Chʼol 25
Laj Aaron nak’utuk chiru lix yuwa’ li rey aj Lamoni
Laj Aaron kixye re li rey naq a’an li ras laj Ammon. Li rey kiwan chaq chi k’oxlak sa’ xch’ool chirix xchaab’ilal xch’ool laj Ammon ut li k’a’ru kixye chaq re.
Laj Aaron kixpatz’ re li rey ma naxpaab’ naq wan jun li Dios. Li rey kixye naq ink’a’ naxnaw, a’b’an wi laj Aaron naxye naq wan jun li Dios, a’an tixpaab’. Laj Aaron kixye re li rey naq yo’yo li Dios chi yaal.
Laj Aaron kixyaab’asi chiru li rey li aatin sa’eb’ li loq’laj hu. A’an kixk’ut chiru lix yo’ob’tesinkil li ruchich’och’, lix t’anik laj Adan, ut lix taqlanb’il k’anjel li Jesukristo.
Li rey kixpatz’ k’a’ru tento tixb’aanu re naq tixk’ul li Santil Musiq’ej ut re naq kawresinb’ilaq chi wank rik’in li Dios. Li rey wan xch’ool chixb’aanunkil yalaq k’a’ru, toj reetal xkanab’ankil li rawa’b’ejihom.
Laj Aaron kixye re li rey naq taa’ajmanq xjalb’al xk’a’uxl chi tz’aqal chirix lix maak. Tento taatijoq ut taawanq xpaab’aal chirix li Dios.
Li rey kitijok re xnawb’al ma yaal naq wan jun li Dios. Kixye naq tixq’axtesi chixjunil lix maak.
Li rey kit’ane’ chi ch’och’ chanchan naq kamenaq. Naq li rixaqil li rey kiril, kixk’oxla naq laj Aaron ut eb’ li rochb’een ke’xkamsi.
Li rixaqil li rey kixtaqlaheb’ lix moos naq te’xkamsi laj Aaron ut eb’ li rochb’een, a’b’an eb’ a’an ke’xxuwa xb’aanunkil. A’an kixtaqlaheb’ chixsik’b’al jalaneb’ li te’b’aanunq re.
Rub’elaj naq kiru chi ch’utlaak jun tuub’ chi tenamit ut chixyoob’ankil li ch’a’ajkilal, laj Aaron kixchap li ruq’ li rey ut kixye re naq taaxaqliiq. Kixaqli li rey.
Li rey kixtuqub’ xch’ool li rixaqil ut eb’ lix moos ut kixk’ut li evangelio chiruheb’. Chixjunileb’ ke’xpaab’ li Jesukristo.