Abinadae long Fored blong King Noa, i kam long Andrew Bosley

Mosaea 11–17: “Wan Laet … We I Neva Save Kam Tudak”

Mosaea 11–17

Ol bigbigfala faea oli save stat wetem wan smol faea. Abinadae i bin wan man ia nomo we i stap testifae agensem wan king we i gat paoa wetem kaonsel bodi blong hem. Fulap long ol toktok blong Abinadae, oli sakemaot, mo oli panisim hem se bae hem i mas ded. Yet, testemoni blong hem abaot Jisas Kraes, we i “laet [ia] … we i no save kam tudak” (Mosaea 16:9), i laetem smol faea insaed long yangfala pris ia, Alma. Mo smol faea ia blong wan jenis long hat, sloslo i gro taem Alma i stap tekem plante moa oli kam blong sakem sin mo gat fet long Jisas Kraes. Faea we i kilimded Abinadae, long en, i ded, be faea blong fet we ol toktok blong hem i bin laetem, bae i stap laet strong oltaem long Ol Man blong Nifae—mo long olgeta we oli stap ridim toktok blong hem tedei. Plante long yumi bae i neva fesem stret wanem we Abinadae i bin fesem from testemoni blong yumi, be yumi evriwan i gat ol taem olsem, taem yumi stap folem Jisas Kraes, hem i wan tes blong testem paoa long tingting mo fet blong yumi. Ating blong stap stadi long testemoni blong Abinadae bae i blo win long faea blong testemoni, mo strong paoa long tingting insaed long hat blong yu tu.

Luk tu long “Abinadi Testifies of Jesus Christ” (vidio), Gospel Library.

Ol tingting blong stap lan long Hom mo Jos

Mosaea 11–13; 17

Mi save stanap from Jisas Kraes, iven sapos mi stanap miwan.

Taem yu stap stadi long Mosaea 11–13; 17, lukluk long ol pikja blong Abinadae long aotlaen ia. ?Wanem nao yu lanem abaot fasin blong stanap olsem wan witnes blong Kraes? Speseli nao, yu save mekem stadi blong yu i lukluk moa long ol ves mo kwestin olsem ia:

• ?Hao nao bae yu tokbaot Noa mo ol pipol blong hem? ?From wanem i nidim strong paoa long tingting blong Abinadae i serem mesej blong God wetem olgeta? (Luk long Mosaea 11:1–19, 27–29; 12:9–15).

• ?Hao nao bae yu tokbaot Abinadae? ?Wanem nao Abinadae i bin andastanem we i helpem hem blong toktok stret insaed long testemoni blong hem? (Luk long Mosaea 13:2–9, 28, 33–35; 17:8–10, 20).

?Wetaem nao yu bin filim se yu stap stanap yuwan blong stap difendem Sevya mo gospel blong Hem? ?Olsem wanem nao Hem i bin helpem yu blong filim se Hem i bin stap wetem yu? Taem yu stap tingting hevi long hemia, yu save ridim stori blong Elisa mo yangfala wokman blong hem long 2 Kings 6:14–17. ?Wanem nao i givim insperesen long yu abaot stori ia?

Yu save lukaotem tu long ol pej 31–33 blong Blong Ol Yut Oli Kam Strong: Wan Gaed blong Stap Mekem Ol Joes blong faenem ol sentens we i givim yufala strong tingting long paoa blong difendem trutok. O yu save mekem sem samting long ol toktok blong wan hym olsem “Holem Gud Loa” o “Yumi Mas Gohed” (STSP, Pej. 34, 10).

?Olsem wanem nao bae yu aplae wanem we we yu bin lanem aot long Abinadae? Vidio ia “Dare to Stand Alone” (Gospel Library) i soem ol situesen we yu save stanap from Kraes mo gospel blong Hem. ?Wanem narafala eksampol we yu tingting long hem?

Luk tu long Rom 1:16; 2 Timoti 1:7–8; “Chapter 8: The Call for Courage,” Teachings of Presidents of the Church: Thomas S. Monson (2022), 135–47; Gospel Topics, “Faith in Jesus Christ,” Gospel Library.

Tij wetem Spirit. “Gospel tijing we i gat paoa i no nidim nomo blong yu rere long wan lesen, be yu rere yuwan long saed blong spirit [blong] harem mo folem wanem we Spirit i lidim yu long hem blong tijim” (Teaching in the Savior’s Way, 17).

Mosaea 12:19–37

Mi nidim blong mekem hat blong mi i andastanem toktok blong God.

Ol pris blong King Noa oli bin save gud long toktok blong God Oli bin save kwotem ol ves blong skripja mo oli klemem se oli tijim ol komanmen. Be yet, i luk olsem gospel blong Sevya i no mekem wan samting long laef blong olgeta ?From wanem i olsem?

Tingting long hemia taem yu stap ridim Mosaea 12:19–37. ?Yu ting se i minim wanem blong mekem hat blong yu i andastanem toktok blong God? ?Wanem ol toktok o sentens we i givim insperesen long yu blong mekem eni jenis long wei we yu stap lanem gospel?

Mosaea 13:11–26

Ol komanmen blong God, mi mas raetem insaed long hat blong mi.

Tingting hevi long wanem we Abinadae i luksave se ol komanmen oli “no bin raetem long [ol] hat” blong ol pris (Mosaea 13:11). ?Wanem nao sentens ia i minim? Taem yu rid long Mosaea 13:11–26, tingting sapos yu bin raetem ol komanmen ia long hat blong yu.

