Chʼol 8
Xq’axb’al li palaw
Li Qaawa’ kixye re laj Lehi naq taa’ok rochb’een lix junkab’al sa’ li jukub’ li ke’xyiib’ chaq Ke’xnujob’resi rik’in ru li che’, tib’, xya’al kab’ ut iyaj li te’raw sa’ li yeechi’inb’il ch’och’.
Eb’ li kawil iq’ ke’xtiikisi li jukub’ sa’ xjayal li yeechi’inb’il ch’och’.
Laj Laman, laj Lemuel, ut junjunq chik reheb’ ke’ok chixb’aanunkil li maa’usilal. Naq laj Nefi kixye reheb’ naq te’xkanab’, ke’josq’o’ rik’in ut ke’xb’ak’ rik’in k’aam.
Li Liahona kixkanab’ k’anjelak xmaak lix maa’usilaleb’. Ink’a’ ke’xnaw b’ar te’xb’eresi li jukub’. Jun li xuwajel kaq-sut-iq’ kixtiikisi li jukub’ chi q’ajel-ix chiru xnumik oxib’ kutan.
Laj Lehi kixye re laj Laman ut laj Lemuel naq te’rach’ab’ laj Nefi, a’b’an ink’a ke’ab’in. Laj Lehi ut li xSariah k’a’jo’ naq ke’raho’ xch’ool ut ke’yajer.
Li rixaqil ut li ralal xk’ajol laj Nefi ke’yaab’ak. Ke’xtz’aama chiru laj Laman ut laj Lemuel naq te’rach’ab’ laj Nefi, a’b’an ink’a’ ke’raj.
Sa’ xkaa li kutan, ki’ok chi nimank xrahil li kaq-sut-iq’. Li jukub’ ak ok re chi sub’e’k.
Laj Laman ut laj Lemuel ke’xnaw naq li Dios kixtaqla chaq li kaq-sut-iq’. Ke’xuwak maare anchal te’ok chi ha’.
Laj Laman ut laj Lemuel ke’xjal xk’a’uxl ut ke’xhit laj Nefi. Us ta kisipo xkux li ruq’ ut xkux li roq xb’aan li k’aam, laj Nefi ink’a kiwech’ink.
Laj Nefi kixchap li Liahona ut ki’ok wi’chik chi k’anjelak. Laj Nefi kitijok ut kiraqe’ li iq’. Li palaw kich’ana.
Laj Nefi kixb’eresi li jukub’ ut kib’eek wi’chik chiru ha’ sa’ xjayal li yeechi’inb’il ch’och’.