Wase 49
Momani kei na Nona iVakavuvuli
Ni oti e vuqa na yabaki mai na nona sikovi ira na Nifaiti o Jisu Karisito, e dua na ilawalawa lailai era a biuta na Lotu ka vakatokai ira me Leimanaiti.
E a qai yaco emuri me ra ca vakalevu sara voleka ni o ira kece na tamata, na Nifaiti kei na Leimanaiti ruarua.
E a dua na turaga yalododonu, ko Amaroni a tu vua na ivolatukutuku tabu. Na Yalo Tabu a tukuna vua me vunitaka me rawa ni ra taqomaki kina.
A tukuna ko Amaroni vei Momani, e dua na gone tagane yabaki 10, na vanua era vunitaki tu kina na ivolatukutuku. A kila tu ko Amaroni ni rawa ni nuitaki Momani.
Ni sa yabaki 24, o Momani me na taura na peleti i Nifai ka volaitukutukutaki ira kina na nona tamata.
Ni yabaki 11 o Momani, sa tekivu e dua na ivalu ena kedrau maliwa na Nifaiti kei na Leimanaiti. Era a qaqa na Nifaiti, ka sa yaco tale na tiko sautu.
Ia era a rui dau caka ca sara na Nifaiti ka a kauti iratou tani kina na tisaipeli e lewe tolu na Turaga, ka mai cava kina na caka mana kei na veivakabulai. Na Yalo Tabu a sega tale ni qai tuberi ira na tamata.
Ni a yabaki 15 o Momani, o Jisu Karisito a sikovi koya. Ea vulica o Momani e levu tale na ka me baleta na iVakabula kei na nona vinaka.
A vinakata o Momani me vunau vei ira na tamata, ia o Jisu a tukuna vua me kakua baleta era sa rui dau caka ca. Na yalodra a sa vorata na Kalou ena loma kaukauwa.
Sega ni dede sa tekivu e dua tale na ivalu. O Momani a tamata levu ka kaukauwa, ka ra a digitaki koya na Nifaiti me liutaka na nodra mataivalu.
O ira na Nifaiti era a valuti ira na Leimanaiti me vuqa na yabaki. A tovolea o Momani me vakayaloqaqataki ira na nona tamata me ra valataka na nodra matavuvale kei na itikotiko.
Ia, a yaco me ra dau caka ca sara na Nifaiti, ka sega ni vukei ira kina na Turaga.
O Momani a tukuna vei ira na Nifaiti ni ra na vakabulai ga kevaka era veivutuni ka papitaisotaki. Ia e ra a bese na tamata.
Era a boletaka na nodra kaukauwa, ka kaya ni ra na vakamatei ira kece na Leimanaiti. Ena vuku ni nodra caka ca na Nifaiti, e a bese ni qai liutaki ira tale o Momani.
A tekivu me ra ravuti ira na Nifaiti ena vei ivalu kece na Leimanaiti. A lewa o Momani me liutaka tale mada na mataivalu ni Nifaiti.
A kila o koya ni o ira na Nifaiti dau caka ca ena sega ni qaqa e na ivalu. Era a sega ni veivutuni se masulaka me baleta na veivuke era gadreva.
O Momani a kauta taucoko na ivolatukutuku mai na delana ka a vunitaki ira tu kina ko Amaroni ka volavola vei ira na tamata era na wilika na ivolatukutuku ena dua na siga.
A vinakata o koya na tamata kece, oka kina o ira na Jiu, me kila me baleti Jisu Karisito, me ra veivutuni ka papitaiso, ka me ra bulataka na kosipeli ka vakalougatataki.
Na Yalo Tabu a vakauqeti Momani me biuta vata na peleti lailai i Nifai, ka tu kina na vei parofisai ni nona lako mai na Karisito, kei na peleti i Momani.
O Momani a liutaki ira na Nifaiti ki na vanua ko Kumora, ka ra a vakarau kina me valuti ira na Leimanaiti.
A sa qase sara tiko mai o Momani. A kila o koya ni oqo e sa na iotioti ni vala. A sega ni vinakata o koya me ra kunea na ivolatukutuku tabu na Leimanaiti ka vakarusai ira.
A mani solia na peleti ko Momani vua na luvena, o Moronai, ka vunitaki na kena vo na peleti e na ulunivanua o Kumora.
Na Leimanaiti e ra a kabai ka vakamatei ira taucoko ka vo ga e 24 na Nifaiti. Momani a sa mavoa.
A rarawa o Momani ni ra sa mate e vuqa sara na Nifaiti, ia e kila o koya ni ra a mate baleta ni ra a cati Jisu.
A tovolea o Momani me vakatavulica ira na Nifaiti na dina. A sa tukuna vei ira na bibi ni vakabauti Jisu Karisito.
E a tovolea me vakavulici ira me tu vei ira na inuinui ena Veisorovaki i Jisu Karisito kei na loloma uasivi, sai koya na loloma savasava i Karisito.
Ka a vola ko Momani na ivola vua na luvena, o Moronai, o koya ka a vakavulica talega na kosipeli vei ira na Nifaiti.
O Momani a vola me baleta na rerevaki ni nodra caka ca na Nifaiti. A tukuna o koya vei Moronai me yalodina tikoga vei Jisu Karisito.
E ra a vakamatei Momani na Leimanaiti kei ira kece sara na Nifaiti ka vo ga o Moronai, o koya a vakacavara na volai ni ivolatukutuku.