Wase 31
Sa Vakadrukai Saraemana o Kavetani Moronai
A vinakata o Saraemana, na nodra iliuliu na Leimanaiti, mera tomana tiko na nodra cati ira na Nifaiti na nona tamata ka vakaycora me nodra bobula.
Era vinakata na Nifaiti mera maroroya na nodra vanua ka me bula galala na nodra matavuvale. Era vinakata talega me ra galala ni qarava na Kalou.
E a iliuliu ni mataivalu ni Nifaiti o Kavetani Moronai. Ni ra sa lako mai na Leimanaiti me ra vala, a sotavi ira o Moronai kei na nona mataivalu ena vanua ko Jerisoni.
A vakarautaka o Kavetani Moronai na nona mataivalu ena iyaragi, isasabai, itataqomaki, kei na isulu vavaku.
E a levu cake na mataivalu ni Leimanaiti ia era sa rere ni raica na nodra itataqomaki na Nifaiti—e mamare ga na nodra isulu na Leimanaiti.
A sega ni doudou na mataivalu ni Leimanaiti me vala kei na mataivalu i Kavetani Moronai. Era a cici na Leimanaiti ki na lekutu ka nakita mera ravuta e duatani na koro ni Nifaiti.
Sa talai ira na yamata vuni o Moronai me ra wanonovi ira na Leimanaiti. A kerei Alama talega o koya me masuta na veivuke ni Turaga. Sa tukuna vei Alama na Turaga na vanua era na ravuta na Leimanaiti.
Ni sa ciqoma na itukutuku nei Alama o Moronai, a biuta tu o koya eso na sotia me yadravi Jerisoni ka tayabe kei na kena vo mera sotavi ira na Leimanaiti.
Era a vuni tu na sotia i Kavetani Moronai ena yasa ruarua ni uciwai ko Saitoni, ka wawa toka mera tagava na mataivalu ni Leimanaiti.
Sa tekivu na ivalu, ka ra tovolea na Leimanaiti mera dro ena takoso i uciwai, ia sa levu tale na Nifaiti e waraki ira tu ena yasana kadua.
Ni ra vala vakaukauwa cake mai na veigauna sa oti, a vakamatea o Saraemana kei na nona mataivalu e vuqa na Nifaiti. Era sa tagica na Nifaiti na veivuke ni Turaga.
Sa vakaukauwataka na Turaga na mataivalu ni Nifaiti. Sa wavoliti ira na Leimanaiti na mataivalu, ka vakarota o Moronai me sa mudu na veivala.
A tukuna o Moronai vei Saraemana ni ra sega ni via vakamatei ira na Leimanaiti na Nifaiti se vakabobulataki ira.
Sa kaya o Moronai ni ra sega ni rawa ni vakarusa na Leimanaiti na nodra vakabauti Jisu Karisito na Nifaiti. A kaya ni na tomana voli na Kalou nona vukei ira na Nifaiti ena vala kevaka era na yalodina tikoga.
Sa vakaroti Saraemana o Moronai me solia mai nona iyaragi. Era na sega ni vakamatei na Leimanaiti kevaka era sa yalataka ni ra na sega ni veivala tale kei ira na Nifaiti.
Sa solia o Saraemana na nona iyaragi vei Moronai ia e sega ni yalataka ni na sega ni vala. Sa solia lesu tale o Moronai na iyaragi me rawa ni ra taqomaki ira na Leimanaiti.
Sa sosovi Moronai o Saraemana me vakamatei koya, ia a mokuta ka vakamusutaka na iselewau i Saraemana e dua na sotia ni Nifaiti.
Sa qai tamusuka na sotia na kuli ni ulu i Saraemana, cobara ki na muailiu ni nona iselewau, ka vakatura ki macawa.
A tukuna vei ira o koya, ni ra na bale na Leimanaiti me vaka sa bale na kuli ni ulu, vakavo ke ra sa sorova na nodra iyaragi ka yalataka era na sega tale ni vala.
E vuqa na Leimanaiti sa biuta na nodra iyaragi ena yava i Moronai ka yalataka ni ra na sega ni vala. Era sa vakatarai mera lako ena vakacegu.
Ni cudru katakata tu, sa vakayavalati ira na vo ni sotia o Saraemana mera vala. Sa vakamatea e vuqa vei ira na sotia i Moronai.
Ni sa raica o Saraemana ni na vakamatei o koya kei ira taucoko na nona tamata, sa vakatakekere vei Moronai o koya me vakabulai ira. Sa yalataka o koya ni na sega ni vala tale kei ira na Nifaiti.
Sa muduka o Moronai na veivala ka taura na nodra iyaragi na Leimanaiti. Ni sa yalataki oti mera kakua ni vala, era sa biubiu na Leimanaiti.