Wase 43
O Jisu Karisito e Rairai vei ira na Nifaiti
E vuqa na Nifaiti era soqoni vata ena valetabu mai Vanuasautu. Era a qoroya na veisau lelevu ena nodra vanua.
Era veivosaki tiko na tamata baleti Jisu Karisito kei na ivakatakilakila ni nona mate.
Ni ra veivosaki tiko, era a rogoca e dua na domo rogo lailai mai lomalagi. Sa yaco kina me raragi na lomadra.
E liu era a sega ni kila na domo, ia ena gauna a vosa kina ena ikatolu ni gauna, era sa qai kila.
A domo i Tamada Vakalomalagi. E a vakamacalataki Jisu Karisito ka tukuna vei ira na tamata me vakarorogo vua.
O Jisu Karisito e a lako sobu mai lomalagi ka tu ena kedra maliwa na tamata. Era a rere ni vosa baleta ni ra sega ni kila na ka sa yaco tiko. Era nanuma ni o Jisu e dua na agilosi.
E a tukuna vei ira ni o koya o Jisu Karisito, o koya era a kaya na parofita ni na lako mai.
E kaya o Jisu vei ira na tamata me ra lako mai ka tara na ivakatakilakila ena sarisarina kei na ligana kei na yavana, o koya e a lauvako kina ena kauveilatai.
O Jisu a gadreva me ra kila na tamata ni sa nodra Kalou o koya ka ni a mate o koya me baleta na nodra ivalavala ca.
Era a lako yadudua na tamata ka tara na kena ivakatakilakila ena yasa i Jisu, e ligana, kei na yavana. Era a kila na tamata ni sai koya na iVakabula.
Era a qai vakacaucautaki Jisu na tamata ka cuva sobu e yavana ka vakarokorokotaki koya.
O Jisu a kacivi Nifai kei na 11 tale na turaga ki vua. A solia vei ira o koya na kaukauwa ni matabete ka vakavulici ira ena sala dodonu ni veipapitaisotaki.
A tukuna vei ira na Nifaiti me ra na vakabauti koya, veivutuni, ka muria na ivakaro. Kevaka era sega ni cakava, e sega ni rawa mera curu ki na nona matanitu.
O koya a vakatavulici ira na Nifaiti ena ivakarau ni masu vei Tamada Vakalomalagi. O koya a vakavulica talega vei ira me baleta na lolo ka kaya ni ra na vosoti kevaka era veivosoti vakataki ira.
Ni vakavulici ira oti na tamata ena vuqa na ka, a tukuna vei ira o Jisu me ra lako ki vale ka vakasamataka ka masulaka na veika a kaya o koya.
Era a tekivu me tagi na Nifaiti Era a sega ni vinakati Jisu me se biuti ira mada.
O Jisu e a lomani ira na Nifaiti. A tukuna vei ira me ra kauta mai na tamata tauvimate se mavoa vei koya me rawa ni vakabulai ira.
O Jisu a vakabulai ira na tamata oqo. Era a cuva kecega ka vakarokorokotaki koya.