Wase 12
Na Tui o Penijamini
Ko Penijamini e dua na Tui yalododonu ni Nifaiti. Ena nodra veivuke eso tale na tamata ivalavala dodonu, e kauta mai na vakacegu ki na vanua.
A sa qase sara o Penijamini na tui ka sa gadreva me vosa vei ira na nona tamata. A gadreva me tukuna vei ira ni o luvena tagane o Mosaia me sa na tui e tarava.
Era lako taucoko mai na veivanua ko ira na tamata mera mai soqoni volekata na valetabu. Era sa birika na nodra vale laca na kena katuba e vakanamata kina valetabu.
Sa vosa mai o Penijamini na tui mai na dua na vale cecere me rawa ni ra rogoci koya na Nifaiti.
A tukuna vei ira na nona tamata ni a tovolea sara vakaukauwa me qaravi ira. E kaya o koya ni sala ni qaravi na Kalou o ya ena nodra qaravi ira tale na tani.
A tukuna o Tui Penijamini vei ira na tamata me ra talairawarawa ki na ivakaro ni Kalou. O ira era yalodina ka muria na ivakaro era na marau ka na dua na siga era na lai bula vata kei na Kalou.
E kaya ko Penijamini na tui ni o Jisu Karisito ena vakarau sucu mai ena vuravura qo. Ena yacai tinana o Mary.
O Jisu e rawa ni cakava na cakacaka mana. Ena vakabulai ira na tauvimate ka vakabulai ira tale mai na mate. Ena rawa ni cakava mera rai na mataboko, ka ra rogo na didivara.
Ena mai sotava o Jisu na rarawa ka mate ena vuku ni nodra ivalavala ca na tamata kecega. O ira era na veivutuni ka vakabauti Jisu ena vosoti na nodra ivalavala ca.
A kaya o Penijamini na Tui vei ira na Nifaiti era na kanakuitataki Jisu o ira na tamata dau caka ca. Ka ra na vakamatei koya ena kauveilatai.
Ni na oti e tolu na siga, ena tucaketale o Jisu.
Ni oti na vosa nei Penijamini na tui, era bale sobu ki na qele na Nifaiti. Era veivutunitaka na nodra ivalavala ka ra gadreva me ra vosoti.
Era sa vakabauti Jisu Karisito na tamata, ka ra sa masu mera vosoti.
E vakatawana na lomadra na Yalo Tabu. Era sa kila ni sa vosoti ira na Kalou ka lomani ira. Era sa vakila na vakacegu kei na reki.
A tukuna o Tui Penijamini vei ira na nona tamata me ra vakabauta na Kalou. E vinakata o koya mera kila ni Kalou e bulia na ka kecega, ka sa vuku sara ka kaukauwa.
A tukuna na Tui Penijamini vei ira na tamata me ra yalomalumalumu ka dau masu ena veisiga. E vinakati ira na nona tamata me ra dau nanuma tiko na Kalou ka yalodina tiko.
A kaya vei ira na itubutubu me kakua ni ra veivala, se veiba na luvedra.
A tukuna vei ira mera vakatavulici ira na luvedra me ra talairawarawa ka mera dauloloma ka dau veiqaravi.
A vakasalataki ira na tamata me ra dau qarauna na veika era nanuma, kaya, ka cakava. Era sa yalodina ka talairawarawa ki na ivakaro me baleta na vo ni nodra bula.
A tarogi ira na tamata ko Penijamini na Tui kevaka era vakabauta na nona ivakavuvuli. Era kaya kece ni ra vakabauta. E veisautaki ira na Yalo Tabu, ia era sega ni via ivalavala ca.
Era veiyalayalati, ka yalataka me ra na muria na ivakaro ni Kalou. A marautaka o Penijamini na Tui.
Sa solia o Penijamini na Tui na dodonu vei luvena tagane o Mosaia me na Tui vou. Ni oti e tolu na yabaki a qai mate ko Penijamini na Tui.
Mosaia e dua na tui Yalododonu. A cakacaka vakaukauwa ka qaravi ira na nona tamata, me vakataki tamana.