Chʼol 40
Laj Samuel aj Lamanita naxye resil li Jesukristo
Eb’ laj Lamanita ke’ab’in chiruheb’ lix taqlahom li Dios. Ke’wulak chi tiik wi’chik xch’ooleb’ chiruheb’ laj Nefita.
Laj Samuel, jun profeet aj Lamanita, xko’o Tzarahemla chi jultikank aatin chiruheb’ laj Nefita aj maakeb’. A’an kixye reheb’ naq te’xjal xk’a’uxl.
Eb’ laj Nefita ke’risi chaq laj Samuel sa’ li tenamit ut a’an kixk’am xb’e sa’ lix ch’och.
A’b’an li Qaawa’ kixye re laj Samuel naq taasutq’iiq wi’chik Tzarahemla ut tixye reheb’ li tenamit li k’a’aq re ru tixk’e chaq li Qaawa’ sa’ li raam.
Eb’ laj Nefita ink’a’ ke’xkanab’ naq laj Samuel taa’ok sa’ li tenamit, jo’kan naq a’an kitaqe’ sa’ xb’een li xaqxookil tz’ak re li tenamit, ut aran ki’ok chi jultikank aatin.
A’an kixch’olob’ jo’ profeet naq sa’ kaahib’ cient chihab’ eb’ laj Nefita te’sache’q raj wi ta ink’a’ te’xjal xk’a’uxl ut te’xpaab’ li Jesukristo.
Laj Samuel kixye reheb’ laj Nefita naq li Jesukristo taayo’laaq sa’ oob’ chihab’ chik ut naq tixkoleb’ chixjunileb’ li te’paab’anq re.
Laj Samuel kixe reheb’ resileb’ li reetalil lix yo’lajik li Jesus. Taawakliiq jun ak’ chahim, ut sa’ li q’ojyin taayo’laaq wi’ li Jesus ink’a’ taaq’ojyino’q li kutan.
Toja’ naq laj Samuel kixye reheb’ resileb’ li reetalil lix kamik li Jesus. Taawanq oxib’ kutan re chamal aak’ab’—li saq’e, li po, ut eb’ li chahim ink’a’ te’lemtz’unq.
Taawanq ajwi’ li kaaq, raq’ kaaq, ut eb’ li hiik. Te’uq’e’q li tzuul ut naab’al li tenamit te’kanaaq chi sachenaq.
Junjunqeb’ aj Nefita ke’xpaab’ li raatin laj Samuel ut ke’xjal xk’a’uxl chirixeb’ lix maak. Eb’ a’an xkoheb’ chixsik’b’al laj Nefi, jun aj Nefita tiik xch’ool li naru chixkub’sinkileb’ xha’.
Eb’ li rela’ aj Nefita ink’a’ ke’xpaab’ li raatin laj Samuel. Ke’xkuti chi pek ut ke’xkut rik’in tzimaj. A’b’an li Qaawa’ kixkol rix, ut maajun xpekeb’ chi moko xtzimaj ke’ru chixketb’al.
Naq ke’ril naq ink’a’ neke’ru chixketb’al, naab’aleb’ ke’paab’ank ut xkoheb’ rik’in laj Nefi re naq te’kub’siiq xha’.
Laj Nefi kixtzoleb’ ajwi’ li tenamit chirix li Jesus. Kiraj naq te’paab’anq chirix li Jesus, naq te’xjal xk’a’uxl, ut naq te’kub’eeq xha’.
A’b’anan, lix k’ihaleb’ laj Nefita ink’a’ ke’xpaab’ li raatin laj Samuel. Ke’xsik’ xchapb’al.
Laj Samuel kixkut rib’ sa’ xb’een li xaqxookil tz’ak, ut ki’eelelik toj sa’ xch’och’ a’an.
Laj Samuel ki’ok chi jultikank aatin sa’ xyanqeb’ laj Lamanita. Maajun wa chik ki’ab’iman resil sa’ xyanqeb’ laj Nefita.