Wase 18
Sa Veivutuni o Alama Lailai
Sa lesi Alama o Mosaia na Tui me iliuliu ni Lotu e Saraemala. Qai digitaka eso tale na tamata me vukei koya me vakatavulici ira na Nifai.
Erau lomaleqa o Alama kei na Tui o Mosaia baleta ni ra sa vakavuna na nodra vakararawataki ena vuku ni nodra vakabauta na lewe ni Lotu.
E dua na luvei Alama ka yacana talega o Alama. E sega ni vakabauta o Alama Lailai na ivakavuvuli nei tamana ka sa yaco me tamata ivalavala ca.
Eratou vorata na Lotu o Alama Lailai kei iratou e va na luvena tagane o Mosaia na Tui. Eratou vakauqeta e vuqa na tamata me ra biuta na Lotu ka valavala ca.
E masulaka o Alama me na vulica o luvena me kila na dina ka veivutuni.
Eratou tomana tiko ga na nodratou saga me vakacacana na Lotu o Alama Lailai kei iratou na luvena tagane o Mosaia na Tui.
Sa rairai mai vei iratou na agilosi ena dua na siga. Sa vosa ena domo levu na agilosi ka sakure na qele.
Sa ka levu na nodratou rere na lima na cauravou oqo ka ra sa lutu ki ra. E liu eratou sega ni kila na veika e kaya na agilosi.
E rairai mai na agilosi me isau ni nodra masu na lewenilotu. E tarogi Alama Lailai na agilosi se cava beka e vakacacana tiko kina na Lotu.
E uneune na vanua ena gauna sa tukuna tiko kina na agilosi vei Alama Lailai me muduka na nona vakacacana tiko na Lotu.
Eratou sa lutu o Alama Lailai kei iratou na luvena tagane o Mosaia. Eratou sa raica e dua na agilosi, ka ratou kila ni sa uneune na vanua ena kaukauwa ni Kalou.
Sa kurabui sara o Alama Lailai ni sa sega ni vosa rawa. Sa malumalumu sara ka sega ni yavalata rawa na ligana.
Eratou sa laveti Alama Lailai yani na luvena tagane o Mosaia vua na tamana ka tukuna vua na veika kece a yaco.
Sa marau o Alama. Sa kila o koya ni sa sauma nona masu na Kalou.
Sa kaciva mai na lewevuqa o Alama me raica na veika sa vakayacora na Turaga vei iratou na luvei Mosaia kei luvena.
Era lolo vata ka masumasu o Alama, kei ira na iliuliu ni Lotu, ka kerea vua na Kalou me vukei Alama Lailai me kaukauwa tale.
Ni oti e rua na siga kei na bogi, sa rawa ni vosa ka veitosoyaki, o Alama Lailai.
A kaya vei ira ko koya sa veivutunitaka na nona ivalavala ca ka sa vosoti koya na Kalou.
E vakavulica ni tamata yadua qai bula dodonu me rawa ni da curu ki na matanitu ni Kalou. E tukuna me baleta na mosi levu e a sotava ena vuku ni nona ivalavala ca.
A marau o Alama lailai baleta ni o koya sa veivutuni ka sa vosoti koya na Kalou. E kila ni lomani koya na Kalou.
Alama lailai, kei ira na luvei Mosaia na tui sa tekivu vakavulica na dina ena vanua, tukuna tiko vei ira kece ka ra a raica ka rogoca.
Era a tovolea me vakadodonutaka na cala era sa kitaka. Era vakamacalataka na ivolanikalou vei ira na tamata ka vakavulica vei ira me baleti Jisu Karisito.
Kalougata ko Alama lailai kei iratou na luvei Mosaia me vaka era vakavuvulitaka na kosipeli. Vakarorogo vei ira na vuqa na tamata ka vakabauta.