Chʼol 32
Laj Moroni aj taqlanel ut li eetalil re ach’ab’aak
Laj Amalikiah, jun winq aj maak, kiraj wank choq’ xreyeb’ laj Nefita. Naab’aleb’ laj Nefita ke’risi rib’ rik’in li Iglees re xtaaqenkil.
Wi ta laj Amalikiah taawulaq choq’ rey, tixsik’ raj xsachb’al lix Iglees li Dios ut xsachb’al li ach’ab’aak re li tenamit.
Naq laj Moroni, li naxjolomi li teep aj pleet reheb’ laj Nefita, kirab’i resil lix k’uub’anb’il na’leb’ laj Amalikiah re taa’ok choq’ rey, kijosq’o’.
Laj Moroni kixpej lix b’aatal re xyiib’ankil jun eetalil. Chiru li pejb’il b’aatal kixtz’iib’a jun esil re xjultikankil chiruheb’ li tenamit naq te’xkol rix lix paab’aal, li ach’ab’aak wankeb’ wi’, ut lix tuqtuukilal.
Laj Moroni kixb’ak’ li eetalil sa’ ru’uj jun li b’arb’ookil che’ ut kixk’ab’a’i li eetalil re ach’ab’aak. Toja’ naq, chi tiqto rik’in lix kolb’a-ib’ aq’, kiwiq’la ut kitijok.
A’an kixpatz’ re li Dios naq tixkoleb’ rix li neke’paab’ank re li Jesukristo, ut kitijok chirix li ach’ab’aak wan wi’ li ch’och’, li kixk’ab’a’i jun ch’och’ re ach’ab’aak.
Laj Moroni xko’o sa’ xyanqeb’ li tenamit. Kireek’asi sa’ iq’ li eetalil re ach’ab’aak, ut kixb’oqeb’ chi chalk ut chi tenq’ank chixkolb’al li ach’ab’aak wankeb’ wi’.
Ke’chal chaq li tenamit sa’ chixjunil li ch’och’. Ke’ok sa’ aatin naq te’xpaab’ lix taqlahom li Dios ut naq te’pleetiq re xk’uulankil li ach’ab’aak.
Naq laj Amalikiah kiril lix k’ihal rajlankileb’ laj Nefita li ke’xjunaji rib’ rik’in laj Moroni, kixuwak. A’an ut eb’ li neke’taaqen re xkoheb’ re xjunajinkil rib’ rik’ineb’ laj Lamanita.
Laj Moroni ut lix teep aj pleet ke’xsik’ xramb’aleb’, a’b’an laj Amalikiah ut junjunq reheb’ li rochb’een ke’eelelik.
Laj Moroni kixk’ojob’ jun eetalil re ach’ab’aak sa’ xb’een chixjunil li najt xteramil kab’l li wan sa’ lix ch’och’eb’ laj Nefita. Eb’ laj Nefita ke’xkol chaq rix li ach’ab’aak wankeb’ wi’ ut ke’ok wi’chik chi wank sa’ tuqtuukilal.