Wase 13
Senifi
Sa biuta tu mai o Senifi kei na dua na ilawalawa ni Nifaiti na nodra veivale mai Saraemala ka gole yani ki na vanua o Nifai, ena dua na vanua era a vakaitikotiko voli taumada kina na Nifaiti tale eso.
Era kunei ira na Leimanaiti era vakaitikotiko e kea. O Senifi kei na va vei ira na nona tamata era tou curu ena lomani koro levu mera lai vosa vua na tui. Era a kerea vei Leimani na Tui kevaka era rawa ni mai bula ena nona vanua.
E kaya ko Leimani na tui ni rawa ni nodra e rua na nona koro lelevu. E vinakata na tui mera mai bula ena nona vanua me rawa ni ra mai nona bobula.
O ira na tamata i Senifi era tara na nodra vale ka ra viri bai wavokita na nodra veikoro lelevu. Era tea na veimataqali sila kei na kau vuata. Era tu talega na nodra qele ni manumanu.
A tukuna vei ira na nona tamata na Tui o Leimani ni ra sa kaukauwa mai na Nifaiti. Sega ni dede era sa lako mai e vuqa na Leimanaiti me ra mai valuti ira na Nifaiti ka butakoca na nodra manumanu kei na iteitei.
Era cici yani na Nifaiti ki na koro ko Nifai. E kea sa vakaiyaragitaki ira na tamata o Senifi ena gasau kei na dakaititi, na iseleiwau, wau, kei na irabo. Era lako me ra lai valuti ira na Leimanaiti.
Ni bera ni ra vala, era masu na Nifaiti, mera kerea vua na Kalou na veivuke. E vakalougatataki ira na Nifaiti na Kalou ena kaukauwa, mera vakadrukai ira kina na Leimanaiti.
Ni oti na ivalu sa biuta o Senifi na sotia e na veikoro lelevu kece ni Nifaiti. E vinakata me taqomaki ira na nona tamata kei na nodra manumanu mai vei ira na Leimanaiti.
Era a bula voli tu ena vakacegu o ira na Nifaiti ena vuqa na yabaki. Era cakacaka ena were o ira na tagane ka ra wirica na waniculacula na marama ka ra cakaisulu kina.
Sa mate ko Leimani na Tui ka sa tui o luvena tagane. Sa tala na tui vou na nona mataivalu me lai valuti ira na Nifaiti.
Era sa vakaukauwataki tale na Nifaiti mai vua na Turaga. Era vakamatei ira na lewe vuqa na Leimanaiti, era qai cici yani na kena vo.