Wase 46
O Jisu Karisito e Veivakavulici ka Masu vata kei ira na Nifaiti
O ira na Nifaiti era a raici Jisu Karisito a tukuna vei ira na nodra itokani ni na lesu tale mai o koya ena siga ka tarava. E vuqa na tamata a cakacaka sara vakaukauwa mera yaco ki na vanua e na tiko kina o Jisu.
Ena mataka tarava ko Nifai kei na so tale na tisaipeli a vakavulica na ilawalawa ka ra sa soqoni vata. Era a qai masu na tisaipeli me ra na ciqoma na Yalo Tabu.
A lako ki loma ni wai o Nifai ka papitaisotaki. A qai papitaisotaki ira na tisaipeli tale eso o koya.
Ni ra a papitaiso oti na tisaipeli, era a ciqoma na Yalo Tabu. E vaka me a vakavolivoliti ira na bukawaqa, ka ra lako sobu mai lomalagi na agilosi ka qaravi ira.
Ni ra se tiko na agilosi kei ira na tisaipeli, a lako mai ko Jisu ka tu ena kedra maliwa.
A tukuna na Karisito vei ira kece sara na Nifaiti me ra tekiduru ena qele. A tukuna o koya vei ira na nona tisaipeli mera masu.
Ni ratou sa masumasu tiko, o Jisu a lako vakalailai mai vei ira na tamata ka tekiduru ka masu vua na Tamada Vakalomalagi.
O Jisu a vakavinavinakataka na Tamada Vakalomalagi ena nona solia mai na Yalo Tabu vei ira na nona tisaipeli. Ka qai kerea o koya me soli na Yalo Tabu vei ira kecega era sa vakabauta na nodra vosa na tisaipeli.
A vakalougatataki ira na nona tisaipeli ko Jisu ni ratou sa masumasu tiko. A mata mamarau ki vei ira o koya, ka sa yaco me ra vaka na vulavula ni matana kei na isulu.
O Jisu a masu tale ena vukudra na nona tisaipeli. E a taleitaka o koya na nodra vakabauta levu.
O Karisito a tukuna vei ira na tamata me sa tini na nodra masumasu ia me ra masu tikoga e lomadra. A qai solia vei ira na sakaramede.
Sega ni dua e a kauta mai na madrai se waini, ia a vakarautaka kina na iVakabula ena dua na sala mana.
O Jisu Karisito a tukuna vei ira na Nifaiti ni na kau lesu tale mai na nona kosipeli ki vuravura ena veisiga mai muri.
A tukuna vei ira me ra vulica na ivolanikalou, ka me vola o Nifai ena nodra itukutuku na kena vakayacori na vo ni parofisai i Samuela na Leimani.
A qai vakavulici ira na tamata o Jisu mai na ivolanikalou. A tukuna vei ira me ra veivakavulici vakataki ira ena veika sa vakavuvulitaka vei ira ko koya.
O Jisu a lesu cake ki lomalagi, ka ra vakavulici ira na tamata na nona tisaipeli. O ira era vakabauta era a papitaisotaki, ka ciqoma na Yalo Tabu.
O ira na Nifaiti a tekivu me ra talairawarawa ki na ivakaro kece sara.