Wase 47
O Jisu Karisito e Vakalougatataki ira na Nona Tisaipeli
Ena dua na siga ni ra lolo ka masumasu vata tiko na tisaipeli, o Jisu Karisito a lako mai vei ira.
A ra tarogi koya ko ira na tisaipeli na yaca cava me vakayacani kina na Lotu. E kaya o Jisu ni sa dodonu me vakatokai vua baleta ni sa nona Lotu.
E vakamacalataka o Jisu vei iratou na nona tisaipeli ni a talai koya mai na Tamada Vakalomalagi ki vuravura me mai solia na nona bula me baleti ira na tamata kecega.
E kaya o koya ni o ira kece era veivutuni, papitaiso ena yacana, ka muria na nona ivakaro era na tu tawacala e mata i Tamada Vakalomalagi.
A kaya na iVakabula vei ira na nona tisaipeli me ra cakava na veika era sa raica ni cakava o koya. E a vakarautaka o koya na ivakaraitaki vei ira.
A tukuna talega vei ira o koya me ra vola na veika era sa raica ka rogoca me ra kila kina na tamata.
A tarogi ira na nona tisaipeli o Jisu na cava era vinakata mai vei koya. E ciwa vei ira a vinakata me ra tiko vata kei koya ni sa cava na nodra bula e vuravura.
A yalataka vei ira o Jisu ni gauna era sa yabaki 72 kina, era na lako yani vua ki lomalagi.
E tolu tale vei ira na tisaipeli a sega ni doudou me taroga na ka era vinakata, ia sa kila tu o Jisu. Eratou a vinakata me tikoga e vuravura ka vakavulica na kosipeli me yacova ni lako tale mai o Jisu.
Na iVakabula a yalataka ni ratou na sega ni vakila na mosi se na rarawa ka na sega ni mate. Eratou na vakavulici ira na tamata ena kosipeli me yacova na nona lesu mai.
O Jisu a tarai ira yadua na tisaipeli vakavo ga na lewe tolu ka na tiko ga e vuravura. Sa qai lako o koya.
Na tisaipeli e lewe tolu a kau ki lomalagi, ka ratou a raica ka rogoca kina e vuqa na veika veivakurabuitaki. Eratou a rawa ni kila vinaka cake sara na veika ni Kalou.
A veisau na yagodratou me sega ni mate rawa.
Eratou a lesu mai ki vuravura na tisaipeli e lewe tolu ka tekivu vunau ka veipapitaisotaki.
Era a biuta na tisaipeli lewe tolu na Nifaiti daucaka ca ki vale ni veivesu kei na qara titobu, ia na kaukauwa ni Kalou a vukei ratou me dro bula.
Ena gauna ratou a biligi kina ki na lovo ni bukawaqa kei na qara eso ni manumanu kila, eratou a taqomaki talega ena kaukauwa ni Kalou.
Eratou a tomana na tisaipeli e lewe tolu na vunautaki ni kosipeli i Jisu Karisito vei ira na Nifaiti. Eratou se vunautaka tikoga na nona kosipeli.