Wase 22
Na iLesilesi i Alama ki Amonaia
A lomaleqataka o Alama na nodra caka ca na Nifaiti, sa mani navuca me vakayagataka na vo ni nona gauna ena vunautaki ni kosipeli. A digitaki Nifaia me sosomitaki koya vaka turaga ni lewa.
A vakavulica na kosipeli o Alama ena vanua taucoko. Ni tovolea o koya me vunau e Amonaia, era sega ni via vakarorogo na tamata. Era botolaki koya tani mai na koro.
A rarawa o Alama ni ra sa rui dukadukali na tamata e Amonaia. A biubiu o koya ka gole ki na dua tale na koro.
Sa rairai vei Alama e dua na agilosi ka vakacegui koya. Sa tukuna vua na agilosi me lesu tale ki Amonaia ka vunau tale. A vakusakusa lesu o Alama.
E sa viakana o Alama. Ni sa curu ki na koro, a kerea eso na kakana ki na dua na turaga. A mai tukutuku taumada e dua na agilosi kivua na turaga ni na tadu mai o Alama ka sa dua na parofita ni Kalou.
Na turaga oqo, o Amuleki, a kauti Alama ki na nona vale ka vakani koya. A tiko o Alama vata kei Amuleki kei na nona matavuvale me vuqa na siga. A vakavinavinakataka na Kalou ena vuku ni matavuvale i Amuleki ka vakalougatataki ira.
A tukuna vei Amuleki o Alama na nona veikacivi me vakavulici ira na tamata e Amonaia. A lako vata kei Alama o Amuleki me vakavulici ira na tamata. Sa vukei rau na Yalo Tabu.
Sa tukuna o Alama vei ira na tamata me ra veivutuni de na vakarusai ira na Kalou. A kaya ni na lako mai o Jisu Karisito ka vakabulai ira sa vakabauti koya ka veivutuni tu.
Sa yaco mera cudru na tamata e Amonaia. Era a tovolea me vesuki Alama ki na vale ni veivesu, ia sa taqomaki koya na Turaga.
Sa qai tekivu veivakavulici o Amuleki. Sa kilai Amuleki e vuqa na tamata; e a sega ni vulagi o koya me vakataki Alama. A tukuna vei ira o koya me baleta na agilosi e a raica.
A kaya o Amuleki ni sa parofita ni Kalou o Alama ka sa tukuna na ka dina. Era a kurabui na tamata ni rogoca na ivakadinadina i Amuleki.
Sa yaco me cudru eso na tamata, vakabibi e dua na turaga caka ca na yacana o Sisoromi. Era a saga me bacani Amuleki ena taro eso, ia sa tukuna vei ira o koya ni sa kila tu na nodra ivadi.
A vinakata o Sisoromi me vakarusa na veika kecega sa vinaka. Ena vakavu leqa o koya, ka ra na qai saumi koya vakailavo na tamata me walia na veileqa a vakavuna.
A sega ni vakacalai Amuleki rawa o Sisoromi, ka sa soli lavo vua me kaya ni sa sega na Kalou. Sa kila o Amuleki ni bula tiko na Kalou ka kaya ni sa kila vakakina o Sisoromi ia sa lomana vakalevu cake na ilavo mai vua na Kalou.
Sa qai vakavulici Sisoromi o Amuleki me baleti Jisu kei na Tucaketale kei na bula tawamudu. Era sa kurabui na tamata. Sa tekivu me sakure o Sisoromi ena rere.
Sa kila tu o Sisoromi ni sa tiko vei Alama kei Amuleki na kaukauwa ni Kalou baleta ni rau sa kila na lomana. A vakatataro ka mai vakarorogo tu o Sisoromi ni vakatavulici koya o Alama ena kosipeli.
Sa vakabauti Alama kei Amuleki eso na tamata ka tekivu mera veivutuni ka vulica na ivolanikalou.
Ia e levu cake na tamata era vinakata mera vakamatei Alama kei Amuleki. Era sa vesuki rau ka kauti rau kivua na turaga ni lewa levu.
Sa rarawa o Sisoromi ni a daucaka ca ka vakavuvuli lasu tu vei ira na tamata. A vakamasuti ira na tamata o koya mera vagalalataki Alama kei Amuleki.
A kolotaki tani mai na koro o Sisoromi kei ira tale eso ka ra vakabauta na ivakavuvuli i Alama kei Amuleki. A virilaki ira ena vatu na tamata daucaka ca eso.
Sa qai sokomuni ira na marama kei na gone vakabauta o ira na tamata daucaka ca ka kolotaki ira, vata kei na nodra ivolanikalou, ki na bukawaqa.
A vakasaurarataki o Alama kei Amuleki me rau saravi ira na marama kei na gone ni ra mate ena bukawaqa. A vinakata o Amuleki me vakayagataka na kaukauwa ni Kalou me vakabulai ira.
Ia sa tukuna vei Amuleki o Alama me kakua ni tarova na veivakamatei baleta ni ra na tiko vataga oqo kei na Kalou na tamata mate ka ra na totogitaki na tamata daucaka ca.
Sa sabaki Alama kei Amuleki vakavica na turaga ni lewa levu ka vakalialiai rau baleta ni rau a sega ni vakabulai ira na marama kei na gone ka kama tu. Sa qai kolotaki rau o koya ki na vale ni veivesu.
A gole ki na vale ni veivesu eso tale na daucaka ca ka vakacacani Alama kei Amuleki ena sala e vuqa, oka kina na nodrau sega ni vakani ka kasiviti rau.
Sa kaya na turaga ni lewa levu ni kevaka e vakayagataka o Alama kei Amuleki na kaukauwa ni Kalou me sereki rau kina, ena vakabauta o koya. E sa sabaki rau tale.
Sa duri o Alama kei Amuleki. A masu o Alama ka kerea vua na Kalou me vakaukauwataki rau ena vuku ni nodra vakabauti Karisito.
Sa vakatawani Alama kei Amuleki na kaukauwa ni Kalou, ka rau sa drutia na dali ka vesuki rau tu. Era sa rere na tamata daucaka ca ka saga mera cici ia era bale sobu.
Sa sakure na buturara, ka sa lutuki ira na tamata daucaka ca na lalaga ni vale ni veivesu. Sa taqomaki Alama kei Amuleki na Turaga, ka rau sega ni mavoa.
Era a gole mai na tamata ni Amonaia me ra raica na ka sa yaco tiko. Ena nodra raici Alama kei Amuleki ga ni lako tani mai na vale ni veivesu kasere, era sa domobula ka dro tani.
Sa kaya na Turaga vei Alama kei Amuleki me rau lako ki Saitomi. Rau sa raica ekea na tamata buladodonu. A tiko talega ekea o Sisoromi ka sa tauvimate bibi.
Sa marau o Sisoromi ni raici Alama kei Amuleki. A lomaleqataka o koya de rau sa na vakamatei ena vuku ni ka a cakava. Sa kerekere tu vei rau me vakabulai koya.
Sa vakabauti Jisu Karisito o Sisoromi ka sa veivutunitaka na nona ivalavala ca. Ni masulaki koya tu o Alama, sa vakabulai kusarawa o Sisoromi.
A papitaisotaki o Sisoromi ka tekivu me vunautaka na kosipeli. E vuqa vei ira a papitaisotaki talega.
Era a vakamatei taucoko na tamata daucaka ca ni Amonaia mai na mataivalu ni Leimanaiti, me vaka a parofisaitaka o Alama.