Chʼol 2
Laj Lehi naxtijeb’ li tenamit
Lix k’ihaleb li tenamit li wankeb’ chaq Jerusalen waqib’ cient chihab’ ma nayo’la li Kristo, a’aneb’ aj maak. Li Dios kixtaqlaheb’ li profeet re xb’oqb’aleb’ sa’ li jalb’a-k’a’uxlej, a’b’an ink’a’ ke’raj rab’inkil.
Laj Lehi a’an jun profeet. A’an kitijok re naq eb’ li tenamit te’xjal xk’a’uxl. Naq yoo chi tijok, kik’utun jun xaqal li xam. Li Dios kixye ut kixk’ut k’iila na’leb’ re laj Lehi.
Laj Lehi kisutq’i chaq sa’ rochoch ut kik’ame’ sa’ jun li k’utb’esinb’il matk’. Kiril li Dios sutsu xb’aaneb’ k’iila ch’uut chi anjel. Eb’ li anjel yookeb’ chi b’ichank ut chixnimankil ru li Dios.
Sa’ li k’utb’ensib’il matk’, kik’eeman re laj Lehi jun li hu b’ar wi’ naxye li k’a’ru taa’uxmanq moqon. Kiril chi sa’ naq li tenamit Jerusalen taasachmanq xb’aan naq li ani wankeb’ aran, a’aneb’ aj maak.
Laj Lehi kixye re li tenamit naq Jerusalen taasachmanq. Jo’kan ajwi’ ki’aatinak chirix li xk’ulunik li Jesus. Li tenamit ke’josq’o’ rik’in laj Lehi ut ke’xsik’ xkamsinkil, a’b’an li Qaawa’ kixkol rix.