Chʼol 39
Laj Nefi naxk’ul nimla wankilal
Li Qaawa’ ki’aatinak rik’in laj Nefi ut kixnima ru xb’aan naq ki’ab’in chiru, ut kik’anjelak chi anchal lix ch’ool re xk’utb’al li evangelio.
Kik’ehe’ re laj Nefi li wankilal re xb’aanunkil yalaq k’a’ru. Li Qaawa’ kixnaw naq a’an taaroksi li wankilal a’in sa’ tiikilal.
Li Qaawa’ kixye re laj Nefi naq tixye reheb’ laj Nefita naq wi ink’a te’xjal xk’a’uxl, te’sache’q. Laj Nefi xko’o sa’ junpaat chixyeeb’al reheb’ li tenamit.
Eb’ laj Nefita ink’a ke’xpaab’ laj Nefi. Ke’xyal xtz’apb’al sa’ tz’alam, a’b’an lix wankil li Dios kixkol rix.
Laj Nefi kixch’olob’ li raatin li Dios chiru chixjunileb’ laj Nefita.
A’b’an eb’ li tenamit k’a’jo’ naq ke’niman sa’ lix maa’usilal ut ke’ok chixpleetinkil rib’ chirib’il rib’.
Laj Nefi kitijok re naq taawanq jun we’ej, kixk’oxla naq te’tuulanob’resiiq laj Nefita wi maak’a’ li tzakemq, ut tixtenq’aheb’ chixjalb’aleb’ xk’a’uxl.
Kichal li we’ej. Moko kiwan ta li hab’, jo’kan naq kichaqik li ch’och’, ut ink’a’ ke’ru chi k’iik li awimq. Eb’ li tenamit ke’xkanab’ li pleetik.
Eb’ laj Nefita ke’chal xtz’okajik ut naab’aleb’ ke’kam. Eb’ li ke’kana chi yo’yo ke’ok chixk’oxlankil li Qaawa’ ut li k’a’ru kixk’ut chaq laj Nefi chiruheb’.
Eb’ li tenamit ke’xjal xk’a’uxl chirix lix maak ut ke’xtz’aama chiruheb’ laj raqol aatin naq te’xye re laj Nefi naq tixk’e xraqik li we’ej. Eb’ laj raqol aatin xkoheb’ rik’in laj Nefi.
Naq kiril laj Nefi naq eb’ li tenamit ak ke’xtuulanob’resi rib’ ut ke’xjal xk’a’uxleb’, kixpatz’ re li Qaawa’ naq tixk’e xraqik li we’ej.
Li Qaawa’ kixsume lix tij laj Nefi ut kichal li hab’. Sa’ junpaat ke’ok wi’chik chi nimank li awimq. Eb’ li tenamit ke’xnima xloq’al li Dios ut ke’xnaw naq laj Nefi a’an jun nimla profeet.
Lix k’ihaleb’ laj Nefita ke’xjunaji rib’ rik’in li Iglees. Ke’b’ihomo’ ut ke’niman lix tenamiteb’. Kiwan li tuqtuukilal sa’ li ch’och’.
Moqon, junjunqeb’ laj Nefita li junxilaj ke’xjunaji rib’ rik’ineb’ laj Lamanita ke’ok chixpleetinkileb’ laj Nefita.
Eb’ laj Nefita ke’xyal xq’e chixq’axb’aleb’ ru li xik’ neke’ilok reheb’, a’aneb’ li ke’xjal rib’ choq’ aj elq’ re laj Gadianton, a’b’an ink’a’ ke’ru chixb’aanunkil, xb’aan naq eb’ a’an okenaqeb’ ajwi’ choq’ aj maak.
Naq tiikeb’ xch’ool laj Nefita, li Qaawa’ kirosob’tesiheb’. Naq ke’xq’etq’eti rib’ ut kisach sa’ xch’ooleb’ li Qaawa’, a’an kixtaqlaheb’ li ch’a’ajkilal re xtenq’ankileb’ chixk’oxlankil a’an.