Chʼol 41
Eb’ li reetalil lix yo’lajik li Kristo
Laj Nefi, ralal laj Helaman, kixq’axtesiheb’ li loq’laj tz’iib’anb’il esil ut eb’ li loq’laj hu re laj Nefi, li ralal asb’ej.
Eb’ laj Nefita ke’rileb’ li ninqi eetalil ut eb’ li sachb’a-ch’oolej li ke’xye chaq li profeet naq te’k’ulmanq rub’elaj lix yo’lajik li Jesukristo.
A’b’an ke’wan junjunq laj Nefita li ke’ok chixyeeb’al naq ak numenaq li kutan taayo’laaq wi’ li Jesus. Ke’reetz’uheb’ li ani toj neke’xpaab’ lix profeetil aatin laj Samuel aj Lamanita.
Eb’ li ani ke’paab’an re li Jesukristo ut eb’ li profeet ke’ok chi raho’k xch’ool naq ke’xk’oxla naq maare k’a’ruhaq tixram xtz’aqlojikeb’ ru li profeetil aatin.
Eb’ li tenemit ke’royb’eni chi tiik li q’ojyin naq maak’a’aq li aak’ab’, a’anaq reetalil naq xyo’la li Jesukristo.
Eb’ li ink’a’ ke’paab’an re li Jesukristo ke’xxaqab’ jun kutan te’kamsiiq wi’ laj paab’anel wi ink’a’ taak’ulmanq li eetalil.
Laj Nefi kiraho’ xch’ool xb’aan lix maa’usilaleb’ li ani ink’a’ ke’paab’an chirix li Kolonel.
Laj Nefi kitijok chixjunil li kutan choq’ reheb’ li okeb’ re chi kamsiik.
Li Qaawa’ kixk’ojob’ xch’ool laj Nefi ut kixye re naq sa’ li q’ojyin a’an moko taawanq ta aak’ab’. Li Jesus taayo’laaq wulajaq chik aran Belen.
Sa’ li q’ojyin a’an ki’kub’e li saq’e, a’b’an moko kiwan ta aak’ab’. Ak xchal li reetalil lix yo’lajik li Jesukristo. Eb’ li tenamit ke’sach xch’ool.
Eb’ li ke’xk’oxla xkamsinkileb’ laj paab’anel ke’t’ane’ chi ch’och’ chanchan naq kamenaqeb’.
Ke’chal xxiw xb’aan naq aj maakeb’. Anajwan ke’xnaw chik naq li Kolonel taayo’laaq ut naq yaal li raatineb’ li profeet.
Kiwan kutan chiru chixjunil li q’ojyin. Ut naq ki’el wi’chik li saq’e eq’la, li tenamit ke’xnaw naq sa’ li kutan a’an taayo’laaq li Jesukristo. Eb’ li profeetil aatin ak ke’tz’aqlok ru.
Sa’ li choxa kik’utun jun ak’ chahim, jo’ chanru ke’xye chaq li profeet.
Laj Satanas toj kixyal xq’e re naq eb’ li tenamit ink’a’ te’xpaab’eb’ li eetalil ke’ril, a’b’an lix k’ihaleb’ ke’paab’an.
Laj Nefi ut xkomoneb’ aj k’amol b’e re li Iglees ke’xkub’siheb’ xha’ chixjunileb’ li ke’paab’an ut ke’xjal xk’a’uxl.
Kiwan li sahil esilal sa’ li ch’och’ xb’aan naq li raatineb’ li profeet ak ke’tz’aqlok ru. Ak xyo’la li Jesukristo.