Na Saumaki Mai nei Alama Lailai, mai vei Gary L. Kapp

27 ni Me–2 ni June: “Era sa Vakatokai me ra Tamata ni Kalou”

Mosaia 25–28

Ni oti e tolu na itabatamata era tu ena vanua duidui, era sa duavata tale mai me dua ga na tamata na Nifaiti. O ira na tamata i Limiai, tamata i Alama, kei ira na tamata i Mosaia—kei ira mada ga na tamata i Saraemala, era sega ni kawa i Nifai—ena gauna oqo “era sa okati vata kei ira na Nifaiti” (Mosaia 25:13). E vuqa vei ira era sa vinakata talega me ra lewena na Lotu ni Turaga era sa lewena tiko na tamata i Alama. O koya gona o ira era “sa gadreva me taura na yacai Karisito”, era sa papitaiso ka “sa vakatokai me ra tamata ni Kalou” (Mosaia 25:23–24). Ni oti e vuqa na yabaki ni veileti kei na veivakabobulataki vesuki, sa qai vaka mai me ra na marautaka e dua na gauna ni bula sautu o ira na Nifaiti.

Ia, sega ni dede, era sa tekivu vakacacani ira na Yalododonu o ira na tawavakabauta. Na ka vakamosiyalo dina ena veika oqo sai koya ni vuqa vei ira na tawavakabauta era luvedra ga na tamata vakabauta—“na itabatamata tubu tiko mai” (Mosaia 26:1), ka oka tiko kina o iratou na luvei Mosaia kei na dua na luvei Alama. E tukuni ena itukutuku oqo ni a veisiko mana mai e dua na agilosi. Ia na cakamana dina ni italanoa oqo e sega walega ni baleti ira na agilosi era rairai mai vei ira na cauravou tagane sesewa. Na saumaki dina sa dua na cakamana, ena dua na sala se dua tale, ka sa gadrevi me yaco kece vei keda.

Vakasama eso ni Vuli ena iTikotiko kei na Lotu

Mosaia 26:1–6

Au sa rawa ni vukei ira eso tale me ra lako mai vei Jisu Karisito.

Na saumaki e ka ni tamata yadua—ena sega ni rawa ni vakadewataki me vaka na ivotavota vakawa vei ira na luve ni tamata. Ni o wilika na Mosaia 26:1–6, vakasamataka vakatitobu na vuna e rawa ni ra lutu tani kina “na itabatamata era tubu cake tiko mai” ka raica na isau ni nodra tawavakabauta. Sa rawa talega ni o vakasamataki ira na tamata o diva tu mo rawa ni o kauti ira mai vei Karisito. Ena gauna taucoko ni nomu vulica na Mosaia 25–28, ena rawa ni vakasolokakanataka na Yalotabu na veika o rawa ni cakava me vukei ira me vakatorocaketaka na nodra vakabauti Jisu Karisito.

Mosaia 26:6–39

Era vakasaqara o ira na italai yalodina ni Kalou me ra vakayacora na Nona lewa.

Ena so na gauna eda dau nanuma ni dua na iliuliu ni Lotu vakai Alama e kila vakavinaka na veika me cakava. Ena Mosaia 26 eda wilika kina e dua na leqa ena Lotu ka se bera vakadua ni bau sotava o Alama. Na cava a cakava o Alama ena ituvaki oqo? (raica na Mosaia 26:13–14, 33–34, 38–39). Na cava e vakatura na veika e sotava o Alama me baleta na ivakarau mo walia kina eso na dredre sotavi ena nomu vuvale se ena nomu veiqaravi ena Lotu?

Na cava a vakavulica na Turaga vei Alama ena Mosaia 26:15–32? Mo kila ni so vei ira na isau ni Turaga e a sega ni saumi vakadodonu kina na taro nei Alama. Na cava e tukuna vei iko me baleta na masu kei na ciqomi ni ivakatakila ki na tamata yadua?

