Chʼol 35
Laj Moroni aj taqlanel ut laj Pahoran
Laj Moroni kisaho’ xch’ool chirab’inkil naq laj Helaman ut lix teep aj pleet ke’xchap wi’chik naab’al lix ch’och’eb’ laj Nefita li ke’xmaq’ chaq laj Lamanita.
A’b’an laj Helaman ut lix teep aj pleet ke’raj ru tenq’aak. Moko tz’aqaleb’ ta laj pleet re xkolb’al rix xk’ihaleb’ li tenamit.
Laj Moroni kixtz’iib’a jun li hu re laj Pahoran, li xb’eenil aj raqol aatin ut aj jolominel sa’ xb’een li ch’och’. A’an kixpatz’ re laj Pahoran naq tixtaqla xkomon chik aj pleet re xtenq’ankileb’ lix teep aj pleet laj Helaman.
Eb’ laj Lamanita ke’xpleeti jun tenamit reheb’ laj Nefita li ak kixchap wi’chik laj Helaman. Ke’xkamsi naab’al reheb’ laj Nefita ut ke’ralinasi chaq li junjunq sa’ li tenamit.
Laj Moroni kichal xjosq’il rik’ineb’ laj jolominel re li tenamit xb’aan naq ink’a’ ke’xtaqla chaq xtenq’ankileb’, ut kixtz’iib’a jun chik li hu re laj Pahoran.
Laj Moroni kixtz’iib’a naq naab’aleb’ ke’kamsiik xb’aan naq laj Pahoran moko kixtaqla ta xkomon chik laj pleet.
Wi laj Pahoran ink’a’ tixtaqlaheb’ li winq ut li tzakemq sa’ junpaat, laj Moroni taaxik rochb’een lix teep aj pleet sa’ Tzarahemla ut tixchap li k’a’ru taak’anjelaq reheb’ lix teep aj pleet.
Tikto, laj Moroni kixk’ul jun li hu taqlanb’il xb’aan laj Pahoran. A’an ra lix ch’ool naq laj Moroni ut eb’ lix teep aj pleet yookeb’ chixnumsinkil li ch’a’ajkilal.
Laj Pahoran kixye re laj Moroni naq jun ch’uut aj maakeb’ aj Nefita li ke’xk’ab’a’i rib’ li rey aj winq moko ke’raj ta naq a’an taawanq choq xb’eenil aj raqol aatin. Eb’ a’an ke’xmin ru laj Pahoran ut eb’ li neke’taaqen re chi elk chaq Tzarahemla.
Laj Pahoran kixye ajwi’ naq yoo chixch’utub’ankil jun teep aj pleet re te’xsik’ xchapb’al wi’chik li tenamit Tzarahemla.
Eb’ li rey aj winq ke’xxaqab’ jun rey sa’ xb’eeneb’ ut ke’xjunaji rib’ rik’ineb’ laj Lamanita.
Laj Pahoran moko wan ta xjosq’il xb’aan li k’a’ru kixtz’iib’a laj Moroni. A’an ajwi’ kiraj naq taakanaaq li ach’ab’aak wankeb’ wi’ laj Nefita.
A’an kixpatz’ re laj Moroni naq tixk’am junjunq li winq re xtenq’ankil, ut kixye ajwi’ naq wi laj Moroni tixch’utub’ xkomon chik li winq sa’ li b’e, li teep aj pleet chi ch’utub’anb’il taaruuq tixchap wi’chik li tenamit Tzarahemla.
Laj Moroni kisaho’ xch’ool naq laj Pahoran toj tiik xch’ool chirix lix tenamit ut naq toj kiraj li ach’ab’aak choq’ re lix tenamit.
Rochb’een junjunqeb’ li winq, laj Moroni xko’o chixk’ulb’al laj Pahoran. A’an kixk’am li eetalil re ach’ab’aak, ut sa’ li b’e mileb’ chi winq ke’xjunaji rib’ rik’ineb’.
Eb’ li teep aj pleet re laj Moroni ut re laj Pahoran xkoheb’ chixpleetinkileb’ laj Tzarahemla. Ke’xkamsi li rey reheb’ laj Nefita aj maak, ut ke’xchapeb’ laj taaqenel re.
Chirix a’an, laj Moroni kixtaqla li tzakemq ut kab’laju mil chi aj pleet re xtenq’ankileb’ li teep aj pleet reheb’ laj Nefita. Eb’ li teep aj pleet a’in ke’ralinasiheb’ chaq laj Lamanita, ut kiwan wi’chik li tuqtuukilal sa’ li ch’och’.