Luk tu long Jeremaea 31:31–34; 2 Korin 3:3.

Mosaea 14–15

Jisas Kraes i bin safa from mi.

Long Mosaea 14–15, luk ol toktok mo ol sentens we oli tokbaot Sevya mo wanem nao Hem i bin safa from yu. ?Wanem ol ves nao i help blong mekem lav mo tangkyu blong yumi i long Hem, i dip moa?

Mosaea 15:1–12

?Olsem Wanem Jisas Kraes I Tugeta, Papa mo Pikinini?

Abinadae i bin tijim se God, we i Pikinini—Jisas Kraes—bae i Ridima (luk long Mosaea 15:1), we i laef long bodi blong mit mo bun, we i haf man mo haf God (ol ves 2–3). Hem i bin putum Hem fulwan i folem tingting blong God Papa (ol ves 5–9). From hemia, Jisas Kraes i tugeta, Pikinini blong God, mo i stret man blong i ripresentem God Papa long wol ia (luk long Jon 14:6–10).

Jisas Kraes tu i olsem Papa long wan wei we taem yumi akseptem fasin ia blong Hem blong pemaot man, yumi kam “sid blong Hem” mo “oli olgeta we bae oli kasem kingdom blong God” (Mosaea 15:11–12). Long nara toktok, yumi kam blong yumi bon bakegen long saed blong spirit, tru long Hem (luk long Mosaea 5:7).

?From wanem yu filim se i impoten blong save ol trutok ia abaot Papa long Heven mo Jisas Kraes? ?Olsem wanem nao, testemoni blong Abinadae i mekem fet blong yu long Tufala i kam strong moa?

Sam Tingting blong Tijim Ol Pikinini

Mosaea 11–13; 17

Mi save stanap from Jisas Kraes, iven sapos mi stanap miwan.

• Samtaem long ol laef blong yumi, yumi evriwan i fesem fasin blong fos blong mekem ol joes we i go agensem fet blong yumi long Jisas Kraes. ?Wanem nao ol pikinini blong yu oli save lanem aot long Abinadae blong stanap olsem wan witnes blong Jisas Kraes, iven taem i had blong mekem? Artwok long aotlaen ia o “Japta 14: Abinadae mo King Noa” (insaed long Ol Stori long Buk blong Momon, 38–42) i save helpem olgeta gat klia pikja long stori ia long Mosaea 11–13; 17. Askem olgeta, ?wanem nao oli laekem abaot Abinadae?

• Maet famli blong yu bae i laekem blong aktem sam pat blong stori blong Abinadae. Afta oli save aktem wan ril laef situesen blong praktisim wanem we bae oli mekem sapos ol narawan oli wantem olgeta blong mekem samting we i nogud. O oli save serem eksperiens taem oli bin smat blong folem Jisas Kraes. ?Olsem Wanem nao Abinadae i bin folem Jisas Kraes? (luk long Mosaea 13:2–9; 17:7–10). ?From wanem King Noa i no bin mekem wanem we hem i bin save se i stret? (luk long Mosaea 17:11–12).

Mosaea 12:33–36; 13:11–24

Mi mas obei long ol Ten Komanmen

• Ol pris blong King Noa oli bin save long ol komanmen be oli no bin “raetem long ol hat blong [olgeta]” (Mosaea 13:11). ?Olsem wanem nao yu save helpem ol pikinini blong yu blong oli save mo lavem ol komanmen? Ating oli save raetem ol komanmen long Mosaea 12:33–36 mo 13:11–24 long ol pis pepa we oli katem olsem hat. Taem oli mekem olsem, tokbaot long olgeta wanem mining blong ol komanmen ia mo olsem wanem blong folem olgeta. ?Olsem wanem yumi stap raetem ol komanmen ia insaed long ol hat blong yumi?

• Yu save singsing tu tugeta wan singsing abaot ol komanmen, olsem “Keep the Commandments” (Children’s Songbook, 146–47). ?Wanem nao ol blesing we oli kam taem yumi stap obei ol komanmen?

Ol skripja oli tijim yumi ol komanmen blong God.

Mosaea 14; 16:4–9

Papa long Heven i bin sendem Jisas Kraes blong i lidim mi i gobak long Hem.

• Nomata se i wan sot japta, Mosaea 14 i gat samfala toktok mo sentens we i tokbaot Jisas Kraes. Ating yu mo ol pikinini blong yu i save mekem lis blong olgeta taem yufala i ridim tugeta japta ia. Afta yu save tokbaot hao yu filim abaot Sevya taem yu stap stadi long ol toktok mo sentens ia.

• Blong tij abaot Jisas Kraes, Abinadae i talem toktok blong profet Aesea, we i komperem yumi wetem sipsip we i lus. Invaetem ol pikinini blong serem ol eksperiens we oli bin lusum wan samting o olgeta nao oli i bin lus. ?Oli bin filim olsem wanem? ?Oli bin mekem wanem? Afta yu save ridim tugeta Mosaea 14:6 mo 16:4–9. ?Olsem wanem nao yumi semmak olsem wan sipsip we i go longwe long God? ?Olsem wanem nao Jisas Kraes i stap helpem yumi blong kambak?

Blong moa tingting, luk long namba blong manis ia blong Fren magasin.

Fes blong Hem i Saen we i Saen Tumas, i kam long Jeremy Winborg