Sa tawamudu na ivakavuvuli. Mo raicamatua na italanoa kei na ivakavuvuli ni volanikalou e rawa ni o bulataka vakacava ena nomu bula. Me vakataka, nomu rawa ni tarogi iko, “Na veika cava au sa sotava me vakataki Alama?” se “Na dina cava a vakavulica o Alama ena rawa ni vukei au?”

Mosaia 26:15–31

E vosoti au ena galala na Kalou niu veivutuni ka vosoti ira na tani.

Na veivutuni kei na veivosoti sa ulutaga e vakabibitaki tikoga ena Mosaia 26–27. Vakaraica na vosa kei na malanivosa e vakavulica na veivutuni kei na veivosoti ena Mosaia 26:22–24, 29–31; 27:23–37.

Eso na tamata era na vakataroga beka ke sa vosoti ira dina na Kalou. O na raitayalotaka vakacava ni o Alama na Qase ena rawa ni vakasalataka e dua na lewe ni Lotu mai Saraemala a kauwai tiko ena ka o ya? Na cava a vulica o Alama mai vua na Turaga ena Mosaia 26:15–31 e rawa ni vukea kina na lewe ni Lotu oqo? (raica talega na Moronai 6:8; Vunau kei na Veiyalayalati 19:16–18; 58:42–43).

Mosaia 27:8–37; 28:1–4

Ena vukui Jisu Karisito, au sa rawa niu veisau meu vinaka cake kina.

E matata ni a gadreva o Alama Lailai e dua na sucuvou vakayalo. O koya kei iratou na luvei Mosaia e ratou sa “tamata ivalavala ca sara” (Mosaia 28:4). Ia ni oti ga na nona saumaki mai, a vakadinadinataka o Alama ni saumaki mai sa ka bibi sara—ki na tamata kecega: “Kakua ni kurabui,” a kaya, “ni sa dodonu me sucu tale na tamata kecega” (Mosaia 27:25; vakamatatataki).

Ni o wilika na veika a sotava o Alama, ena Mosaia 27:8–37, sa rawa mo tovolea mo biuti iko ena nona italanoa. E rawa beka ni o vakasamataka na veika baleti iko ka gadrevi me veisautaki? O cei, me vakataki tamai Alama, e rawa ni masulaki iko tiko “ena vakabauta levu”? Na cava eso na ka o sa sotava esa veivuke me “vakatakila vei iko na kaukauwa kei na lewa ni Kalou”? (Mosaia 27:14). Na cava eso na ka “lelevu” sa kitaka na Turaga vei iko kei na nomu vuvale e dodonu mo “nanuma” tikoga? (Mosaia 27:16). Na cava o vulica mai na vosa kei na ivalavala nei Alama Lailai me baleta na kena ibalebale mo sucu tale? Na ivakaraitaki cava soti o sa bau raica?

Taura e dua na gauna mo vola eso na sala sa vukei iko tiko kina na iVakabula mo veisau—se mo sucu tale—kevaka sara mada ga e sega ni vakasakiti na veika o sotava se vakasauri ga me vakataki Alama. E tiko beka e dua na serenilotu o rawa ni lagata se rogoca e vakaraitaka na lomamu, me vaka na “I Stand All Amazed”? Sere ni Lotu, naba 193). O cei ena rawa ni yaga vua me rogoca na veika o sotava?

E vakatauvatana o David A. Bednar na sucu tale ki na kena vakarautaki e dua na kiukaba me dua na pikeli (raica na “E Dodonu mo Sucu Tale,” Liaona, Me 2007, 19–22). Na cava e vakavulica vei iko na veivakatauvatani oqo me baleta na saumaki mai?

Raica talega na Gospel Topics, “Become like Jesus Christ,” Gospel Library; “Alma Testifies He Has Been Born of God” (vidio), Gospel Library.

Mosaia 27:8–24

E dau rogoca na Kalou na noqu masu ka na sauma mai me vaka na Nona lewa kei na gauna.

