Chʼol 20
Laj Alma ut laj Nehor
Naq toj maji’ nakam li rey aj Mosiah, eb’ laj Nefita ke’xsik’eb’ ru aj raqol aatin chi taqlank sa’ xb’eeneb’. Laj Alma li alalb’ej kixaqab’aak re taawanq xb’een wa choq’ xb’eenil aj raqol aatin. A’an ajwi’ aj jolominel re li Iglees.
Jun winq nim xxaqam ut kaw xmetz’ew, aj Nehor xk’ab’a’, ki’ok chixk’utb’al li tik’ti’. Kixye naq chixjunileb’ te’kole’q, maak’a’ naxye ma useb’ malaj ink’a’ useb’. Naab’al ke’paab’ank re laj Nehor.
Laj Nehor ki’aatinak re xsachb’al xwankil lix Iglees li Dios, a’b’an jun li winq tiik xch’ool, laj Gideon xk’ab’a’, ki’aatinak re xkolb’al rix. Laj Nehor kixwech’i rix laj Gideon, a’b’an laj Gideon ki’aatinak rik’in li raatin li Dios.
Laj Nehor kijosq’o’ ut kixb’otz’ lix yok’leb’ ch’iich’ ut kixkamsi laj Gideon.
Laj Nehor kik’ame’ chiru laj Alma re taaraqe’q aatin chirix. Laj Nehor ki’aatinak re xkolb’al rib’ chi kaw xch’ool.
A’b’an laj Alma kixye naq laj Nehor wan xmaak xb’aan naq kixk’ut chiruheb’ li tenamit naq te’wanq sa’ maa’usilal, ut kixkamsi laj Gideon.
Laj Alma kixye naq tento taak’eemanq tojb’a-maak sa’ xb’een laj Nehor xb’aan naq kixkamsi laj Gideon. Jo’ chanru li chaq’rab’, tento taakamq laj Nehor.
Laj Nehor kik’ame’ sa’ xb’een jun li tzuul li wan chi nach’, ut kikamsiik. Naj toj maji’ nakam, kixye naq chixjunil li k’a’ru kixk’ut chaq moko yaal ta. A’b’an naab’aleb’ li tenamit toj neke’xpaab’ lix maa’us aj na’leb’ laj Nehor.
Eb’ a’an neke’xra li b’ihomal ut ink’a’ neke’ab’in chiruheb’ lix taqlahom li Dios. Ke’reetz’uheb’ li wankeb’ sa’ li Iglees ut kewech’ok ut kepleetik rik’ineb’.
Eb’ li tiikeb’ xch’ool toj ke’ab’in chiruheb’ lix taqlahom li Dios ut ink’a’ ke’wech’ok us ta ke’rahob’tesiik xb’aaneb’ li neke’taaqenk re laj Nehor.
Eb’ li wankeb’ sa’ li Iglees ke’xwotz chixjunil li k’a’ru reheb’ rik’ineb’ li neb’a’ ut ke’xch’olaniheb’ li yaj. Ke’ab’in chiruheb’ li taqlahom, ut li Dios kirosob’tesiheb’.