Wase 41
Na iVakatakilakila Eso ni Sucu i Karisito
O Nifai, na luvei Ilamani, a solia na volatukutuku tabu kei na ivolanikalou vua na luvena ulumatua, o Nifai.
Era raica na Nifaiti na ivakatakilakila kei na caka mana lelevu eso era a tukuna na parofita ni na yaco ni bera na sucu i Jisu Karisito.
Ia era kaya eso na Nifaiti ni sa tasivi oti na gauna ni sucu i Jisu. Era sa vakalialiai ira ka se vakabauta tu na parofisai i Samuela na Leimanaiti.
Era sa rarawa na tamata vakabauti Jisu Karisito kei ira na parofita ni ra vakasamataka de na rairai veitarovi e dua na ka mai na kena vakayacori na parofisai e vuqa.
Era waraka ena lomadina na tamata na bogi ena sega kina na butobuto, ka sa ivakatakilakila ni sucu i Jisu Karisito.
Era sa digitaka e dua na siga o ira na tamata sega ni vakabauti Jisu Karisito me ra vakamatei kina na vakabauta kevaka e sega ni yaco na ivakatakilakila.
E sa rarawa o Nifai ena vuku ni nodra caka ca o ira ka sega ni vakabauta na iVakabula.
A masu tu ena siga taucoko o Nifai me baleti ira na tamata era na vakamatei.
Sa vakacegui Nifai na Turaga ka tukuna vua ni na sega ni butobuto na bogi oya. Sa na sucu o Jisu ena siga ka tarava e Peceliema.
Sa lako sobu na matanisiga ena bogi oya, ia e sega ga ni buto. E sa basika tu na ivakatakilakila ni sucu i Jisu Karisito. Era a kurabui na tamata.
O ira ka nakita me ra vakamatei ira na vakabauta era sa bale sobu ka vaka mera sa mate.
Erau sa rere ena vuku ni nodrau caka ca. Era sa qai kila oqo ni na sucu na iVakabula ka ra sa dina tu na parofita.
A rarama tu na bogi taucoko. Ni cadra cake na siga ena mataka ka tarava, era sa kila na tamata ni na sucu o Jisu Karisito ena siga oya. E sa vakayacori na parofisai.
Sa basika ena maliwalala e dua na kalokalo vou, me vaka ga era sa tukuna na parofita ni na vakakina.
Se saga ga o Setani me ra kakua ni vakabauta na tamata na ivakatakilakila eso era sa raica, ia e levu sa vakabauta.
O Nifai kei ira na iliuliu ni Lotu tale eso a papitaisotaki ira taucoko era sa vakabauta ka veivutuni.
Sa tu na itukutuku rekitaki ena vanua baleta ni sa vakayacori na nodra vosa na parofita. Sa sucu o Jisu Karisito.