Laj Abinadi chiru li rey aj Noe, xbʼaan laj Andrew Bosley

13–19 mayo: “Jun li saqen … li maajo’q’e naru xq’ojyinob’resinkil”

Mosiah 11–17

Eb’ li ninqi xam naru neke’tikla rik’in yal jun ch’ina raq’ xam. Laj Abinadi a’an li junaj chi winq yoo chixch’olob’ankil li yaal chiru jun xnimal ru rey ut eb’ lix komon. Kikana li raatin chi tz’eqtaananb’il, ut kijite’ ut kiteneb’aak li kamsiik sa’ xb’een. A’b’anan, lix nawom ch’ool chirix li Jesukristo, li wan jo’ “li saqen … li maajo’q’e naru xq’ojyinob’resinkil” (Mosiah 16:9), kixloch li raam jun saaj aj tij, laj Alma. Ut chi timil timil kiniman li jalok ch’oolej li lochb’il sa’ li raam laj Alma naq a’an kixk’ameb’ jalaneb’ chik chixjalb’aleb’ xk’a’uxl ut chi paab’ank chirix li Jesukristo. Eb’ li raq’ xam li ke’xkamsi laj Abinadi ke’chup rik’in xnumik li hoonal, a’b’an lix xamlel li paab’aal li kiloche’ xb’aan li raatin kikana rik’ineb’ laj Nefita—jo’eb’ ajwi’ li ani neke’ril ru li raatin a’an anajwan. Naab’al qe laa’o maajo’q’e taqak’ul li kixk’ul laj Abinadi xb’aan naq wan xnawom qach’ool, a’b’an chiqajunilo wan naq taayale’q rix lix kawilal qach’ool ut li qapaab’aal xb’aan naq naqataaqe li Jesukristo. Maare xtzolb’al lix nawom xch’ool laj Abinadi tixnimob’resi xxamlel li xnawom ch’oolej ut li kawil ch’oolej sa’ laa waam ajwi’ laa’at.

Chi’ilmanq ajwi’ “Abinadí testifica de Jesucristo” (video), Biblioteca del Evangelio.

Li na’leb’ re tzolok sa’ li ochoch ut sa’ li iglees

Mosiah 11–13; 17

Naru ninkol rix li Jesukristo, us ta injunes wanqin.

Naq yooqat chirilb’al Mosiah 11–13; 17, ileb’ xjalam-uuch laj Abinadi sa’ li tusleb’ aatin a’in. K’a’ru nakatzol chirix li xaqliik joʼ aj yehol nawom chirix li Kristo? Naru nakajayali li tzolok nakab’aanu rik’ineb’ li raqal ut patz’om jo’eb’ a’in:

• Chan raj ru taach’olob’ xwanjik laj Noe ut lix tenamit? K’a’ut naq aajel ru naq kaw xch’ool laj Abinadi re kiru chixwotzb’al li raatin li Dios rik’ineb’? (chi’ilmanq Mosiah 11:1–19, 27–29; 12:9–15).

• Chan raj ru taach’olob’ xwanjik laj Abinadi? K’a’ru kixtaw ru laj Abinadi li kixtenq’a chixch’olob’ankil xnawom xch’ool rik’in kawilal? (chi’ilmanq Mosiah 13:2–9, 28, 33–35; 17:8–10, 20).

Jo’q’e xaweek’a naq junes xaqxookat sa’ xkolb’al rix li Kolonel ut lix evangelio? Chan ru katxtenq’a chireek’ankil naq a’an wan chaq aawik’in? Naq yooqat chixk’oxlankil a’in, naru nakawil li seraq’ chirix laj Eliseo ut lix moos sa’ 2 Reyes 6:14–17. K’a’ru naxwaklesi aach’ool chirix lix seraq’ a’in?

Naru nakawileb’ li perel 31–33 re Choq’ re Xkawilaleb’ li Saaj: Jun tenq’ re xsik’b’al ru laa b’e re xtawb’aleb’ li ch’ol aatin li neke’xk’e xkawilal aach’ool re xkolb’al rix li yaal. Naru ajwi’ nakab’aanu a’an rik’in raatinul jun li b’ich jo’ “Us taab’aanu” malaj “Sa’ xk’anjel li Dios chiqayal tz’aqal qaq’e” (Eb’ li B’ich, 149, 155).

Chan ru taawoksi sa’ laa yu’am li xatzol rik’in laj Abinadi? Li video “Atrévete a lo correcto aunque solo estés” (Biblioteca del Evangelio) naxk’ut chan ru naru nakakol rix li Kristo ut lix evangelio yalaq ta b’ar wankat. Ma wan xkomoneb’ chik li naru nakak’oxla?

