
Kiraho’ xch’ool laj Alma xb’aan naq k’a’jo’ xmaa’usilaleb’ li wankeb’ sa’ li tenamit Ammonihah. Ki’el chi xik sa’ jalan chik tenamit.
Jun li angel kixk’ut rib’ chiru laj Alma ut kixk’ojob’ xch’ool. Li anjel kixye re naq taasutq’iiq chaq sa’ li tenamit Ammonihah ut taajultikanq wi’chik aatin. La Alma sa’ junpaat kisutq’i chaq.
Laj Alma yoo xtz’okajik. Naq ki’ok sa’ li tenamit, kixpatz’ xwa re jun li winq. Jun li anjel ak kixye re li winq a’in naq laj Alma taawulaq ut naq laj Alma a’an jun xprofeet li Dios.
Li winq a’in, laj Amulek, kixk’am laj Alma sa’ li rochoch ut kixk’e chi wa’ak. Laj Alma kikana k’iila kutan rik’in laj Amulek ut lix junkab’al. Kib’antioxin chiru li Dios xb’aan lix junkab’al laj Amulek ut kirosob’tesiheb’.
Laj Alma ki’aatinak rik’in laj Amulek chirix lix b’oqb’al chixtzolb’aleb’ li ani wankeb’ Ammonihah. Laj Amulek xko’o chirix laj Alma re xtzolb’al li tenamit. Li Santil Musiq’ej kixtenq’aheb’.
Laj Alma kixye reheb’ li tenamit naq te’xjal xk’a’uxl malaj li Dios tixsacheb’. A’an kixye naq li Jesukristo taak’ulunq ut tixkoleb’ li aniheb’ wank xpaab’aaleb’ chirix ut te’xjal xk’a’uxl.
Ke’josq’o’ li tenamit re Ammonihah. Ke’xyal xchapb’al laj Alma re xtz’apb’al sa’ tz’alam, a’b’an li Qaawa’ kixkol rix.
Toja’ naq laj Amulek ki’ok chi jultikank aatin chiruheb’. Naab’aleb’ ke’xnaw ru laj Amulek; moko aj jalanil tenamit ta jo’ laj Alma. A’an kixye reheb’ resil li anjel li kiril chaq.
Laj Amulek kixye naq laj Alma a’an jun xprofeet li Dios ut yaal li naxye. Ke’sach xch’ooleb’ li tenamit naq ke’rab’i lix ch’olob’ahom laj Amulek.
Ke’josq’o’ junjunq reheb’ li tenamit, ut q’axal wi’chik jun maa’us aj winq, laj Tzeesrom xk’ab’a’. Ke’xsik’ xsachb’al xna’leb’ laj Amulek rik’in li patz’ok, a’b’an a’an kixye reheb’ naq naxnaw li k’a’ru te’raj xb’aanunkil.
Laj Tzeesrom kiraj xsachb’al chixjunil li k’a’ru us. Naxtikib’ li ch’a’ajkilal, toja’ naq li tenamit neke’xtoj xtumin re xtuqub’ankileb’ li ch’a’ajkilal naxtikib’ chaq.
Laj Tzeesrom ink’a’ kiru chixb’alaq’inkil laj Amulek, jo’kan naq kixyeechi’i tumin re wi tixye naq maak’a’ jun li Dios. Laj Amulek kixnaw naq yo’yo li Dios ut kixye naq laj Tzeesrom naxnaw ajwi’ a’b’an naxra wi’chik li tumin chiru li Dios.
Chirix a’an, laj Amulek kixtzol laj Tzeesrom chirix li Jesus ut chirix li wakliik chi yo’yo ut li junelik yu’am. Sachsookeb’ xch’ool li tenamit. Laj Tzeesrom ki’ok chi siksotk xb’aan lix xiw.
Laj Tzeesrom kixnaw naq laj Alma ut laj Amulek wan xwankil li Dios rik’ineb’, xb’aan naq ke’xnaw li k’a’ru yoo chixk’oxlankil. Laj Tzeesrom kipatz’ok ut ki’ab’in naq laj Alma kixk’ut li evangelio chiru.
Wankeb’ li ke’paab’ank re li raatin laj Alma ut laj Amulek ut ke’ok chixjalb’aleb’ xk’a’uxl ut chixtz’ilb’aleb’ rix li loq’laj hu.
A’b’an lix k’ihaleb’ li tenamit ke’raj xkamsinkil laj Alma ut laj Amulek. Ke’xb’ak’eb’ ut ke’xk’ameb’ chiru li xb’eenil aj raqol aatin.
