Wase 35
O Kavetani Moronai kei Paorani
Sa marau ni rogoca o Kavetani Moronai ni sa taura lesu tale o Ilamani kei na nona mataivalu e vuqa na vanua ni Nifaiti mai vei ira na Leimanaiti.
Ia sa gadreva na veivuke o Ilamani kei na nona mataivalu. E sega ni veirauti na nodra sotia me taqomaka e vuqa sara na koro.
A vola o Kavetani Moronai e dua na ivola kivei Paorani, na turaganilewa levu ka kovana. Sa kerei Paorani o koya me vakauta mai e levu tale na sotia me vukea na mataivalu i Ilamani.
Era ravuta e dua na koro ni Nifaiti na Leimanaiti e a taura lesu tale o Ilamani. Era a vakamatei kina e vuqa na Nifaiti ka ra cemuri tani mai na koro na kena vo.
E cudruvi ira na iliuliu ni matanitu baleta ni ra sega ni vakauta na veivuke, sa vola tale o Moronai e dua na ivola kivei Paorani.
Sa vola o Kavetani Moronai ni sa vakamatei e vuqa na tamata baleta ni a sega ni vakauta mai o Paorani e levu tale na sotia.
Kevaka e sega ni vakauta vakatotolo mai o Paorani na tamata kei na kakana, ena kauta na nona mataivalu ki Saraemala o Moronai ka taura na veika ena gadreva na nona mataivalu.
Sega ni dede sa taura o Moronai e dua na ivola mai vei Paorani. A rarawa vakalevu o koya ni sotavi dredre voli o Moronai kei na nona mataivalu.
A tukuna vei Moronai o Paorani ni dua na ilawalawa Nifaiti dukadukali ka vakatokai na tamata via vaka tui era sega ni vinakati koya me turaganilewa levu. Era sa vakasaurarataki koya tani kei ira na nona ilawalawa mai Saraemala.
Sa vakuria o Paorani ni sa vakasoqona tiko e dua na mataivalu mera tovolea ni tauri Saraemala lesu tale.
Era a digitaka na tamata via vaka tui e dua na tui me nodra iliuliu ka sa leweni ira na Leimanaiti.
A sega ni cudru o Paorani ena ka e vola o Moronai. A vinakati o koya mera vagalalataki talega na Nifaiti.
A kerei Moronai o koya me kauta mai e vica na turaga me vukei koya ka kaya ni kevaka e vakumuna rawa o Moronai e levu na turaga ena ilakolako mai, ena tauri Saraemala lesu tale na mataivalu cokovata.
Sa marau o Kavetani Moronai ni se yalodina tikoga o Paorani ki na nona vanua ka se vinakata tikoga na veivagalalataki vei ira na nona tamata.
Sa lako ko Moronai kei na vica na nona turaga me laki sotavi Paorani. A colata o koya na yavu ni bula galala, ka veitomani kei ira ena ilakolako e udolu vakaudolu na tamata.
A lako vorati Saraemala na mataivalu cokovata nei Moronai kei Paorani. Era a vakamatea na nodra tui dukadukali na Nifaiti ka vesuki ira na nona tamata.
A qai vakau kakana o Moronai kei na 12,000 na sotia me laki vukei ira na mataivalu ni Nifaiti. Na mataivalu oqo a vakasavi ira tani na Leimanaiti, ka sa yaco tale na tiko sautu ena vanua.