Wase 23
Amoni: E Dua na iTalai Levu
Ratou biuti Saraemala na luvei Mosaia e va me vakatavulici ira na Leimanaiti ena kosipeli. Ratou a dui lako ki na koro duidui.
A lako o Amoni ki na vanua ko Isimeli. Ni sa curuma na koro, era sa vesuki koya na Leimanaiti ka kauti koya vua na nodra tui, ko Lamonai.
A tukuna o Amoni vei Tui Lamonai ni a vinakata me tiko vata kei ira na Leimanaiti. A marau o Lamonai ka tukuna vei ira na nona tamata mera sereki Amoni.
Sa kaya o Amoni ni na dua vei ira na italai ni tui. Sa talai koya na tui me qarauna na nona qele ni manumanu.
Dua na siga ni a laki vagunuvi ira na qele ni manumanu o Amoni kei na italai eso, era a vatalabusesetaki ira na manumanu na Leimanaiti daubutako ka saga me ra butakoca.
Era sa rere na italai ka tiko vata kei Amoni. O Tui Lamonai a vakamatei ira na nona italai eliu ka a vakavuna na yali ni manumanu vei ira na daubutako oqo.
Sa kila tu o Amoni ni sa nona madigi oqo me vakayagataka kina na kaukauwa ni Turaga me ra-wa na lomadra na Leimanaiti. Ka na yaco kina mera vakarorogo ki na nona ivakavuvuli.
A tukuna o Amoni vei ira na italai ni kevaka era vakasoqoni ira na manumanu talabusese, ena sega ni vakamatei ira na tui.
A kunei ira totolo na manumanu o Amoni kei na italai eso ka vakauti ira lesu ki na vanua ni gunugunu.
Era sa lesu mai na Leimanaiti daubutako. A tukuna o Amoni vei ira na italai eso me ra yadrava na qele ni manumanu ni laki ravuti ira na daubutako o koya.
Era a sega ni rerevaki Amoni na Leimanaiti daubutako. Era nanuma ni na rawarawa na nodra vakamatei koya.
E sa tiko vata kei Amoni na kaukauwa ni Kalou. A mokuta ka vakamatea e so vei ira na daubutako o koya ena vatu, ka vakavuna mera cudru vakalevu na vo ni daubutako.
Era a tovolea ni vakamatei Amoni ena nodra iwau, ia ena veigauna kece ea laveta kina na nona iwau e dua na daubutako me ravuti Amoni, ea tamusuka o koya na liga ni daubutako. Ena domobula, era sa dro na daubutako.
Era sa kauta na liga tamusuki eso na italai kivua na tui ka tukuna vua na ka a vakayacora o Amoni.
E sa kurabui na tui ena kaukauwa levu i Amoni. A vinakata o koya me raici Amoni ia e rere baleta ni sa nanuma ni sai koya na Yalo Cecere.
Ni sa yaco me laki raici koya o Amoni, sa sega tu ni kila o Tui Lamonai na ka me kaya. A sega ni vosa o koya me dua na auwa.
Sa vukei Amoni na Yalo Tabu ni kila na nanuma ni tui. A vakamacalataka o Amoni ni sa sega ni o koya na Yalo Cecere. E sa tamata ga o koya.
Sa surevaka na tui vei Amoni na ka ga e vinakata kevaka me na tukuna vua na kaukauwa cava ea vakayagataka me vakadrukai ira kina na daubutako ka kila talega na nanuma ni tui.
Sa tukuna o Amoni ni ka duadua ga e vinakata oya me vakadinata o Tui Lamonai na ka ena tukuna. Sa kaya na tui ni na vakadinata na ka kecega e tukuna vua o Amoni.
A tarogi Tui Lamonai o Amoni kevaka e sa vakadinata na Kalou. Sa kaya na tui ni vakadinata tu ni dua na Yalo Cecere.
Sa kaya o Amoni ni Yalo Cecere oya na Kalou, ka sa bulia na ka kecega e lomalagi kei na vuravura, ka sa kila o koya na nanuma ni tamata kecega.
A tukuna o Amoni ni sa buli na tamata me ucuya na Kalou. A tukuna talega o koya ni sa kacivi koya na Kalou me vakatavulica na kosipeli kivei Lamonai kei ira na nona tamata.
Ni vakayagataka tiko na ivolanikalou, sa vakatavulici Tui Lamonai o Amoni me baleta na Veibuli, Atama, kei Jisu Karisito.
Sa vakabauti Amoni o Tui Lamonai ka masuta me vosoti tu ena nona ivalavala ca. Sa qai bale ki na qele o koya ka vaka tu me sa mate.
Era sa kauta na tui na italai kivua na watina ka vakadavori koya ena dua na idavodavo. Ni oti e rua na siga era nanuma na italai ni sa mate o koya ka navuca mera sa buluta.
A sega ni vakadinata na ranadi ni sa mate na watina. Ni sa rogoca na kaukauwa levu i Amoni, e sa kerei koya me vukea na tui.
Sa kila tu o Amoni ni sa rawai tu ena kaukauwa ni Kalou o Lamonai. A tukuna vua na ranadi o koya ni na yadra tale o Lamonai ena siga ka tarava.
Sa toka tikivi Lamonai na watina ena bogi taucoko. Ena siga ka tarava sa duri o Lamonai ka kaya ni sa raici Jisu Karisito. E sa vakasinaiti ena Yalo Tabu na tui kei na ranadi.
A vakatavulici ira na nona tamata o Lamonai me baleta na Kalou kei Jisu Karisito. O ira ka vakabauta era sa veivutunitaka na nodra ivalavala ca ka papitaiso.