Wase 51
Na Jeretaiti Ena iLakolako ki na Vanua Yalataki
Ni ra a keba tiko ena matasawa na Jeretaiti, a guilecava na tuakai Jereti me masu. A lako mai na Turaga ena dua na o me tukuna vua me veivutuni.
A veivutuni na tuakai Jereti ka masu. A vosoti tuakai Jereti na Turaga ia a kaya me kua ni ivalavala ca tale o koya.
E a tukuna na Turaga vei tuakai Jereti me tara na waqa me kauti ira na nona tamata ki na vanua yalataki.
A tukuna na Turaga vei tuakai Jereti na iwalewale ni kena ta na waqa.
Na waqa era a caka me tabucagi me kua ni curu rawa na wai ki loma.
A vakananuma na tuakai Jereti se me ra na cegu vakacava na tamata e loma ni waqa. A taroga na Turaga o koya na cava me na cakava.
E kaya na Turaga vei koya me cakava e dua na qara ena dela kei na boto ni waqa yadua. Na qara e rawa ni dolavi me curu kina i loma na cagi ka sogo me tarova na wai.
Na tuakai Jereti a tukuna vua na Turaga ni sa butobuto e loma ni waqa. Na Turaga a tarogi koya me vakasamataka e dua na sala me rarama kina na loma ni waqa.
Na rarama ena loma ni waqa ena sega ni rawati mai ena bukawaqa se me gole mai ena katubaleka baleta ena rawa ni boko.
A lako ki na dua na ulunivanua ko tuakai Jereti ka bulia e 16 na vatu lalai mai na dua na vatu levu. Na vatu lalai era vaka na iloilo makare na kedra irairai. A cakava o koya me rua na vatu ena walu na waqa.
Na tuakai Jereti a kauta sara na vatu lalai ki na dela ni ulunivanua. E kea a masu o koya vua na Turaga.
A kerea na tuakai Jereti vua na Turaga me tara na vatu me ra na solia na rarama e loma ni waqa.
Na Turaga a tara na vatu yadua ena iqaqalo ni ligana.
Ena vuku ni vakabauta levu i tuakai Jereti, a raica o koya na iqaqalo ni liga ni Turaga. E vaka e dua na iqaqalo ni liga vakatamata.
A qai vakaraitaki koya na Turaga ki vua na tuakai Jereti.
O Jisu a kaya ni na rawata na bula tawamudu na tamata era vakabauti koya.
O Jisu a vakavulica ka vakaraitaka vei tuakai Jereti e vuqa na ka. O Jisu a tukuna vei koya me vola na veika a raica ka rogoca.
Na tuakai Jereti a kauta sobu na vatu lalai mai na ulunivanua. A biuta o koya e dua na vatu ena muana ruarua ni waqa yadua. Era a solia na rarama e loma ni waqa.
Era a vodo na Jeretaiti kina waqa vata kei na nodra manumanu kei na kakana. Na Turaga a cakava e dua na cagi kaukauwa me liwava na waqa ki na vanua yalataki.
Na Turaga a taqomaki ira e loma ni wasawasa voravora. Era a vakavinavinakataka na Turaga ka vakacaucautaki koya ena lagasere.
Ni oti e 344 na siga e dela ni wai, sa kele yani na waqa ena matasawa ni vanua yalataki.
Ni ra sobu mai na waqa na Jeretaiti, era a tekiduru ka tagi ena reki.
Na Jeretaiti a tara na nodra vale ka teivaka na kakana ena vanua yalataki. Era a vakavulici ira na luvedra me ra vakarorogo vua na Turaga ka muria na nona vosa.