Wase 38
Na Labati ni Turaganilewa Levu
Sa yaco me ra nodra turaganilewa na Nifaiti na tamata dukadukali. Era sa totogitaki ira na tamata yalododonu ia sega o ira na tamata dukadukali.
Sa rarawa o Nifai ni raica na levu ni dukadukali ena kedra maliwa na tamata.
Dua na siga a masu tiko o koya ena valececere ni nona were. Nona were e toka tikiva na gaunisala levu ki na dua na makete e Saraemala.
Era rogoci Nifai ni masu tiko na tamata era lako voli ena gaunisala levu. Sa soqoni vata e dua na ilawalawa levu, ka vakilakila na vuna e sa rui rarawa kina.
Ni raici ira na tamata o Nifai, sa tukuna vei ira o koya ni sa rui rarawataka na nodra dukadukali. E tukuna vei ira mera veivutuni.
Sa vakaroti ira o koya ni kevaka era sega ni veivutuni, era na taura na nodra itikotiko kei na koro na nodra meca ka na sega ni vukei ira na Turaga ena nodra ravuti lesu na nodra meca.
E kaya o Nifai ni ra sa dukadukali vakalevu cake na Nifaiti mai vei ira na Leimanaiti baleta ni ra sa vakavulici ena ivunau na Nifaiti ia era sa sega ni talairawarawa kina.
E kaya o koya ni kevaka era sega ni veivutuni na Nifaiti, era na vakarusai.
A tiko ekea eso na turaganilewa dukadukali. Era vinakata me ra totogitaki Nifai na tamata ni vosa vakacacataki ira kei na nodra lawa.
Era duavata eso na tamata kei ira na turaganilewa dukadukali. Eso tale era vakabauti Nifai; era kila ni sa parofita o koya ka tukuna na ka dina.
Sa tukuna o Nifai vei ira na tamata ni ra sa talaidredre vua na Kalou ka sa vakarau me ra totogitaki kevaka era sega ni veivutuni.
Sa tukuna o Nifai vei ira na tamata mera laki vaqara na nodra turaganilewa levu. Ena davoca tu o koya na nona dra, ka a labati koya na tacina ni vinakata na nona itutu.
A cici e lima na turaga mai na ilawalawa me raica na turaganilewa levu. Era sega ni vakabauta ni dua na parofita ni Kalou o Nifai.
Ni ra sa raici Sisoramu, na turaganilewa levu, ni davo tu ena nona dra, era sa bale sobu ki na qele ena rere. Era sa qai kila oqo ni sa parofita o Nifai.
Era sa raica rawa na turaganilewa levu na italai i Sisoramu ka ra cici me tukuna vei ira na tamata. Era sa lesu ka raici iratou na le lima na turaga ni ratou sa davo no ekea.
Era nanuma na tamata ni ratou a labati Sisoramu na lima na turaga oya.
Era biuti iratou na le lima na turaga ki na valeniveivesu ka qai vakau itukutuku ki na veivanua taucoko ena koro ni sa mate na turaganilewa levu ka ra sa tiko e valeniveivesu na daulaba.
Ena siga ka tarava era sa gole na tamata ki na vanua ena bulu kina na turaganilewa levu. Era sa vakataroga na turaganilewa era a tiko ena were i Nifai na vanua eratou tiko kina na le lima na turaga.
Era kerea na turaganilewa mera raici iratou na daulaba beitaki.
O iratou na daulaba beitaki sai iratou na lima na turaga ka a cici mai na were i Nifai kivua na turaganilewa levu.
Ratou kaya na lima na turaga ni ratou a raica na turaganilewa levu ni davo tu ena nona dra, me vaka ga a tukuna o Nifai. Era sa qai beitaki Nifai na turaganilewa ni a tala e dua na tamata me labati Sisoramu.
Ni ratou kila ni sa parofita o Nifai, ratou sa veiba na lima na turaga kei ira na turaganilewa, ia era sa sega ni via vakarorogo. Era sa vesuki Nifai.
Era yalataka vei Nifai na turaganilewa na ilavo kei na nona bula kevaka ena tukuna o koya ni a bucina me vakamatei na turaganilewa levu.
Sa tukuna o Nifai vei ira na turaganilewa mera veivutunitaka na nodra dukadukali. Sa qai tukuna vei ira mera lako kivei Sianitumu, na taci Sisoramu.
A tukuna vei ira o Nifai mera tarogi Sianitumu kevaka a bucina vata kei Nifai o koya me rau labati Sisoramu. A kaya o Nifai ni na tukuna o Sianitumu “sega.”
Me ra na qai tarogi Sianitumu na turaganilewa kevaka a vakamatea na tacina. Ena tukuna tale o Sianitumu “sega,” ia era na raica na turaganilewa na dra ena nona isulu yara.
A kaya o Nifai ni na qai sautaninini ka vulaci o Sianitumu ka vakatusa ni a vakamatea na tacina.
Era sa lako ki na vale i Sianitumu na turaganilewa, ka sa yaco na veika taucoko a tukuna o Nifai. Sa sereki o Nifai kei iratou na lima na turaga.
Ni ra sa gole tani mai vei Nifai na tamata, eso e kaya ni sa parofita o koya; era kaya eso ni sa kalou. Sa lako i vale o Nifai, ka se rarawataka voli na nodra dukadukali.