Stap Wok blong God blong Yu, i kam long Walter Rane

29 Epril–5 Mei: “Wan Bigfala Jenis”

Mosaea 4–6

?Yu yu bin harem finis wan man i toktok mo yu filim insperesen blong jenisim laef blong yu? Ating yu bin disaed, from ol samting we yu bin harem finis, blong laef long wan wei we i defren smol—o i defren evriwan. Toktok blong King Benjamin i kaen toktok ia we man i harem mo jenisim laef, mo ol trutok we hem i bin tijim, oli mekem ol kaen jenis olsem nao long ol pipol we oli bin harem. King Benjamin i bin serem wetem ol pipol blong hem wanem we wan enjel i bin tijim hem—ol gudfala blesing ia, oli save kam nomo tru long “blad blong Kraes we i pem praes from ol sin blong yumi” (Mosaea 4:2). From mesej blong hem, oli i bin jenisim fulwan olsem wanem oli bin stap lukluk olgetawan (luk long Mosaea 4:2), Spirit i bin jenisim wanem oli bin wantem (luk long Mosaea 5:2), mo oli mekem kavenan wetem God, se oltaem bae oli mekem tingting blong Hem (luk long Mosaea 5:5). Hemia hao ol toktok blong King Benjamin i stap tajem o jenisim laef blong ol pipol blong hem. ?Olsem wanem i tajem o jenisim laef blong yu?

Ol tingting blong stap lan long Hom mo Jos

Mosaea 4

Tru long Jisas Kraes, mi save kasem mo mi save holemtaet fasin blong kam klin aot long ol sin.

Samtaem, iven taem yu filim se Hem i fogivim ol sin blong yu, yu stap traehad yet blong holemtaet filing ia mo stap long rod blong stret mo gud fasin. King Benjamin i tijim ol pipol blong hem blong mekem tugeta samting ia, kasem mo holemtaet fasin blong kam klin aot long ol sin. Taem yu stadi japta 4 blong Mosaea, tingting blong askem ol kwestin olsem olgeta ia:

Ol ves 1–8.?Wanem ol kondisen we i kam wetem wanem we God i givim blong holemtaet fasin blong kam klin aot long ol sin ?Wanem nao yu lanem abaot Hem long ol ves ia we i givim yu insperesen blong yu sakem sin? “?Olsem wanem nao yu save se yu bin sakem sin?”

Ol ves 11–16.Folem olgeta ves ia, ?wanem i stap hapen long laef blong yumi sapos yumi stap mekem olgeta samting we oli tokbaot insaed long ves 11? ?Olsem wanem yu o wan we yu lavem, i eksperiensem ol jenis ia? Komperem ol jenis ia long ol jenis we oli tokbaot long Mosaea 3:19.

Ol Ves 16–30.?Olsem wanem nao taem yu stap serem wanem we yu gat wetem ol narafala man, i stap helpem yu blong holemtaet fasin blong kam klin aot long sin? ?Olsem wanem yu save yusum ves 27 taem yu stap traehad blong save kam moa olsem Kraes?

?Long wanem wei nao, yumi evriwan, yumi ol man blong askem samting? Folem ol ves ia, ?olsem wanem nao yumi sapos blong tritim evri pikinini blong God? (luk long Mosaea 4:26). ?Huia i nidim help blong yu?

Luk tu long Becky Craven, “Holemtaet Jenis Ia,” Liahona, Nov. 2020, 58–60.

Mosaea 4:5–10

Mi biliv mo gat tras long God.

Invitesen blong King Benjamin blong biliv long mo trastem God i impoten semmak tedei olsem long ol taem bifo. Taem yu stap ridim Mosaea 4:5–10, lukaotem ol trutok abaot God we i givim risen from wanem yu mas trastem Hem. Tekem not long ol invitesen we King Benjamin i givim long ves 10. ?From wanem blong trastem God i mekem i moa isi blong mekem wanem we King Benjamin i invaetem yumi blong mekem?

Tingting blong stap lukaotem sam moa skripja blong mekem wan lis blong ol fasin blong God: Jeremaea 32:17; 1 Jon 4:8; 2 Nifae 9:17; Alma 32:22; Momon 9:9; Ita 3:12; Doktrin mo Ol Kavenant 19:1–3; 88:41 (luk tu long vidio “Christlike Attributes,” Gospel Library). Yu save yusum lis blong yu blong faenem ol wei blong komplitim wan sentens olsem hemia: “From mi save God i , mi save trastem Hem blong .”

Tras blong yumi long God i kam antap taem yumi gat ol eksperiens wetem Hem. Long Mosaea 4:1–3, ?wanem i helpem ol pipol blong King Benjamin oli “kam blong save gudfala fasin blong God”? (ves 6). Tingbaot ol eksperiens ia we yu bin gat wetem God. ?Wanem nao ol eksperiens ia oli bin tijim yu abaot Hem? ?Wanem ol step we yu stap tekem (o yu save tekem) blong mekem bilif o tras blong yu long God i kam moa dip?

Luk tu long Jeffrey R. Holland, “The Grandeur of God,” Liahona, Nov. 2003, 70–73; Gospel Topics “God the Father,” Gospel Library; “Mi Save God I Laef,” STSP, namba 59.

Serem ol tabu eksperiens. Sam eksperiens oli tabu tumas blong serem o i blong yuwan nomo. Taem yu stap invaetem ol nara wan blong serem ol eksperiens, no fosem olgeta sapos oli no wantem blong serem.

Mosaea 4:29–30

Mi mas lukaotgud long tingting, toktok mo aksen blong mi.

