Wase 14
Apinatai kei Noa na Tui
E tui yalododonu ko Senifi ni dua na ilawalawa Nifaiti. Ena gauna sa qase kina, sa yaco me tui na luvena o Noa.
E sega ni tui vinaka vakai tamana o Noa. A tamata valavala ca ka sega ni talairawarawa ki na ivakaro ni Kalou.
E vakasaurarataki ira na nona tamata me ra solia vua e dua na iwase ni nodra sila, manumanu, koula kei na siliva.
E vakayacora tu na veika oqo na Tui o Noa baleta ni vucesa. A cakava me ra solia kece vua na Nifaiti na veika kece sara e gadreva o koya me bula tiko kina.
A veisautaka o koya na bete vivinaka e lesia o tamana ka lesi ira na bete ivalavala ca. Era vakavulica na bete oqo mera ivalavala ca na tamata.
E tara e vuqa na vale levu totoka na Tui o Noa, oka kina e dua na valenitui levu kei na kena dabedabe vakaturaga. E ukutaki tu na vale eso oqori ena koula, na siliva, kei na kau sau levu.
E dau taleitaka ko Noa na tui nai yau e taura mai vei ira na nona tamata. E levu ga na gauna e vakayagataka tu kina o koya kei ira na nona bete ena gunu waini, ka ivalavala ca.
Na Kalou e tala mai e dua na parofita ka yacana o Apinatai vei ira na tamata i Noa. Sa mai vakaroti ira o Apinatai oya kevaka era sega ni veivutuni, era na yaco me nodra bobula na Leimani.
Ni sa rogoca o Noa na Tui na veika sa cavuta o Apinatai, sa cudru sara. A talai ira mai na nona tamata o koya me kauti Apinatai yani ki na itikotiko vakatui me rawa ni vakamatei koya.
Sa kau vua na tui o Apinatai. E vakataroga vua e vuqa na taro o Noa na tui kei ira na nona bete. Era saga me ra lawakitaki koya me rawa ni kaya na veika cala.
A sega ni rere na sauma na nodra taro o Apinatai. E kila o koya ni na vukei koya na Kalou. Era kurabui na bete ena isau ni taro nei Apinatai.
Sa cudru sara vakalevu o Noa na tui ka vakatauca na lewa vei ira na nona bete me ra vakamatei Apinatai. Sa kaya vei ira o Apinatai kevaka era tarai koya, ena vakamatei ira na Kalou.
Sa taqomaki Apinatai na Yalo Tabu me rawa ni kaya kece na veika e vinakata na Turaga me kaya. A ramase mai na matai Apinatai. Sa ra rere na tarai koya na bete.
Ni vosa tu ena kaukauwa ni Kalou, sa tukuna vei ira na tamata o Apinatai me baleta na nodra ivalavala ca. A wilika na ivakaro ni Kalou vei ira.
A tukuna vei ira ni mai sucu ko Jisu Karisito e vuravura. E cakava o Jisu me rawa ni veivutuni na tamata, vakaturicake tale, ka bula vata tale kei na Kalou.
E tukuna o Apinatai vei ira na tamata me ra veivutuni ka vakabauti Jisu Karisito se era na sega ni vakabulai.
E sega kece ni via vakabauti Apinatai na Tui o Noa kei ira nona bete vakavo ga e dua. E tukuna vei ira nona bete o Noa me vakamatei Apinatai. Era sa vesuki koya ka botolaki koya ena vale ni veivesu.
Na bete e vakabauti Apinatai e yacana o Alama. A kerea vua na Tui o Noa me sereki Apinatai.
Sa cudruvi Alama na tui, ka sa cemuri koya. Sa qai vakatalai ira nona tamata me ra vakamatei koya. Sa dro o Alama ka vuni, ka ra sega ni kunei koya nai talai ni tui.
Ni oti e siga tolu e vale ni veivesu, e kau mai matana na Tui o Noa o Apinatai. Sa kaya na tui vei Apinatai me vakasuka na veika sa tukuna me baleti koya kei ira na nona tamata.
A tukuna na Tui o Noa vei Apinatai me cakitaka na veika e tukuna, kevaka e sega sa na vakamatei.
E kila o Apinatai ni sa vosataka tiko na dina. Sa doudou o koya me mate, ka na sega ni cakitaka na veika e talai koya mai kina na Kalou.
E vakatalai ira na nona bete o Noa na Tui me vakamatei Apinatai. Era vesuki koya, mokulaki koya, ka vakamai koya me mate. Ni bera ni mate, sa kaya o Apinatai ni na mate talega ena bukawaqa o Noa na Tui.
Eso vei ira na Nifaiti era saqati Noa na Tui ka saga me vakamatei koya. Era gole talega mai na mataivalu ni Leimanaiti me ra vala kei na tui kei ira na nona ilawalawa.
Era dro na tui kei ira na nona ilawalawa mai vei ira na Leimanaiti, ia sa toboki ira na Leimanaiti ka tekivu vakamatei ira. E kaya na tui vei ira na nona tamata me ra biuta na nodra dui matavuvale ka dro.
E vuqa vei ira na turaga era sega ni lako. Era a vesuki maivei ira na Leimanaiti.
E vuqa vei ira na tamata era dro kei Noa na Tui era sa yalorarawa. Era vinakata me ra lesu ka vukei ira na watidra kei ira na luvedra kei na nodra tamata.
E sega ni vinakata o Noa na Tui mera lesu tale ki na nodra matavuvale o ira na tagane. E otataki ira me ra tiko kei koya.
Era sa cudruvi Noa na Tui. Era vakamai koya me mate, me vaka a parofisaitaka ko Apinatai. Era sa qai lesu tale ki na nodra matavuvale.