Wase 28
Ko ira na Soramaiti kei na Rameumitomi
Era a lewena tu mada na Lotu ni Kalou o ira na Soramaiti ia sa yaco mera dukadukali ka qaravi kalou matakau.
Era a vinakata na Nifaiti me ra tarova nodra laki duavata kei ira na Leimani o ira na Soromaiti, sa mani gole o Alama kei na so tale na daukaulotu mera vunautaka na vosa ni Kalou vei ira na Soramaiti.
Era a kurabui ka rarawa na daukaulotu oqo ena ivakarau ni nodra sokalou na Soramaiti ena nodra vale ni lotu, ka vakatokai na vale ni sokalou.
Ena loma donu ni vale ni lotu, era a tara na Soramaiti e dua na vatavata cecere ka vakatokai na Rameumitomi. E a tiko na tikina me rauta me tucake ga kina e e dua na tamata ena muana i cake.
Era veivukevuke na Soramaiti ena duri ekea, dodoliga ki lomalagi ka cavuqaqataka ena domoilevu na masu vata ga.
Ena masu oqo, era kaya na Soramaiti ni sega ni vakayago na Kalou; e yalo ga o koya. Era kaya talega ni na sega na Karisito.
Era nanuma na Soramaiti ni sa digitaki ira duadua ga na Kalou me ra vakabulai ena matanitu vakalomalagi. Era sa vakavinavinaka ni ra mai nona tamata digitaki.
Ni ra sa masu oti na Soramaiti yadua, era lako ki vale ka sega ni masu se vosa tukuna tale e dua na ka me baleta na Kalou me dua taucoko na macawa.
Era a domona na Soramaiti vutuniyau na koula kei na siliva, ka ra dokadokataka na nodra iyau vakavuravura. A rarawa o Alama ni raica na nodra itovo dukadukali.
A masulaki koya kei ira na nona daukaulotu o Alama me tiko vei ira na kaukauwa, na yalovakacegu, ka qaqa ena nodra cakacaka.
Ni sa kere veivuke oti me kauti ira lesu mai na Soramaiti ki na dina, a vakasinaiti o Alama kei na vo ni daukaulotu ena Yalo Tabu.
Era sa qai veiseyaki na daukaulotu mera laki vunau. Sa vakalougatataki ira na Kalou ena kakana kei na isulu ka vakaukauwataki ira ena nodra cakacaka.
Era a sega ni vakatarai ki na loma ni vale ni lotu na Soramaiti dravudravua. Sa tekivu me ra vakarorogo vei ira na daukaulotu o ira oqo.
E vuqa a tarogi Alama ena ka me ra kitaka. E tukuna vei ira o Alama ni sega ni gadrevi me ra tiko ena loma ni dua na vale ni lotu me ra qai masu kina se qarava na Kalou.
A tukuna vei ira me ra vakabauta tiko na Kalou. Sa qai vakatavulici ira o Amuleki baleti Jisu Karisito kei na ituvatuva ni Kalou me baleti ira na luvena.
Era sa biubiu na daukaulotu, ka ra vakasavi tani mai na koro na Soramaiti era a vakabauti ira. Era sa gole na vakabauta ka laki tiko vata kei ira na tamata i Amoni ena vanua ko Jerisoni.
E dina ga ni ra a vakarerei ira na tamata i Amoni na Soramaiti dukadukali, a vukei ira na Soramaiti yalododonu na tamata i Amoni ka solia vei ira na kakana, isulu, kei na vanua.