Chi’ilmanq ajwi’ Romanos 1:16; 2 Timoteo 1:7–8; “Capítulo 8: El llamado a tener valor,” Enseñanzas de los Presidentes de la Iglesia: Thomas S. Monson (2022); Temas del Evangelio, “Fe en Jesucristo,” Biblioteca del Evangelio.

Tatkʼutuq rikʼin li Musiqʼej. “Xk’utb’al li evangelio rik’in wankilal ink’a’ ka’ajwi’ naraj naxye xkawresinkil jun tzol’leb’, naraj ajwi’ naxye xkawresinkil qib’ sa’ musiq’ej naq toj maji’ noko’ok chi k’utuk” (Li K’utuk jo’ li Kolonel, 17).

Mosiah 12:19–37

Tento tink’e inch’ool re xtawb’al ru li raatin li Dios.

Eb’ laj tij re li rey aj Noe ke’xnaw ru li raatin li Dios. Ke’ru chixyeeb’al li aatin wankeb’ sa’eb’ li loq’laj hu ut ke’xye naq neke’xk’uteb’ li taqlahom. A’ut chanchan naq maak’a’ xwankil lix evangelio li Kolonel sa’ xyu’ameb’. K’a’ut naq ke’wan chi jo’kan?

K’oxla a’in naq nakawil Mosiah 12:19–37. K’a’ru naraj naxye xk’eeb’al aach’ool re xtawb’al ru li raatin li Dios? K’a’ruheb’ li aatin malaj ch’ol aatin li nakate’xmusiq’a chixjalb’al chan ru nakatzol li evangelio?

Mosiah 13:11–26

Ebʼ lix taqlahom li Dios tento naq teʼwanq chi tzʼiibʼanbʼil chiru lin chʼool.

Tz’il rix lix na’leb’ laj Abinadi naq eb’ li taqlahom “moko tzʼiibʼanbʼilebʼ ta saʼ xchʼoolebʼ” laj tij (Mosiah 13:11). K’a’ru naraj naxye li chʼol aatin aʼin? Naq yooqat chirilbʼal Mosiah 13:11–26, kʼoxla ma tzʼiibʼanbʼilebʼ li taqlahom aʼin chiru laa chʼool.

Chi’ilmanq ajwi’ Jeremias 31:31–34; 2 Korintios 3:3.

Mosiah 14–15

Li Jesukristo kixk’ul li rahilal sa’ ink’ab’a’ laa’in.

Sa’ Mosiah 14–15, k’e reetaleb’ li aatin ut ch’ol aatin li neke’xye resil li Kolonel ut li rahilal kixk’ul sa’ aak’ab’a’ laa’at. B’arwan reheb’ li raqal neke’xnimob’resi laa rahom ut laa b’antioxihom choq’ re a’an?

Mosiah 15:1–12

Chan ru naq li Jesukristo a’an li Yuwa’b’ej jo’ ajwi’ li K’ajolb’ej?

Laj Abinadi kixk’ut naq li Dios K’ajolb’ej—li Jesukristo—a’anaq laj Tojol-ix (chi’ilmanq Mosiah 15:1), naq kiwan sa’ li tz’ejwalej, kiwan jo’ jun winq ut kiwan ajwi’ jo’ jun Dios (eb’ li raqal 2–3). A’an kixkanab’ rib’ chi tz’aqal chiru li rajom li Dios Yuwa’b’ej (eb’ li raqal 5–9). Xb’aan a’in, li Jesukristo a’an li Ralal li Dios jo’ ajwi’ li tz’aqal reetalil li Dios Yuwa’b’ej sa’ ruchich’och’ (chi’ilmanq Jwan 14:6–10).

Li Jesukristo a’an ajwi’ li Yuwa’b’ej rik’in naq sa’ xk’ulub’ankil li tojb’al-ix naxk’e, noko’ok choq’ “li riyajil” ut “aj eechanihom re li rawaʼbʼejihom li Dios” (Mosiah 15:11–12). Sa’ jalan chik aatin, nokoyo’la chi ak’il sa’ musiq’ej sa’ xk’ab’a’ a’an (chi’ilmanq Mosiah 5:7).

Kʼaʼut nakaweekʼa naq aajel ru xnawbʼalebʼ li naʼlebʼ aʼin chirix li qaChoxahil Yuwaʼ ut li Jesukristo? Chan ru naq lix nawom xchʼool laj Abinadi naxkawobʼresi laa paabʼaal chirixebʼ aʼan?

Li na’leb’ re xtzolb’aleb’ li kok’al

Mosiah 11–13; 17

Naru ninkol rix li Jesukristo, us ta injunes wanqin.

