Chʼol 10
Laj Jakob ut laj Xerem
Naq toj maji’ nakam, laj Nefi kixq’axtesiheb’ li perel ch’iich li kitz’iib’ak wi’ re laj Jakob, li riitz’in. Tiik xch’ool laj Jakob.
Laj Nefi kixye re laj Jakob naq tixtz’iib’a li k’a’aq re ru tixtenq’aheb’ li tenamit chixpaab’ankil li Jesukristo.
Laj Nefi kixk’e re laj Jakob li wankilal re taawanq choq’ aj tij sa’ li Iglees ut re tixk’ut li raatin li Dios chiruheb’ laj Nefita.
Chirix naq kikam laj Nefi, naab’aleb’ laj Nefita ke’ok choq’ aj maak. Laj Jakob kixtzol li tenamit ut kixye reheb’ naq te’xjal xk’a’uxl chirix li ink’a’ us yookeb’ chixb’aanunkil.
Jun winq aj maak laj Xerem xk’ab’a’ xko’o sa’ xyanqeb’ laj Nefita, ut kixk’ut chiruheb’ naq ink’a’ te’xpaab’ li Jesukristo.
Laj Xerem kixye re li tenamit naq maak’a’aq jun li Kristo. Naab’aleb’ ke’xpaab’ li raatin laj Xerem.
Laj Jakob kixtzoleb’ li tenamit naq te’xpaab’ li Kristo. Laj Xerem kiraj raatinakil laj Jakob ut xq’unb’esinkil xch’ool naq maak’a’aq jun li Kristo.
Lix paab’aal laj Jakob chirix li Jesukristo ink’a’ kiru chi eek’asimank. Rilomeb’ chaq li anjel ut rab’ihom chaq lix yaab’ xkux li Qaawa’. Kixnaw naq taachalq li Jesus.
Li Santil Musiq’ej kiwan rik’in laj Jakob naq kixch’olob’ xyaalal li Jesukristo re laj Xerem.
Laj Xerem kixpatz’ jun li eetalil. Kiraj naq laj Jakob tixk’ut xyaalal naq wan jun li Dios. Kiraj rilb’al jun sachb’a-ch’oolej.
Laj Jakob ink’a kixpatz’ re li Dios jun li eetalil. Kixye naq laj Xerem ak kixnaw naq yaal li k’a’ru kixk’ut chaq laj Jakob.
Laj Jakob kixye naq wi li Dios tixsak’ laj Xerem, a’anaq raj reetalil lix wankilal li Dios.
Tikto kit’ane’ chi ch’och’ laj Xerem. Ink’a’ kiru chi wakliik chiru xnumik k’iila kutan.
Maak’a’ chik xmetz’ew laj Xerem ut kixnaw naq taakamq. Kixpatz’ naq te’xch’utub’ rib’ li tenamit.
Kixye reheb’ naq kitik’ti’ik. Kixye naq te’xpaab’ raj li Jesukristo.
Chirix naq kiraqe’ chiraatinakileb’ li tenamit laj Xerem, kikam. Li tenamit ke’reek’a lix wankil li Dios, ut chixjunileb’ ke’t’ane’ chi ch’och’.
Li tenamit ke’ok chixjalb’al xk’a’uxl ut chixtz’olb’aleb’ li loq’laj hu. Ke’wan sa’ tuqtuukilal ut rik’in rahok. Kisaho’ xch’ool laj Jakob ut kixnaw naq li Dios kixsume chaq lix tij.