Chʼol 13
Laj Tzeniff
Laj Tzeniff ut jun siireb’ laj Nefita ke’xkanab’ li rochocheb’ aran Tzarahemla ut xkoheb’ sa’ li ch’och’ Nefi, b’ar wi’ ke’wan chaq jalaneb’ laj Nefita junxil.
Ke’xtaweb’ laj Lamanita li wankeb’ aran. Laj Tzeniff ut kaahib’ reheb’ laj taaqenel re xkoheb’ sa’ li tenamit re te’aatinaq rik’in li rey. Ke’xpatz’ re li rey aj Laman ma te’ruuq chireechaninkil li ch’och’.
Li rey aj Laman kixye naq te’ruuq chireechaninkil wiib’ lix tenamit. Li rey kiraj naq te’wanq sa’ lix ch’och’ re naq taaruuq tixk’ameb’ chi moosil.
Lix tenamit laj Tzeniff ke’xkab’laheb’ li kab’l ut ke’xtuqub’ li xaqxookil tz’ak chixsutam lix tenamiteb’. Ke’raw k’iila paay chi iyaj ut riyajil k’iila paay li ru che’. Kiwan ajwi’ reheb’ li teep chi ketomq.
Li rey aj Laman kixye reheb’ lix tenamit naq eb’ laj Nefita k’a’jo’ naq yookeb’ chi nimank xkawilaleb’. Chi seeb’ naab’aleb’ laj Lamanita xkoheb’ chixsak’b’al laj Nefita ut chixmaq’b’al lix ketomq ut lix q’olom.
Eb’ laj Nefita ke’eelelik toj sa’ li tenamit Nefi. Aran, laj Tzeniff kixkawresiheb’ rik’in tzimaj ut roq tzimaj, yok’leb’ ch’iich’, tenleb’ che’, ut rik’in jok’. Xkoheb’ chixpleetinkileb’ laj Lamanita.
Naj maji’ ke’ok chi pleetik, eb’ laj Nefita ke’tijok re xtz’aamankil re li Dios naq tixtenq’aheb’. Li Dios kirosob’tesiheb’ laj Nefita rik’in xkomon chik metz’ew, ut ke’xq’axeb’ ru laj Lamanita.
Chirix xraqik li pleet, laj Tzeniff kixk’ojob’eb’ laj k’aak’alenel chixsutam lix tenamiteb’ laj Nefita. A’an kiraj xkolb’al rix lix tenamit ut lix ketomq chiruheb’ laj Lamanita.
Eb’ laj Nefita ke’wan sa’ tuqtuukilal chiru naab’al chihab’. Eb’ li winq ke’xk’anjela li ch’och’, ut eb’ li ixq ke’b’aqok k’aam ut ke’xyiib’ t’ikr.
Li rey aj Laman kikam ut li ralal ki’ok choq’ rey. Li ak’ rey kixtaqla lix teep aj pleet chi pleetik rik’ineb’ laj Nefita.
Eb’ laj Nefita ke’xk’ul wi’chik kawilal rik’in li Qaawa’. Ke’xkamsiheb’ naab’al laj Lamanita, ut li rela’eb’ ke’eelelik.