Chʼol 51
Eb’ laj Jaredita neke’b’eek toj sa’ li yeechi’inb’il ch’och’
Naq ke’wan laj Jaredita chire li palaw, li ras laj Jared kixkanab’ tijok. Li Qaawa’ kichal sa’ jun choql re xyeeb’al re naq tixjal xk’a’uxl.
Li ras laj Jared kixjal xk’a’uxl ut kitijok. Li Qaawa’ kixkuy xmaak li ras laj Jared ut kixye re naq ink’a’ chik taamaakob’q.
Li Qaawa’ kixye re li ras laj Jared naq tixyiib’ li k’amonel jukub’ re xk’amb’aleb’ lix tenamit toj sa’ li yeech’inb’il ch’och’.
Li Qaawa’ kixye re li ras laj Jared chan ru xyiib’ankileb’ li k’amonel jukub’.
Eb’ li k’amonel jukub’ q’axal tz’aptz’ookeb’ ru, jo’kan naq li ha’ ink’a’ naru chi ok.
Li ras laj Jared kiraj xnawb’al chan ru naq te’xtaw li iq’ re te’xmusiq’a sa’eb’ li k’amonel jukub’. Kixpatz’ re li Qaawa’ k’a’ru tixb’aanu.
Li Qaawa’ kixye re naq tixyiib’ jun k’ob’olal sa’ xb’een ut jun chik rub’el sa’ li junjunq chi k’amonel jukub’. Te’ruuq chixteeb’al li k’ob’olal re naq taa’ok li iq’, ut chixtz’apb’al re naq ink’a’ taa’ok li ha’.
Li ras laj Jared kixye re li Qaawa’ naq eb’ li k’amonel jukub’ q’ojyin ru chi sa’. Li Qaawa kixye re naq tixk’oxla chan ru naq taaruuq taawanq saqen sa’eb’ li k’amonel jukub’.
Li saqen choq’ reheb’ li k’amonel jukub’ moko naru ta naq taawanq rik’in li xam ut moko naru ta te’wanq li ilob’aal, xb’aan naq te’jore’q.
Li ras laj Jared kitaqe’ sa’ xb’een jun li tzuul ut rik’in jun pek kixyiib’ waqlaju chi kok’ pek. Eb’ li pek chanchan saq ruhil lem. A’an kixyiib’ wiib’ chi pek choq’ re li junjunq reheb’ li waqxaqib’ chi k’amonel jukub’.
Li ras laj Jared kixk’ameb’ li pek sa’ xb’een li tzuul. Aran kitijok chiru li Qaawa.
Li ras laj Jared kixpatz’ re li Qaawa’ naq tixch’e’eb’ li pek re naq taawanq saqen sa’eb’ li k’amonel jukub’.
Li Qaawa’ kixch’e’ li junjunq chi pek rik’in li ru’uj ruq’.
Xb’aan naq nim xpaab’aal li ras laj Jared, kiril li ru’uj ruq’ li Qaawa’. Kik’utun chanchan ru’uj ruq’ junaq winq.
Toja’ ut naq li Qaawa’ kixk’ut rib’ chiru li ras laj Jared.
Li Jesus kixye naq eb’ li ani te’paab’anq re te’wanq xyu’am chi junelik.
Li Jesus kixk’ut naab’al li k’a’aq re ru chiru li ras laj Jared. Li Jesus kixye re naq tixtz’iib’a li k’a’ru kiril ut kirab’i.
Li ras laj Jared kixk’ameb’ chaq li pek sa’ xb’een li tzuul. Kixk’e jun pek sa’ xka’pak’alil li ru’uj li junjunq chi k’amonel jukub’. Ke’xk’e saqen sa’eb’ li k’amonel jukub’.
Eb’ laj Jaredita ke’ok sa’eb’ li k’amonel jukub’ rik’ineb’ lix ketomq ut lix tzakemq. Li Qaawa’ kixtaqla jun kawil iq’ re rapusinkileb’ li k’amonel jukub’ sa’ xjayal li yeechi’inb’il ch’och’.
Li Qaawa’ kixkoleb’ rix sa’ xyi li palaw. Ke’xb’antioxi re li Qaawa’ ut ke’b’ichan re xnimankil ru.
Chirix xnumik oxib’ cient rik’in kaahib’ roxk’aal kutan chiru li ha’, eb’ li k’amonel jukub’ ke’wulak sa’ xmaril li yeechi’inb’il ch’och’.
Naq eb’ laj Jaredita ke’el chaq sa’eb’ li k’amonel jukub’, ke’wiq’la chi ch’och’ ut ke’el xya’aleb’ ru xb’aan xsahileb’ xch’ool.
Eb’ laj Jaredita ke’xkab’la rochocheb’ ut ke’raw li iyaj sa’ li yeechi’inb’il ch’och’. Ke’xk’ut chiruheb’ li ralal xk’ajol naq te’ab’inq chiru li Qaawa’ ut te’xpaab’ li raatin.