Wase 30
Vakasalataki Ira Tu na Luvena o Alama
Sa yalorarawa o Alama ena nodra sa mai dukadukali na Nifaiti. A vosa vakayadua vei ira na luvena o koya ena bulataki ni bula dodonu.
A tukuna o Alama vei Ilamani, na luvena ulumatua, me vakararavi vua na Kalou. Sa tukuna vua me baleta na agilosi a tala mai na Kalou ka tukuna vei Alama me tarova nona vakarusa tiko na Lotu.
A kune rarawa tu o Alama me tolu na siga ena vuku ni nona caka cala. A qai nanuma o koya na ivakavuvuli i tamana me baleti Jisu, ka kila ni sa rawa ni vosoti na nona ivalavala ca.
A masulaka na veivosoti o Alama, ka sa sosomitaka na mosi ni yalona na reki. E sa vosoti o koya baleta ni sa vakabauti Jisu Karisito ka sa veivutuni.
Mai na gauna oya sa vakatavulica o Alama na kosipeli vei ira na tani me rawa ni ra vakila na reki vata ga a vakila. Sa vakalougatataki Alama na Kalou ena vuku ni nona vakararavi vua na Kalou.
A solia na ivolatukutuku tabu o Alama vei Ilamani ka tukuna vua me tomana tiko na volai ni itukutuku ni nodra kawa.
A tukuna vua o Alama ni kevaka e muria na ivunau, na Kalou ena vakalougatataki koya ka vukei koya me taqomaka na ivolatukutuku.
Sa tukuna talega o Alama vei Ilamani me dau masu e veimataka kei na bogi ka tukuna vua na Kalou na veika kece e sa cakava tiko me rawa ni dusimaki koya voli na Kalou.
A marautaki na luvena o Sipiloni o Alama, ka sa dua na daukaulotu yaloqaqa kivei ira na Soramaiti. A yalodina tikoga o Sipiloni ena gauna mada ga era a vakaviriki koya kina ena vatu.
Sa vakananumi Sipiloni o Alama ni sala duadua ga me na vakabulai kina oya vei Jisu Karisito. Sa qai vakayaloqaqataki luvena o Alama me tomana tiko na vakavulici ni kosipeli.
A sega tu ni muria na ivunau na luvei Alama o Korianitoni. E a sega ni daukaulotu yalodina o koya ni vakavulici ira voli na Soramaiti.
Ena vuku ni ka sa cakava o Korianitoni, era sa sega ni vakadinata na Soramaiti na ivakavuvuli i Alama.
A tukuna vei Korianitoni o Alama ni sega ni rawa ni vunitaka na tamata na nodra ivalavala ca kivua na Kalou ka sa gadrevi kina me veivutuni o Korianitoni.
Sa vakavulici luvena o Alama ni na vakaturicake na tamata kecega ia ena bula vata kei na Kalou o ira ga na yalododonu.
Na bula oqo e sa gauna mera veivutuni kina na tamata ka qarava na Kalou, a kaya o Alama.
Ni vakananumi Korianitoni voli ni sa kacivi o koya me dua na daukaulotu, sa tukuna vua o Alama me lesu tale kivei ira na Soramaiti ka vakavulici ira na tamata me ra veivutuni.
Sa tomana o Alama kei ira na luvena na vakavulici ni kosipeli. Era sa veivakavulici ena kaukauwa ni matabete.