Chʼol 30
Laj Alma naxk’e xna’leb’eb’ li ralal
Laj Alma ra xch’ool naq kiril chan ru naq okenaqeb’ laj Nefita sa’ li maa’usilal. Ki’aatinak rik’in li junjunq reheb’ li ralal chirix chan ru naq te’wanq sa’ tiikilal.
Laj Alma kixye re laj Helaman, li ralal asb’ej, naq tixkanab’ rib’ chiru li Dios. Kixye re resil li anjel kixtaqla chaq li Dios re xyeeb’al re laj Alma naq tixkanab’ xsachb’al li Iglees.
Laj Alma kixnumsi chaq rahilal chiru oxib’ kutan xb’aan xmaak. Toja’ naq kijultiko’ re li raatin lix yuwa’ chirix li Jesus, ut kixnaw naq taaruuq taakuye’q xmaak.
Laj Alma kixtz’aama xkuyb’al lix maak, ut ki’ok li sahilal sa’ raam ruuchil li rahilal. Kikuye’ xmaak xb’aan lix paab’aal chirix li Jesukristo ut xb’aan naq kixjal xk’a’uxl.
Chalen chaq a’an, laj Alma kixk’ut li evangelio reheb’ li ras riitz’in re naq te’ruuq chireek’ankil li sahil ch’oolejil kireek’a chaq a’an. Li Dios kirosob’tesi laj Alma xb’aan xkanab’ankil rib’ chiru li Dios.
Laj Alma kixk’e re laj Helaman li loq’laj tz’iib’anb’il hu ut kixye re naq ink’a’ tixkanab’ xtz’iib’ankil li resil lix tenamit.
Laj Alma kixye re naq wi tixpaab’eb’ li taqlahom, li Dios taarosob’tesi ut tixtenq’a re xkolb’aleb’ rix li tz’iib’anb’il hu.
Laj Alma kixye ajwi’ re laj Helaman naq taatijoq rajlal eq’la ut rajlal q’ojyin, ut naq taa’aatinaq rik’in li Dios chirix chixjunil li tixb’aanu re naq li Dios taaruuq chixb’eresinkil.
K’a’jo’ xsahil xch’ool laj Alma chirix laj Xiblon, li ralal, xb’aan xkawil xch’ool jo’ misioneer sa’ xyanqeb’ laj Tzoramita. Laj Xiblon kiwan chi tiik chi paab’ank us ta ke’xkuti chi pek.
Laj Alma kixjultika re laj Xiblon naq li junaj b’e taaruuq taakole’q wi’, a’an li Jesukristo. Toja’ naq laj Alma kixwaklesi xch’ool li ralal re naq ink’a’ tixkanab’ xk’utb’al li evangelio.
Laj Korianton, ralal laj Alma, ink’a’ kixpaab’eb’ lix taqlahom li Qaawa’. Moko kiwan ta chi tiik lix paab’aal jo’ misioneer naq yoo chitzolb’aleb’ laj Tzoramita.
Sa’ xk’ab’a’ li kixb’aanu laj Korianton, eb’ laj Tzoramita ink’a’ ke’xpaab’ li raatin laj Alma.
Laj Alma kixye re laj Korianton naq eb’ li winq ink’a’ neke’ru chixmuqb’al lix maak chiru li Dios, ut naq laj Korianton tento naq tixjal xk’a’uxl.
Laj Alma kixk’ut chiru li ralal naq chixjunileb’ te’wakliiq chi yo’yo, a’b’an ka’ajwi’ li tiikeb’ xch’ool te’wanq rik’in li Dios.
Laj Alma kixye naq li yu’am a’in, a’an li kutan re naq eb’ li winq te’xjal xk’a’uxl ut te’k’anjelaq chiru li Dios.
Laj Alma kixjultika re laj Korianton naq a’an b’oqb’il jo’ misioneer, ut kixye re naq taasutq’iiq chaq rik’ineb laj Tzoramita ut tixjultika li jalb’a-k’a’uxlej chiruheb’.
Laj Alma ut eb’ li ralal ink’a’ ke’xkanab’ xjultikankil li evangelio. Ke’k’utuk rik’in lix wankil li tijonelil.