Chʼol 33
Eb’ li rey aj winq chiruheb’ li ach’ab’anb’il winq
Jun raqal reheb’ laj Nefita ke’raj raj naq li xb’eenil aj raqol aatin, laj Pahoran, tixjal raj junjunq raqal sa’ li chaq’rab’.
Naq laj Pahoran ink’a’ kiraj xb’aanunkil, li tenamit ke’josq’o’ ut ke’raj risinkil chaq laj Pahoran jo’ xb’eenil aj raqol aatin. Eb’ a’an ke’raj naq taawanq jun rey ruuchileb’ laj raqol aatin.
Eb’ a’an, rey aj winq ke’k’ab’a’iik, ut ke’raj naq junaq reheb’ taa’ok choq’ rey ut taawanq xwankil sa’ xb’een li tenamit.
Eb’ laj Nefita li ke’ajok re naq taakanaaq laj Pahoran jo’ xb’eenil aj raqol aatin ke’xk’ul choq’ xk’ab’a’eb’ ach’ab’anb’il winq. Eb’ a’an ke’raj wank chi ach’ab’anb’il re loq’onink jo’ chanru neke’raj.
Li tenamit ke’tz’aqon sa’ li k’ulub’ank re xsik’b’al ru ma te’usaaq li rey aj winq malaj eb’ li ach’ab’anb’il winq. Lix k’ihaleb’ ke’xk’e xyaab’eb’ xkux rik’ineb’ li ach’ab’anb’il winq.
Sa’ li kutan ajwi’ a’an, laj Amalikiah yoo chaq chixch’utub’ankil jun nimla teep aj pleet reheb’ laj Lamanita re xpleetinkileb’ laj Nefita.
Naq eb’ li rey aj winq ke’rab’i naq chalkeb’ re laj Lamanita chixpleetinkileb’, ke’chal xsahileb’ xch’ool ut ink’a’ ke’raj pleetik re xkolb’al xtenamiteb’.
Laj Moroni kijosq’o’ rik’ineb’ li rey aj winq xb’aan naq ink’a’ ke’raj pleetik. A’an ak kik’anjelak chi kaw re’ te’wanq chi ach’ab’anb’il laj Nefita.
A’an kixpatz’ re laj jolominel re li ch’och’ xwankil re tixmineb’ ruheb’ li rey aj winq chi pleetik rik’ineb’ laj Lamanita malaj chi k’ehe’k chi kamk.
Naq laj jolominel re li ch’och’, laj Pahoran, kixk’e re li wankil a’an, laj Moroni xko’o rik’in lix teep aj pleet chixpleetinkileb’ li rey aj winq.
Naab’aleb’ li rey aj winq ke’kam; jun raqal ke’tz’ape’ sa’ tz’alam. Ut li rela’eb’ ke’xye naq te’tenq’anq chixkolb’al lix tenamit chiruheb’ laj Lamanita.