Chʼol 37
Laj Nefi ut laj Lehi sa’ tz’alam
Laj Nefi ut laj Lehi a’aneb’ ralal laj Helaman. Laj Helaman kiraj naq tiikaqeb’ xch’ool jo’ laj Lehi ut laj Nefi li ke’el chaq Jerusalen.
Laj Helaman kixk’ut chiruheb’ li ralal naq te’xpaab’ li Jesukristo. Ke’xtzol naq li kuyuk maak natawman rik’in li paab’aal ut li jalb’a-k’a’uxlej.
Laj Nefi ut laj Lehi xkoheb’ chixjultikankil li raatin li Dios chiruheb’ laj Nefita ut eb’ laj Lamanita. K’iila mil ke’kub’e xha’.
Naq laj Nefi ut laj Lehi xkoheb’ sa’ li ch’och Nefi, jun teep aj pleet reheb’ laj Lamanita kixtz’apeb’ sa’ tz’alam ut ink’a’ ke’k’ehe’ xtzakemq chiru k’iila kutan.
Eb’ laj Lamanita koxe’okaq sa’ tz’alam re xkamsinkil laj Nefi ut laj Lehi, a’b’an ink’a’ ke’ru, xb’aan naq ke’kole’ rix xb’aan jun sutam li xam li taak’atoq raj re li ani tixyal xk’eeb’al li ruq sa’ xb’eeneb’.
Laj Lehi ut laj Nefi ink’a’ ke’k’ate’ xb’aan li xam. Ke’xye reheb’ laj Lamanita naq lix wankil li Dios yoo chixkolb’aleb’ rix.
Li ch’och’ ut lix tz’akil li tz’alam ke’ok chi chiiq’ank. Li wankeb’ chaq sa’ li tz’alam ke’moye’ xb’aan jun choql re q’ojyin ut kichal lix xiweb’.
Sa’ xb’een li choql re q’ojyin ki’aatinak jun xyaab’ kuxej. Ch’anch’o jo’ sa’ hasb’ ki’aatinak, a’b’an chixjunileb’ ke’ru chi ab’ink re.
Li xyaab’ kuxej kixye naq te’xjal xk’a’uxl ut te’xkanab’ xsik’b’al xkamsinkil laj Nefi ut laj Lehi.
Ki’aatinak oxib’ sut li xyaab’ kuxej, ut kichiiq’an wi’chik li ch’och’ ut xtz’akil li tz’alam. Eb’ laj Lamanita ink’a’ ke’ru chi eelelik xb’aan naq q’ojyin ru, ut xb’aan li xiw ke’reek’a.
Jun laj Nefita li kiwan chaq junxil sa’ li Iglees kiril li rilob’aal laj Nefi ut laj Lehi naq ke’lemtz’un ru chiru li q’ojyin.
Laj Nefi ut laj Lehi yookeb’ chi ilok sa’ choxa ut yookeb’ chi aatinak. Li winq kixye reheb’ laj Lamanita naq te’iloq. Eb’ a’an ink’a’ neke’xnaw ani aj-ik’in neke’aatinak laj Nefi ut laj Lehi.
Li winq, laj Aminadab xk’ab’a’, kixye reheb’ laj Lamanita naq laj Nefi ut laj Lehi yookeb’ chi aatinak rik’ineb’ lix anjel li Dios.
Eb’ laj Lamanita ke’xpatz’ re laj Aminadab k’a’ru te’xb’aanu re naq taa’isiiq chaq li q’ojyinal choql. A’an kixye reheb’ naq te’xjal xk’a’uxl ut te’tijoq toj reetal naq taawanq lix paab’aaleb’ chirix li Jesukristo.
Eb’ laj Lamanita ke’tijok toj reetal naq ki’isiik chaq li q’ojyinal choql.
Naq isinb’il li q’ojyin, ke’ril naq chixjunil sutub’anb’ileb’ xb’aan jun xaqal li xam. Li xam ink’a’ kixk’ateb’ chi moko kixk’at xtz’akil li tz’alam.
Eb’ laj Lamanita ke’reek’a sahil ch’oolejil q’axal nim, ut lix Musiq’ li Dios kixnujob’resi li raameb’.
Jun xyaab’ kuxej kihasb’ak, kixye naq te’k’ojob’aaq xch’ool xb’aan lix paab’aaleb’ chirix li Jesukristo.
Eb’ laj Lamanita ke’ilok taqe’q re rilb’al b’ar kichal chaq li xyaab’ kuxej. Ke’ril chi kub’eek chaq eb’ li anjel sa’ choxa.
Wan na oxib’ cient chi aamej li ke’ilok ut ke’ab’ink re li k’a’ru kik’ulman sa’ li tz’alam. Eb’ a’an xkoheb’ ut ke’xye re jalaneb’ chik.
Lix k’ihaleb’ laj Lamanita ke’xpaab’eb’ ut ke’xkanab’ xk’anjeleb’aal re pleet.
Eb’ laj Lamanita ke’xkanab’ li xik’ rilb’aleb’ laj Nefita, ut ke’xq’axtesi li ch’och’ li ke’xmaq’ chaq. Eb’ laj Lamanita ke’ok chixq’axb’al xtiikilaleb’ laj Nefita.
Naab’aleb’ laj Lamanita ke’el chaq rik’in laj Nefi ut laj Lehi ut ke’xtzoleb’ laj Nefita jo’eb’ ajwi’ eb’ laj Lamanita.