Chʼol 47
Li Jesukristo narosob’tesiheb’ lix tzolom
Sa’ jun li kutan, naq eb’ li tzolom ch’utch’uukeb’ chi kuyuk sa’ ut chi tijok, li Jesukristo kixk’ut rib’ chiruheb’.
Eb’ li tzolom ke’xpatz’ re k’a’ru te’xk’e choq’ xk’ab’a’ li Iglees. Li Jesus kixye naq taak’ab’a’iiq rik’in lix k’ab’a’ xb’aan naq a’an lix Iglees.
Li Jesus kixch’olob’ chiruheb’ lix tzolom naq lix Choxahil Yuwa’ kixtaqla chaq sa’ li ruchich’och’ re xq’axtesinkil xyu’am choq’ reheb’ chixjunil li tenamit.
A’an kixye naq chixjunileb’ li neke’xjal xk’a’uxl, neke’kub’e xha’ sa’ lix k’ab’a’, ut neke’xpaab’ lix taqlahom te’tawmanq chi maak’a’eb’ xmaak chiru li qaChoxahil Yuwa’.
Li Kolonel kixye reheb’ lix tzolom naq te’xb’aanu li k’a’aq re ru ke’ril chixb’aanunkil a’an. A’an kixk’ut chaq rik’in xb’aanuhom li k’a’ru tento taab’aanumanq.
Jo’kan ajwi’ kixye reheb’ naq te’xtz’iib’a li k’a’ru ke’ril ut ke’rab’i re naq xkomoneb’ chik li tenamit te’xnaw chirix a’in.
Li Jesus kixpatz’ reheb’ lix tzolom li k’a’ raj ru neke’raj rik’in. B’eleb’ reheb’ ke’raj wank rik’in a’an chirix naq te’raqe’q lix yu’am sa’ li ruchich’och’.
Li Jesus kixye reheb’ naq kab’laju xkaak’al chihab’ taawanq reheb’, te’xik rik’in a’an sa’ choxa.
Eb’ li oxib’ chik tzolom moko kichal ta xch’ooleb’ xyeeb’al re li k’a’ru ke’raj, a’b’an li Jesus ak kixnaw. Eb’ a’an ke’raj kanaak sa’ li ruchich’och’ ut xjultikankil li evangelio toj reetal naq taasutq’iiq wi’chik chaq li Jesus.
Li Kolonel kixye reheb’ naq moko te’reek’a ta li rahilal chi moko li rahil ch’oolej, ut naq ink’a te’kamq. Eb’ a’an te’xk’ut li evangelio chiruheb’ li tenamit toj reetal naq a’an taasutq’iiq chaq.
Li Jesus kixch’e’ li junjunq reheb’ li tzolom, ka’ajwi’ li oxib’ ink’a’, li toj te’kanaaq sa’ li ruchich’och’. Toja’ ut naq xko’o.
Li oxib’ chi tzolom ke’k’ame sa’ choxa’, b’ar wi’ ke’ril ut ke’rab’i k’iila sachb’a-ch’oolejil na’leb’. Eb’ a’an q’axal us wi’chik naq ke’ru chixtawb’al ru li k’a’aq re ru re li Dios.
Ke’jale’ ru lix tib’eleb’ re naq ink’a’ te’kamq.
Li oxib’ chi tzolom ke’sutq’i sa’ li ruchich’och’ ut ke’ok chi jultikank aatin ut kub’sink ha’.
Eb’ laj Nefita aj maak ke’xk’eheb’ li oxib’ chi tzolom sa’ tz’alam ut sa’eb’ li chamal jul, a’b’an lix wankil li Dios kixtenq’aheb’ chi elk chaq.
Naq ke’kute’ sa’eb’ li k’atleb’aal ut sa’ rochocheb’ li josq’ aj xul, jo’kan ajwi’ ke’kole’ xb’aan lix wankil li Dios.
Eb’ li oxib’ chi tzolom ke’xjultika lix evangelio li Jesukristo chiruheb’ laj Nefita. Toj yookeb’ chixjultikankil lix evangelio.