Chʼol 31
Laj Moroni aj taqlanel naxq’ax ru laj Tzerahemnah
Eb’ laj Nefita ke’raj xk’uulankil chi ach’ab’anb’il lix ch’och’eb’ ut lix junkab’aleb’. Jo’kan ajwi’ ke’raj wank chi ach’ab’anb’il re xloq’oninkil li Dios.
Laj Moroni a’an li najolomink re li teep aj pleet reheb’ laj Nefita. Naq eb’ laj Lamanita ke’chal chi pleetik rik’ineb’, laj Moroni ut eb’ lix teep aj pleet ke’xk’uleb’ sa’ li ch’och’ Jerxon.
Laj Moroni kixkawresiheb’ lix teep aj pleet rik’in k’anjeleb’aal re pleet, li ramleb’, li kolb’a-ib’ aq’ej, ut li pim ruhil t’ikr.
Eb’ laj Lamanita numtajenaq rajlankileb’ lix teep aj pleet, a’b’an ke’xuwak naq ke’ril li kolb’a-ib’ aq’ej reheb’ laj Nefita—eb’ laj Lamanita neke’xk’am b’ab’ay ajwi’ li raq’.
Li teep aj pleet aj Lamanita maak’a’eb’ xch’ool chi pleetik rik’ineb’ lix teep aj pleet laj Moroni. Eb’ laj Lamanita ke’eelelik sa’ li yamyookil ch’och’ ut ke’xk’e xch’ool chixpleetikinkil jalan chik tenamit reheb’ laj Nefita.
Laj Moroni kixtaqlaheb’ laj muqmuukil k’ehol eetal re rilb’aleb’ laj Lamanita. Jo’kan ajwi’, kixpatz’ re laj Alma naq taatijoq chiru li Qaawa’ re tixtenq’aheb’. Li Qaawa’ kixk’ut chiru laj Alma li na’ajej b’ar wi’ te’chalq laj Lamanita.
Naq laj Moroni kixk’ul li resil laj Alma, kixkanab’ jun raqal lix teep aj pleet re xkolb’al rix Jerxon ut xko’o rik’in li jun raqal chik re xk’ulb’aleb’ laj Lamanita.
Eb’ laj pleet re laj Moroni ke’xmuq rib’ sa’ xka’pak’al li nima’ Sidon, ut ke’royb’eni xchapb’aleb’ li teep aj pleet aj Lamanita.
Kitikla li pleet, ut eb’ laj Lamanita ke’xyal xq’axb’al li nima’ re te’eeleliq, a’b’an sa’ junpak’al yookeb’ chi oyb’eniik xb’aaneb’ naab’aleb’ chik laj Nefita.
Ke’pleetik chi numtajenaq xmetz’ew, ut laj Tzerahemnah ut lix teep aj pleet ke’xkamsiheb’ naab’aleb’ laj Nefita. Eb’ laj Nefita ke’xtz’aama chiru li Qaawa’ naq tixtenq’aheb’.
Li Qaawa’ kixk’e xmetz’ew li teep aj pleet reheb’ laj Nefita. Li teep aj pleet kixsutiheb’ rix laj Lamanita, ut laj Moroni kixtaqla xchoyb’al li pleetik.
Laj Moroni kixye re laj Tzerahemnah naq eb’ laj Nefita ink’a’ ke’raj xkamsinkileb’ laj Lamanita chi moko ke’raj xk’amb’aleb’ chi moosil.
Laj Moroni kixye naq eb’ laj Lamanita ink’a’ te’ruuq chixsachb’al lix paab’aaleb’ laj Nefita chirix li Jesukristo. Kixye naq li Dios toj yooq chixtenq’ankileb’ laj Nefita sa’ li pleet a’ yaal jo’ naq tiikaqeb’ chi paab’ank.
Laj Moroni kixtaqla re laj Tzerahemnah naq tixq’axtesi lix k’anjeleb’aal re pleet. Ink’a’ te’kamsiiq laj Lamanita wi te’ok sa’ aatin naq maajo’q’e chik te’pleetiq rik’ineb’ laj Nefita.
Laj Tzerahemnah kixq’axtesi re laj Moroni lix k’anjeleb’aal re pleet, a’b’an ink’a’ kiraj ok sa’ aatin naq ink’a’ taapleetiq. Laj Moroni kixq’ajsiheb’ lix k’anjeleb’aal re pleet re naq eb’ laj Lamanita te’ruuq chixkolb’al rib’.
Laj Tzerahemnah kixkut rib’ sa’ xb’een laj Moroni re xkamsinkil, a’b’an jun reheb’ laj pleet aj Nefita kixsak’ lix yok’leb’ ch’iich’ laj Tzerahemnah ut kixtoq.
Toja’ ut naq laj pleet kixch’ot xtz’uumal xjolom laj Tzerahemnah, kixk’ojob’ sa’ ru’uj lix yok’leb’ ch’iich’, ut kixtaqsi sa’ iq’.
A’an kixye reheb’ naq eb’ laj Lamanita te’t’ane’q jo’ kit’ane sa’ li ch’och’ lix tz’uumal jolomej a’in, wi ink’a’ te’xq’axtesi lix k’anjeleb’aal re pleet ut te’xye naq maajun wa chik te’pleetiq.
Naab’aleb’ laj Lamanita ke’xkanab’ lix k’anjeleb’aal re pleet chi roq laj Moroni ut ke’ok sa’ aatin naq ink’a’ te’pleetiq. Ke’kanab’aak chi xik.
Laj Tzerahemnah kichal xjosq’il chi numtajenaq, ut kireek’asiheb’ li jun siir chik reheb’ laj pleet chi pleetik. Eb’ laj pleet re laj Moroni ke’xkamsi naab’al reheb’.
Naq laj Tzerahemnah kiril naq a’an ut eb’ li rochb’een okeb’ re chi sache’k chixjunileb’, kixtz’aama chiru laj Moroni naq ink’a’ tixkamsiheb’. Ki’ok sa’ aatin naq maajun wa chik taachalq chi pleetik rik’ineb’ laj Nefita.
Laj Moroni kixxaqab’ li pleetik ut kixchapeb’ li k’anjeleb’aal re pleet reheb’ laj Lamanita. Chirix naq ke’ok sa’ aatin naq ink’a’ chik te’pleetiq, eb’ laj Lamanita xkoheb’.