Kiraho’ xch’ool laj Tzeesrom xb’aan lix maa’usilal ut li tik’ti’ kixk’ut chiru li tenamit. Kixtz’aama reheb’ li tenamit naq te’xkanab’ chi ach’ab’aak laj Alma ut laj Amulek.
Laj Tzeesrom ut xkomoneb’ chik li winq li ke’paab’ank re lix k’utum laj Alma ut laj Amulek ke’isiik chaq sa’ li tenamit. Eb’ li tenamit aj maak ke’xkuteb’ chi pek.
Chirix a’an, li tenamit aj maak ke’xch’utub’eb’ li ixq ut li kok’al li ke’paab’ank ut ke’xkuteb’ sa’ xam, rochb’eeneb’ lix loq’laj hu.
Laj Alma ut laj Amulek ke’mine’ ru chirilb’al lix kamikeb’ li ixq ut li kok’al sa’ li xam. Laj Amulek kiraj roksinkil lix wankil li Dios re xkolb’aleb’.
A’b’an laj Alma kixye re laj Amulek naq maak’a’ tixb’aanu re xramb’al li kamsink, xb’aan naq eb’ li yookeb’ chi kamk, sa’ junpaat te’wanq rik’in li Dios, ut eb’ laj maak te’xk’ul xtojb’a-maak.
Li xb’eenil aj raqol aatin kixtz’ajeb’ chi ruq’ xnaq’eb’ ru laj Alma ut laj Amulek naab’al sut ut kixreetz’uheb’ xb’aan naq ink’a’ ke’xkoleb’ li ixq ut li kok’al sa’ li xam. Toja’ naq kixtz’apeb’ sa’ tz’alam.
Wankeb’ chik xkomon li winq aj maak ke’wulak sa’ li tz’alam ut k’iila paay chan ru naq ke’xrahob’tesi laj Alma ut laj Amulek; ke’risi li tzakemq chiruheb’ re te’tz’okaaq ut ke’xchuub’aheb’.
Li xb’eenil aj raqol aatin kixye naq wi laj Alma ut laj Amulek te’roksi lix wankil li Dios re xkolb’aleb’ rib’, a’an taapaab’anq. Kixsak’eb’ wi’chik.
Laj Alma ut laj Amulek ke’wakli ut ke’xaqli. Laj Alma kitijok ut kixpatz’ re li Dios naq tixk’eheb’ xmetz’ew xb’aan lix paab’aal li wan rik’in li Kristo.
Lix wankil li Dios kikub’e sa’ xb’een laj Alma ut laj Amulek, ut ke’xt’up li k’aam li b’ak’b’ookeb’ wi’. Eb’ li winq aj maak ke’xuwak ut ke’xyal eelelik, a’b’an ke’t’ane’ chi ch’och’.
Li ch’och’ kichiq’ok, ut eb’ lix tz’akil li tz’alam ke’t’ane’ sa’ xb’eeneb’ li winq aj maak. Li Qaawa’ kixkol rix laj Alma ut laj Amulek, ut maajun ra ke’xk’ul.
Eb’ li tenamit re Ammonihah ke’chal chirilb’al li k’a’ru yoo chi k’ulmank. Naq ke’ril laj Alma ut laj Amulek chi elk chaq sa’ li tz’alam li rumb’il chi ch’och’, ke’chal xxiw ut ke’eelelik.
Li Qaawa’ kixye re laj Alma ut laj Amulek naq te’xik Sidom. Aran ke’xtaw li tenamit tiikeb’ xch’ool. Aran ajwi’ wan laj Tzeesrom, ut nim xyajel.
Kisaho’ xch’ool laj Tzeesrom naq kiril laj Alma ut laj Amulek. Kiwan xk’a’uxl naq xe’kamsiik xb’aan li k’a’ru xb’aanu chaq a’an. Kixtz’aama chiruheb’ naq te’xk’irtesi.
Laj Tzeesrom kixpaab’ li Jesukristo ut kixjal xk’a’uxl chirix lix maak. Naq laj Alma kitijok chirix, laj Tzeesrom kik’irtesiik sa’ junpaat.
Kikub’siik xha’ laj Tzeesrom ut ki’ok chixjultikankil li evangelio. Naab’aleb’ chik ke’kube’ ajwi’ xha’.
Chixjunil li tenamit aj maak re Ammonihah ke’kamsiik xb’aan jun teep aj pleet aj Lamanita, jo’ kixye laj Alma rik’in profeetil aatin.