Wase 27
O Korio
A lako mai ki Saraemala e dua na turaga o Korio. A sega ni vakabauti Jisu Karisito o koya ka vunautaka ni veika era sa tukuna na parofita me baleta na iVakabula e sega ni dina.
Sa tukuna o Korio vei ira na tamata ni ra sa lialia mera vakabauta ni na lako mai ki vuravura o Jisu ka vakararawataki ena vuku ni nodra ivalavala ca.
E kaya ni ra sega ni rawa ni totogitaki na tamata ena nodra ivalavala ca baleta ni sa sega na bula ni oti na mate. Sa vuqa na tamata era vakabauti Korio. Era sa dau cakaca.
A tovolea o Korio me vunau vei ira na tamata i Amoni, ia era a sega ni vakarorogo. Era a vesuki koya ka kauti koya kivei Amoni, ka sa vakasavi koya tani mai na koro.
Sa lako o Korio ki na vanua ko Kitioni, ia era sega ni vakarorogo talega vua na tamata ekea. Sa talai koya kivei Alama na turaganilewa levu.
A tarogi Korio o Alama kevaka sa vakabauta na Kalou. E kaya o Korio ni sega. A vakadinadinataka o Alama ni sa dua tiko na Kalou ka ni na lako mai na Karisito.
A vinakata o Korio me vakayacora o Alama e dua na cakamana me vakadinadinataka ni sa tiko na Kalou. E kaya o Korio ni na vakabauta na Kalou kevaka e raica e dua na ivakatakilakila ni kaukauwa ni Kalou.
Sa tukuna o Alama vei Korio ni sa raica o koya e vuqa na ivakatakilakila ni kaukauwa ni Kalou mai na ivolanikalou kei na nodra ivakadinadina na parofita kece sara.
Sa kaya o Alama na vuravura kei na veika kece e tu kina kei na nodra veitosoyaki na vuravura tale eso ena maliwa lala esa ivakatakilakila talega ni sa dua tiko na Kalou.
Se tawavakabauta tikoga o Korio. Sa rarawa o Alama ena vuku ni tovo dukadukali i Korio ka vakaroti koya ni na rawa ni vakarusai na nona bula.
Se vinakata tikoga o Korio e dua na ivakatakilakila me vakadinadinataka ni sa dua tiko na Kalou. Sa kaya o Alama na ivakatakilakila mai vua na Kalou sai koya ni na sega ni vosa rawa o Korio.
Ni tukuna oti o Alama na ka oqo, sa galu o Korio.
Sa vola o Korio ni sa kila ni sa vu mai vua na Kalou na ivakatakilakila oqo ka sa kila taumada tu ni sa dua tiko na Kalou. A kerei Alama o koya me masu ka vagalalataka na itotogi.
Sa kila tu o Alama ni kevaka e rawa ni vosa o Korio ena rawa tale vua me lasutaki ira na tamata. Sa kaya o Alama ni sa vakatau vua na Turaga kevaka me na vosa tale o Korio.
Sa sega ni vakatara na Turaga me vosa tale o Korio. A lako voli e veivale o Korio, me kere kakana.
Sa vakauta na turaganilewa levu e dua na ivola ki na vanua taucoko me tukuna na ka sa yaco vei Korio. A tukuna vei ira ka a vakabauti Korio mera veivutuni. Era sa veivutuni na tamata.
A laki tiko vata kei ira na Soramaiti o Korio. Dua na siga ena nona vakatakekere voli, a buturaki sobu ka mani mate.