Chʼol 52
Lix sachlijikeb’ laj Jaredita
Eb’ laj Jaredita ke’ok chi k’ihank ut ke’b’ihomo’. Ke’xsik’ ru jun rey re naq taawanq choq’ aj jolominel reheb’.
Kinume’ k’iila chihab’, ut eb’ laj Jaredita ke’ok choq’ aj maak. Li Qaawa’ kixtaqlaheb’ li profeet chixyeeb’al reheb’ naq te’xjal xk’a’uxl malaj te’sache’q.
Eb’ li tenamit ink’a’ ke’ab’in chiruheb’ li profeet. Ke’xsik’ xkamsinkileb’.
Ke’wan li pleet ut li we’ej sa’ li ch’och’. Naab’aleb’ aj Jaredita ke’kam.
Li Qaawa’ kixtaqla jun chik profeet, laj Eter xk’ab’a’. A’an kijultikan aatin chalen chaq eq’la toj sa’ li q’ojyin, chixyeeb’al reheb’ laj Jaredita naq te’xpaab’ li Dios ut naq te’xjal xk’a’uxl.
Laj Eter kixye reheb’ laj Jaredita naq wi te’xpaab’ li Dios, sa’ junaq kutan te’wanq rik’in li qaChoxahil Yuwa’ sa’ jun ruchich’och’ li chaab’il wi’chik.
Laj Eter kixye reheb’ laj Jaredita naab’al li xninqal ru na’leb’, a’b’an ink’a’ ke’xpaab’. Ke’xmin ru chi elk chaq sa’ li tenamit.
Laj Eter kixmuq rib’ sa’ jun ochochpek chi kutan, re naq ink’a’ taakamsiiq. Chi q’eq ki’el chaq chirilb’al li k’a’ru yoo chi k’ulmank rik’ineb’ laj Jaredita.
A’an kixchoy xtz’iib’ankil li esil chirixeb’ laj Jaredita naq toj wan sa’ muqmu.
Li Qaawa’ kixtaqla laj Eter rik’in laj Koriantumr, a’an jun maa’us aj rey aj Jaredita. Laj Eter kixye re naq tixjal xk’a’uxl, malaj taakanaaq chi yo’yo re rilb’al lix kamik chixjunil lix tenamit.
Laj Koriantumr ut lix tenamit ink’a’ ke’xjal xk’a’uxl. A’an kixsik’ xkamsinkil laj Eter, a’b’an laj Eter ki’eelelik ut kixmuq rib’ sa’ li ochochpek.
Rik’in naq q’axaleb’ aj maak li tenamit, li Qaawa’ kixmajewa li ch’och’. Ink’a’ ke’ru chixk’ojob’ankil lix k’anjeleb’aal malaj lix yok’leb’ ch’iich’, xb’aan naq wulajaq chik ink’a’ ke’ru chixtawb’aleb’.
Chixjunileb’ laj Jaredita ke’pleetik sa’eb’ li pleet, jo’kaneb’ ajwi’ li ixq ut li kok’al. Laj Koriantumr kixjolomi jun teep aj pleet ut jun chik winq, laj Xiz xk’ab’a’, kixjolomi li jun chik.
Laj Koriantumr ut laj Xiz aj maakeb’ xkab’ichaleb’. Li Santil Musiq’ej ki’el chaq rik’ineb’ laj Jaredita xb’aan lix maa’usilaleb’. Laj Satanas kiwan tz’aqal xwankil sa’ xb’een lix ch’ooleb’ li tenamit.
Eb’ laj Jaredita ke’pleetik toj reetal naq juneseb’ chik laj Koriantumr ut laj Xiz ke’kana. Naq laj Xiz kilukta xb’aan xlajik lix kik’el, laj Koriantumr kixch’ot xjolom.
Lix profeetil aatin laj Eter kitz’aqlok ru: laj Koriantumr kiwan choq’ roso’jikil aj Jaredita. Kitawe’ xb’aaneb’ li tenamit aj Tzarahemla.
Laj Eter kixchoy xtz’iib’ankil li esil chirixeb’ laj Jaredita. Ke’sache’ xb’aan lix maa’usilaleb’. Moqon, eb’ li tz’iib’anb’il esil reheb’ laj Jaredita ke’tawe’ xb’aaneb’ laj Nefita.