Chʼol 3
Laj Lehi na’el chaq Jerusalen
Li Qaawa’ kisaho’ xch’ool rik’in laj Lehi ut sa’ jun q’ojyin kiraatina sa’ jun matk’. Kixye re naq tixch’utub’ lix junkab’al ut te’elq chaq Jerusalen. Laj Lehi ki’ab’in chiru li Qaawa’.
Lix junkab’al laj Lehi ke’xk’uub’ lix tzakemq ut lix muheb’aal t’ikr. Ke’xkanab’ li rochoch ut lix oor ut lix plaat ut xkoheb’ chiru li yamyookil ch’och’.
Laj Lehi ut li xSariah, li rixaqil, ke’wan kaahib’eb’ li ralal. Ke’k’ab’a’in laj Laman, laj Lemuel, laj Sam, ut laj Nefi.
Naq ak ke’b’eek chiru oxib’ kutan, lix junkab’al laj Lehi ke’xyiib’ lix muheb’aal t’ikr sa’ jun ru taq’a chixk’atq jun nima’.
Laj Lehi kixyiib’ jun li artal rik’in pek, ut kixb’aanu jun li mayej chiru li Qaawa’. Kib’antioxin chiru li Dios xb’aan naq kixkol lix junkab’al chiru li sache’k.
Laj Lehi kixk’e Laman choq’ xk’ab’a’ li nima’ ut Lemuel choq’ xk’ab’a’ li ru taq’a. Laj Lehi kiraj naq eb’ li ralal juntaq’eetaqeb’ rik’in li nima’ ut li ru taq’a, junelik raj yooqeb’ chixk’ulb’al rib’ b’ar wi’ wan li Dios ut junelik raj yooqeb’ chixpaab’ankileb’ li taqlahom.
Laj Laman ut laj Lemuel ke’xk’oxla naq lix yuwa’ jip xxik xb’aan naq kixk’ameb’ chaq xb’e chi elk chaq Jerusalen ut kixkanab’ lix b’ihomaleb’. Ink’a ke’xpaab’ naq Jerusalen taasachmanq.
Laj Nefi kiraj xtawb’al ru li k’a’ru kiril chaq laj Lehi. A’an kitijok re xnawb’al ma us kixb’aanu lix yuwa’ naq ki’el chaq Jerusalen.
Li Jesukristo kirula’ani laj Nefi ut kixye re naq yaal li raatin laj Lehi. Laj Nefi kixpaab’ ut ink’a’ kixpo’resi xch’ool rik’in jo’ chanru ke’xb’aanu laj Laman ut laj Lemuel.
Laj Nefi kixye reheb’ li ras li kiyehe’ re xb’aan li Jesus. Laj Sam kixpaab’ li raatin laj Nefi, a’b’anan laj Laman ut laj Lemuel ink’a’ ke’xpaab’.
Li Qaawa’ kixyeechi’i re laj Nefi naq taa’osob’tesiiq xb’aan lix paab’aal. Taak’eheq choq’ aj taqlanel sa’ xb’eeneb’ li ras.