E rairai o sa sotava na ituvaki i Alama na Qase kei na dua na lewe ni matavuvale e vakayacora tiko na digidigi veivakarusai. Na cava o kunea ena Mosaia 27:8–24 e solia vei iko na inuinui? Ena rawa ni vakauqeti iko vakacava na nomu masu ena vukudra eso?

Me ikuri ni vakasama tale eso, raica na ilavelave ni vula oqo ni Liaona kei na Me iSakisaki ni iTabagone ena kena mekasini.

Vakasama ni Nodra Tuberi na Gonelalai

Mosaia 26:30–31

Na iVakabula e vinakati au meu dau veivosoti.

• Me vukei ira na luvemu me ra kila na veika e vakavulica na Turaga vei Alama me baleta na veivosoti, e rawa ni o sureti ira me ra wilika na Mosaia 26:29–31 ka wilika na na levu ni gauna e basika kina na vosa “veivosoti” Na cava e vakatavulica vei keda na veitikina oqo me baleta na vosoti ira na tamata? (Raica talega na “Ni Vukei Au Mai Noqu Kalou,” Nodra Sere na Lalaii; 52.

• Me vakabibitaki na ivakaraitaki ni veivosoti ni iVakabula, e rawa ni o vakaraitaka e dua na Kena iyaloyalo ena kauveilatai ka wilika vata na Luke 23:33–34. Na cava a kerea o Jisu vei Tamada Vakalomalagi me cakava vei ira na tamata era biuti Koya ena kauveilatai? Ni oti na veivosaki oqo, e rawa ni ra dramataka na luvemuni na veivosoti vakai ira.

• Ena so na gauna ena dredre me da vosoti keda ni da caka cala. Ena veivuke vakacava na vosa ni Kalou vei Alama? Sa rawa vei ira na luvemu me ra vaka ni ra veivosaki tiko kei na dua e nanuma tu ni na sega vakadua ni vosoti koya na Kalou. Sureti ira na luvemu me ra vaqara e dua na ka ena Mosaia 26:22–23, 29–30 e rawa ni vukea na tamata oya.

Mosaia 27:8–37

Sa vukei au o Jisu Karisito meu sa vakataki Koya vakalevu cake.

• Na saumaki mai nei Alama Lailai kei iratou na luvei Mosaia e rawa ni vakaraitaka vei ira na luvemu ni, ena kaukauwa ni iVakabula, ni sa rawa vua e dua me veisau. O iko se o ira na luvemu e rawa ni o vakayagataka na droini ena ituvatuva oqo, na tabana ni itaviqaravi ena macawa oqo, kei na vica na ivolanikalou bibi mai na Mosaia 27:8–37 mo tukuna kina na italanoa (raica talega na “Wase 18: Sa Veivutuni o Alama Lailai,” ena iTalanoa ena iVola i Momani, 49–52). Vakamatatataka na tikina e 24, me vakavulica ni a veivutuni o Alama sa vukei koya kina o Jisu Karisito me veisau. Me ra matanataka na luvemu na italanoa kevaka era vinakata.

Sa Marau o Tamana, mai vei Walter Rane

Mosaia 27:8–24

Au sa rawa ni masu ka lolo vua na Kalou me vakalougatataki ira au lomana.

• Wilika vata na Mosaia 27:8–24, ka kerei ira na gone me ra raica na veika era a cakava o Alama kei ira nona tamata me ra vukei Alama Lailai kina. O sa bau lolovaka ka masulaka e dua? Wasea na veika o sotava vei ira na luvemu, ka laiva me ra wasea na nodra.

• O kila beka se o ira na luvemu e dua e gadreva tu na veivuke ni Kalou? Ni vakamuri na ivakaraitaki nei Alama, sa rawa mo dou masulaka vata na tamata oya ka, kevaka e rawa vei ira na luvemuni, mera lolovaka talega.

Me ikuri ni vakasama tale eso, raica na ilavelave ni vula oqo ena iTokani ena kena mekasini.

Na droini ni kena rairai mai na agilosi vei Alama Lailai, mai vei Kevin Keele