Wase 34
Ilamani kei na 2,000 na Cauravou Bati
Era sa yalataka na tamata i Amoni kivua na Kalou ni ra na sega ni vala tale. Era a toka volekati ira na Nifaiti, ka sa taqomaki ira na Nifaiti.
Ni ravuti ira na Nifaiti o ira na meca ni tamata i Amoni, sa ra vinakata na tamata i Amoni mera voroka na nodra yalayala ka vukei ira na Nifaiti ena vala.
E sega ni vinakata o Ilamani kei ira na iliuliu eso ni Nifaiti mera voroka na nodra yalayala vua na Kalou na tamata i Amoni.
Era a sega ni caka yalayala na gonetagane ni tamata i Amoni. Era vinakata mera vukei ira na mataivalu ni Nifaiti ni valataka na nodra bula galala.
Era digitaka na rua na udolu na cauravou oqo mera taqomaka na nodra vanua. Era sa kerei Ilamani me nodra iliuliu.
Era sa yalodina, yaloqaqa, ka kaukauwa na cauravou oqo. Era sa yalodina ka nuitaki talega, ka ra muria na ivunau ni Kalou.
Sa liutaki ira na nona 2,000 na bati cauravou o Ilamani ki na ivalu. A sa vakatokai ira mera luvena, ka ra sa vakatokai koya me tamadra.
E dina ga ni ra se sega ni vala na luvei Ilamani, era sa sega ni rere. Sa vakavulici ira na tinadra mera vakabauta na Kalou ka kila ni na vukei ira ko koya.
A valuti ira vakavica na Leimanaiti o Ilamani kei na nona mataivalu. Era a muria taucoko na ivakaro i Ilamani na cauravou oqo.
Era a vala vaqaqa ka veivuke ena nodra vakasavi tani na meca. Ni cava na ivalu a raica o Ilamani ni ra sa mavoa taucoko na luvena ia e sega ni dua e mate.
E sa ka veivakurabuitaki. Sa marau saraga o Ilamani. Sa kila o koya ni ra a taqomaki tu na cauravou oqo ena vuku ni nodra vakabauta na Kalou.