Chʼol 27
Laj Korihor
Jun winq laj Korihor xk’ab’a’ kiwulak sa’ li ch’och’ Tzarahemla. A’an ink’a’ naxpaab’ li Jesukristo ut ki’ok chixjultikankil naq li k’a’ru ke’xye chaq eb’ li profeet chirix li Kolonel moko yaal ta.
Laj Korihor kixye reheb’ li tenamit naq maak’a’eb’ xna’leb’ xb’aan naq neke’xpaab’ naq li Jesus taachalq sa’ li ch’och’ ut tixnumsi li rahilal xb’aan lix maakeb’.
Kixye naq eb’ li tenamit moko naru ta naq te’k’ehe’q chixtojb’al lix maakeb’ xb’aan naq maak’a’ li yu’am chirix li kamk. Naab’aleb’ ke’xpaab’ li raatin laj Korihor. Ke’ok jo’ aj maakeb’.
Laj Korihor kixyal jultikank aatin chiru lix tenamit laj Ammon, a’b’an ink’a’ ke’raj rab’inkil. Ke’xb’ak’ ut ke’xk’am chaq chiru laj Ammon, ut a’an kixtaqla risinkil chaq sa’ li tenamit.
Laj Korihor xko’o sa’ li ch’och’ Gideon, a’b’an li tenamit aran ink’a’ ajwi’ ke’raj rab’inkil. Li xb’eenil aj raqol aatin kixtaqla rik’in laj Alma.
Laj Alma kixpatz’ re laj Korihor ma naxpaab’ naq wan jun li Dios. Laj Korihor kichaq’ok ut kixye naq ink’a’ naxpaab’. Laj Alma kixch’olob’ xyaalal naq wan jun li Dios ut naq taachalq li Kristo.
Laj Korihor kiraj naq laj Alma tixb’aanu jun li sachb’a-ch’oolej re xk’utb’al xyaalal naq wan jun li Dios. Laj Korihor kixye naq tixpaab’ li Dios wi taaril jun reetalil lix wankil li Dios.
Laj Alma kixye re laj Korihor naq ak naab’al eetalil rilom chaq chirix lix wankil li Dios sa’eb’ li loq’laj hu ut lix ch’olob’ahomeb’ chixjunileb’ li profeet.
Laj Alma kixye naq li ch’och’ ut chixjunil li k’a’aq re ru wan chi sa’, jo’kan ajwi’ li t’ort’ookil chahim li neke’b’eek sa’ li choxa, a’aneb’ ajwi’ reetalil naq wan jun li Dios.
Laj Korihor toj kixye naq ink’a’ naxpaab’. Laj Alma kiraho’ xch’ool xb’aan xmaa’usilal laj Korihor, ut kixye re naq naru taasache’q li raam.
Laj Korihor toj yoo chixpatz’b’al jun eetalil b’ar wi’ taak’utmanq xyaalal naq wan jun li Dios. Laj Alma kixye naq li eetalil tixk’e li Dios a’an naq laj Korihor ink’a’ taaruuq chik chi aatinak.
Chirix naq laj Alma kixye li aatin a’in, laj Korihor ink’a’ chik kiru chi aatinak.
Laj Korihor kixtz’iib’a naq naxnaw naq li eetalil a’an re li Dios ut naq junelik kixnaw naq wan jun li Dios. Kixtz’aama re laj Alma naq taatijoq re naq taa’isiiq chaq li majewank sa’ xb’een.
Laj Alma kixnaw naq wi laj Korihor taa’aatinaq wi’chik, taa’ok wi’chik chi tik’ti’ik chiru li tenamit. Laj Alma kixye naq a’ yaal re li Qaawa’ ma taa’aatinaq wi’chik laj Korihor.
Li Qaawa’ moko kixk’e ta chi aatinak wi’chik laj Korihor. Laj Korihor kib’eek sa’ li junjunq chi ochoch re xtz’aamankil xtib’el xwa.
Li xb’eenil aj raqol aatin kixtaqla xjek’inkil jun esil sa’ chixjunil li ch’och’ re xyeeb’al k’a’ru kixk’ul chaq laj Korihor. Kixye reheb’ li ke’paab’ank re li raatin laj Korihor naq te’xjal xk’a’uxl. Eb’ li tenamit ke’xjal xk’a’uxl.
Laj Korihor xko’o sa’ xyanqeb’ laj Tzoramita. Sa’ jun kutan, naq yoo chixtz’aamankil xtzakemq, ke’xyeq’i toj reetal naq kikam.