Hem i no givim wan longfala lis blong ol samting blong mekem. Olsem we i stap long Mosaea 4:29–30, ?wanem nao hem i mekem? ?Tingting hevi long hao nao ol tingting, toktok, mo aksen i mekem jenis long yuwan mo ol narafala man? ?Hao nao i jenisim rilesensip blong yu wetem God? ?Hao nao “yufala i lukaotgud long [yufalawan]”?

Mosaea 5:1–5

Spirit blong Lod i save mekem wan bigfala jenis insaed long hat blong mi.

Hem i save hapen oltaem we pipol i talem: “Mi no save jenis. Mi mi olsem ia nao.” Be long narasaed, eksperiens blong ol pipol blong King Benjamin i soem long yumi olsem wanem Spirit i save jenisim ol hat blong yumi long wan tru fasin. Taem yu stap ridim Mosaea 5:1–5,tingbaot hao “bigfala jenis” long hat i lidim man blong jenis fulwan i bin hapen—o i save hapen—long laef blong yu. Tingbaot, ol jenis ia we i hapen wan taem mo sloslo semmak olsem ol “bigfala” eksperiens. ?Olsem wanem ol eksperiens ia oli helpem yu taem yu fesem temtesen?

Luk tu long Esikel 36:26–27; Alma 5:14; “A Change of Heart,” “The People of King Benjamin Make a Covenant” (ol vidio), Gospel Library.

Ol Han blong Hilim Man, i kam long Adam Abram

Mosaea 5:5–15

Mi tekem long miwan nem blong Kraes taem mi mekem ol kavenan wetem Hem.

?Wanem nao yu lanem aot long Mosaea 5:7–9 abaot mining blong tekem long yuwan nem blong Kraes? ?Wanem nao ol sakramen prea (luk long Moronae 4–5) i tijim abaot hemia? ?Olsem wanem nao yu save soem se yu, yu “blong” Sevya?

Luk tu long D. Todd Christofferson, “Stap Wokbaot long Kavenan Rod,” Liahona, Mei 2021, 116–19.

Sam Tingting blong Tijim Ol Pikinini

Mosaea 4:1–3, 10

Fasin blong sakem sin i givim fasin blong stap glad.

• Blong tij abaot glad from fasin blong sakem sin, ating yu save lego ol pikinini blong yu i mekem ol han blong olgeta i stak wetem doti o i doti mo luk olsem wanem oli filim afta we oli wasem. Afta yu save komperem hemia wetem wei we pipol long Mosaea 4:1–3 i bin filim bifo mo afta we oli kasem fasin blong fogiv from ol sin blong olgeta. Serem testemoni blong yu abaot paoa blong Sevya we i save klinim yumi long saed blong spirit.

• ?Ol pikinini blong yu oli save hao nao oli mas sakem sin fulwan mo wetem tru hat blong olgeta? Helpem olgeta blong faenemaot wanem King Benjamin i bin mekem long Mosaea 4:1–3, 10. Oli save luklukbak tu long “Sakem Sin, Fasin blong Sakem SinSakem Sin” insaed long Gaed long Ol Skripja. ?Olsem wanem Jisas Kraes i mekem fasin blong sakem sin i posibol?

Mosaea 4:12–26

Gospel blong Jisas Kraes i givim insperesen long mi blong tritim ol narafala man wetem lav mo kaen fasin.

• Givim seves long ol narafala man i mekem yumi filim gud. Ating ol pikinini blong yu oli save tokbaot wan taem we oli bin laekem o oli bin givim seves long wan mo olsem wanem oli filim abaot eksperiens ia. ?Wanem sam risen we maet pipol i no wantem blong givim seves long ol narafala man? ?Wanem nao yumi save talem long wan blong invaetem olgeta blong helpem ol pipol we oli stap long nid? Lukaotem sam aedia long Mosaea 4:16–26.

• King Benjamin i bin tijim se taem yumi kam long Kraes mo kam klin aot long ol sin blong yumi, yumi “fulap wetem lav blong God” (Mosaea 4:12). Hemia i lidim yumi blong stap gat lav mo stap kaen long ol narafala man. Yu mo ol pikinini blong yu i save lukluk long Mosaea 4:13–16, 26 (o wan singsing olsem “I’ll Walk with You,” Children’s Songbook, 140–41) mo faenem ol sentens we i tokbaot hao blong givim seves long ol narafala man. Afta oli save aktemaot ol samting ia o dro ol pikja blong olgeta mo letem ol nara pikinini i traem talem se wanem ia. ?Olsem wanem nao yumi save soem lav mo kaen fasin long hom, skul, o long Jos?

Jisas Kraes i bin tijim yumi blong stap kaen long ol narafala man.

Mosaea 5:5–15

Taem mi mekem ol kavenan wetem God, mi tekem long miwan nem blong Kraes.

• Maet ol pikinini blong yu bae oli glad blong mekem ol baj we i soemaot nem ia “Jisas Kraes” mo pinim i go long ol sot blong olgeta long saed blong hat blong olgeta (luk aktiviti pej blong wik ia). Taem oli stap mekem hemia, yu save ridim long olgeta Mosaea 5:12 mo tokbaot hao fasin blong mekem ol kavenan, o ol promes wetem God i olsem we blong stap gat nem blong Kraes “oli raetem i stap oltaem long ol hat blong [yumi].”

Blong moa tingting, luk long namba blong manis ia blong Fren magasin.

Oltaem long Kea blong Hem, i kam long Greg K. Olsen