Chʼol 16
Na’eelelik li rey aj Limhi ut lix tenamit
Eb’ laj Lamanita ke’xchap choq’ preex naab’al laj Nefita li ink’a’ ke’eelelik rochb’een li rey aj Noe. Eb’ laj Lamanita ke’xk’ameb’ ut ke’xk’e li ch’och’ reheb’, a’b’an ke’xk’e chixtojeb’ li rahil tojleb’.
Eb’ laj Nefita ke’xxaqab’ laj Limhi choq’ x’ak’ reyeb’. Laj Limhi a’an ralal li rey aj Noe, a’b’an moko aj maak ta jo’ lix yuwa’. A’an chaab’il winq.
Li rey aj Limhi kixyal wank sa’ tuqtuukilal rik’ineb’ laj Lamanita, a’b’an ink’a’ ke’xkanab’ xk’aak’alenkileb’ laj Nefita ut xrahob’tesinkileb’.
Sa’ jun li kutan, li rey aj Limhi kirileb’ junjunq li winq moko nawb’ileb’ ta ru chirix li tenamit. Kixtaqla naq te’tz’ape’q sa’ tz’alam. Eb’ li ink’a’ nawb’il ru a’aneb’ laj Nefita li ke’chal chaq Tzarahemla.
Aj k’amol b’e reheb’ a’an laj Ammon. Li rey aj Limhi kisaho’ xch’ool chi numtajenaq naq kiril. Kixnaw naq laj Ammon taaruq chixtenq’ankil lix tenamit chi eelelik chiruheb’ laj Lamanita.
Li rey aj Limhi kixch’utub’ lix tenamit. Kixjultika reheb’ naq sa’ xk’ab’a’ lix maa’usilaleb’ naq wankeb’ chi moosil chiruheb’ laj Lamanita.
Kixye reheb’ naq te’xjal xk’a’uxl, te’xkanab’ rib’ chiru li Dios, ut te’xpaab’ lix taqlahom. Toja’ naq li Dios tixtenq’aheb’ chi eelelik.
Eb’ laj Nefita ke’xnaw naq eb’ laj Lamanita li neke’xk’aak’ale li tenamit, rajlal q’ojyin neke’wan chi kalajenaq.
Sa’ li q’oyjin a’an, li rey aj Limhi kixtaqla chik xkomon li viin reheb’ laj k’aak’alenel jo’ jun maatan.
Li rey aj Limhi ut lix tenamit ke’ru chi nume’k wankeb’ wi’ laj k’aak’alenel chi kalajenaq, ut chi eelelik.
Laj Ammon kixk’am xb’e li rey aj Limhi ut lix tenamit chiru li yamyookil ch’och’ toj sa’ li ch’och’ Tzarahemla, b’ar wi’ ke’k’ule’ rik’in sahil ch’oolejil.