• Sa’ junaq hoonal sa’ li qayu’am, taapatz’manq qe chiqajunilo naq taqasik’ ru xb’aanunkil li k’a’ru naxka’pak’ali li qapaab’aal chirix li Jesukristo. K’a’ru naru neke’xtzol laa kok’al rik’in laj Abinadi chirix li xaqliik jo’ aj yehol chirix li Jesukristo, us ta li ruchich’och’ naxtz’eqtaana a’an. Eb’ li jalam-uuch sa’ li tusleb’ aatin malaj sa’ “Ch’ol 14: Laj Abinadi ut li rey aj Noe” (sa’ Eb’ li Esilal sa’ lix Hu laj Mormon, 38–42) naru neke’xtenq’aheb’ chixtawb’al ru li seraq’ sa’ Mosiah 11–13; 17. Patz’ reheb’ k’a’ru nawulak chiruheb’ chirix laj Abinadi.

• Maare taawulaq chiruheb’ laa kok’al xk’utb’esinkil xcha’al lix seraq’ laj Abinadi. Chirix a’an naru neke’xk’utb’esi k’a’ raj ru te’xb’aanu wi ta wan jun kristiaan li naraj naq te’xb’aanu li k’a’ru ink’a’ us. Malaj naru neke’xwotz xnumsihomeb’ naq kaweb’ xch’ool sa’ xtaaqenkil li Jesukristo. Chan ru naq laj Abinadi kixtaaqe li Jesukristo? (chi’ilmanq Mosiah 13:2–9; 17:7–10). K’a’ut naq li rey aj Noe ink’a’ kixb’aanu li k’a’ru kixnaw naq tiik ru? (chi’ilmanq Mosiah 17:11–12).

Mosiah 12:33–36; 13:11–24

Tento tinpaab’eb’ li Lajeeb’ chi Taqlahom.

• Eb’ laj tij re li rey aj Noe neke’xnaw li taqlahom, a’b’an “moko tzʼiibʼanbʼilebʼ ta saʼ xchʼoolebʼ” (Mosiah 13:11). Chan ru taatenq’aheb’ laa kok’al chixnawb’aleb’ li taqlahom ut chixraab’aleb’? Naru neke’xtz’iib’aheb’ li taqlahom li wankeb’ sa’ Mosiah 12:33–36 ut 13:11–24 chiru kok’ ch’oolej yiib’anb’il rik’in hu. Naq te’xb’aanu a’an, aatinan rik’ineb’ chirix xyaalalileb’ li taqlahom ut chan ru xpaab’ankileb’. Chan ru naq naqatz’iib’aheb’ li taqlahom a’in chiru li qach’ool?

• Naru nekeb’icha jun li b’ich chirixeb’ li taqlahom, maare “Paab’eb’ li taqlahom” (B’ichleb’aal choq’ reheb’ li Kok’al, 68–69). K’a’ruheb’ li osob’tesink neke’chal xb’aan xpaab’ankileb’ li taqlahom?

Eb’ li loq’laj hu neke’xk’ut chiqu lix taqlahom li Dios.

Mosiah 14; 16:4–9

Li qaChoxahil Yuwa’ kixtaqla chaq li Jesukristo re naq a’an tinixb’eresi rik’in a’an.

• Us ta ka’ch’in li ch’ol a’in, wan sa’ Mosiah 14 li aatin ut ch’ol aatin li neke’xye resil li Jesukristo. Naru neketz’iib’aheb’ malaj nekeyeheb’ naq yooqex chirilb’al li ch’ol. Chirix a’an naru nekex’aatinak chirix li nekereek’a chirix li Kolonel naq neketzoleb’ li aatin ut ch’ol aatin a’an.

• Re k’utuk chirix li Jesukristo, laj Abinadi kiroksi li raatin li profeet aj Isaias, li kooxjuntaq’eeta rik’ineb li karneer sachsookeb’. Laa kok’al naru neke’xwotz xnumsihomeb’ b’ar wi’ naq xsach k’a’ruhaq chiruheb’ malaj a’aneb’ ajwi’ xe’sach. K’a’ru xe’reek’a? K’a’ru xe’xb’aanu? Chirix a’an naru nekeril Mosiah 14:6 ut 16:4–9 sa’ komonil. Chan ru naq chanchano li karneer li neke’el chaq chiru li Dios. Chan ru nokoxtenq’a li Jesukristo chi sutq’iik?

Re xtawb’al xkomon chik li na’leb’, chi’ilmanq li hu Amigos re li po a’in.

Kilemtz’un li rilob’aal chi q’axal lemtz’ ru, xb’aan laj Jeremy Winborg